ប្រជាពលរដ្ឋមួយចំនួនដែលជាអ្នកមានជីវភាពធូរធារ រស់នៅក្នុងទីក្រុងរណបហ្គ្រេនភ្នំពេញ ខណ្ឌសែនសុខ រាជធានីភ្នំពេញ បានអះអាងថា ពួកគេបានរងនូវការគំរាមកំហែងដោយអាវុធ បន្ទាប់ពីបានធ្វើសកម្មភាពតវ៉ាកុំឱ្យមានការលុបស្រះទឹកក្នុងតំបន់នោះ។
ការគំរាមកំហែងនេះ កើតមានឡើងបន្ទាប់ពីមានប្រជាពលរដ្ឋប្រមាណ១៤០នាក់ បានផ្ទុះការតវ៉ានិងដាក់ពាក្យស្នើសុំទៅកាន់ក្រសួងរៀបចំដែនដី នគរូបនីយកម្ម និងសំណង់ ក្រសួងបរិស្ថាន និងរដ្ឋបាលរាជធានីភ្នំពេញ ឱ្យជួយអន្តរាគមន៍រក្សាទុកនិងទប់ស្កាត់ការលុបស្រះទឹកដែលមានទំហំ១០ហិចតា កាលពីថ្ងៃទី២២ ខែកញ្ញា ឆ្នាំ២០២០។
លោក អ៊ិន ចាន់នី ប្រធាននាយកប្រតិបត្តិធនាគារអេស៊ីលីដា បានថ្លែងប្រាប់វីអូឌី នៅថ្ងៃទី២៨ ខែកញ្ញានេះថា រូបលោកនិងប្រជាពលរដ្ឋមួយចំនួននៅក្នុងទីក្រុងរណបហ្គ្រេនភ្នំពេញ បានធ្វើការតវ៉ានិងលើកបដាទាមទារឱ្យរក្សាទុកនិងទប់ស្កាត់ការលុបស្រះនេះ កាលពីថ្ងៃទី២២ ខែកញ្ញា ឆ្នាំ២០២០។
លោកបន្តថា ស្របពេលតវ៉ានេះ ប្រជាពលរដ្ឋបាននាំគ្នាដាក់ចងបដានៅមុខផ្ទះ ដើម្បីទាមទារកុំឱ្យលុបស្រះនោះ ប៉ុន្តែថ្ងៃទី២៤ ខែកញ្ញា ក៏ស្រាប់តែមានមនុស្សមួយក្រុមដែលមានកាំភ្លើងជាប់នឹងខ្លួន បានដើរដកយកបដានោះចេញ ដែលករណីនេះធ្វើឱ្យប្រជាពលរដ្ឋមានការភ័យខ្លាចនិងបារម្ភពីសុវត្ថិភាពក្នុងការរស់នៅ។
លោកបានបញ្ជាក់ថា៖ «យើងមិនដឹងថា ពួកគេ [អ្នកដែលមានកាំភ្លើងជាប់ខ្លួន] មកពីណាទេ ដែលមកថតផ្ទះយើង ដែលមានអាវុធដាក់ក្នុងស្រោម នេះគឺជាការគំរាមកំហែង និងសម្លុត ដែលធ្វើឱ្យប្រជាជនខ្លាច ដែលយើងកំពុងតែរស់នៅក្នុងសុខសន្តិភាព គាត់បង្កបែបនេះ! តំបន់នេះកណ្តាលក្រុងភ្នំពេញ ហើយក្រុមហ៊ុនគាត់ហ៊ានធ្វើបែបនេះ ដែលហ៊ានប្រព្រឹត្តអំពើមិនគប្បីមកលើប្រជាជនធម្មតានោះ»។
លោកបានចាត់ទុកសកម្មភាពនេះ ថាជាការគំរាមកំហែងនិងជាទង្វើខុសច្បាប់ ដែលពួកគាត់ជាប្រជាពលរដ្ឋពុំអាចទទួលយកបានទេ។
លោកបានបន្ថែមថា៖ «ពេលយើងជួបគាត់កាលពីថ្ងៃទី១០ គាត់ថា គាត់ [ម្ចាស់ទីក្រុងរណបហ្គ្រេនភ្នំពេញ] លុប [បឹង] ហើយបើយើងមិនធ្វើតាមគាត់ គាត់នឹងផ្តាច់ភ្លើង ទីមួយ។ គំរាមទី២ គាត់ថា យើងនៅក្នុងបុរី ត្រូវតែស្តាប់គាត់»។
បើតាមលោក អ៊ិន ចាន់នី ប្រជាពលរដ្ឋបានសម្រេចចិត្តទិញលំនៅដ្ឋានក្នុងទីក្រុងរណបហ្គ្រេនភ្នំពេញ ដោយសារតែនៅទីនោះមានស្រះធម្មជាតិនិងកន្លែងវាយកូនហ្គោល ដែលមានសារៈសំខាន់សម្រាប់មនុស្សនិងសត្វ ដោយសារស្រះនោះជាទីកន្លែងដែលប្រជាពលរដ្ឋអាចទៅលំហែកាយ ទទួលទានអាហារ និងជាប្រភពទឹកដែលអាចជួួយក្នុងករណីដែលមានអគ្គិភ័យកើតឡើងបានផងដែរ។
កាលពីខែតុលា ឆ្នាំ២០១៩ ក្រុមហ៊ុន វ៉ាយ អិល ភី គ្រុប បានលក់និងផ្ទេរដីបុរីក្នុងទីក្រុងរណបហ្គ្រេនភ្នំពេញ ទៅឱ្យក្រុមហ៊ុន ជីប ម៉ុង លែន ដោយក្រុមហ៊ុនទាំងពីរមិនបានជូនដំណឹងដល់ប្រជាពលរដ្ឋឡើយ។
លោក អ៊ិន ចាន់នី បានបញ្ជាក់ទៀតថា ក្នុងអំឡុងជំនួបរវាងតំណាងសហគមន៍និងក្រុមហ៊ុន ជីប ម៉ុង លែន នាពេលថ្មីនេះៗ ក្រុមហ៊ុនបានបញ្ជាក់ប្រាប់ពួកគេថា បឹងនោះគឺជាដីរបស់ក្រុមហ៊ុន ដែលក្រុមហ៊ុនមានសិទ្ធិក្នុងការគ្រប់គ្រង ខណៈប្រជាពលរដ្ឋចាត់ទុកបឹងនោះថាជាសម្បត្តិរួមរបស់សហគមន៍។
បើតាមបដាមួយក្នុងចំណោមបដាជាច្រើនដែលចងនៅមុខផ្ទះប្រជាពលរដ្ឋ បានសសេរថា៖ «សូមការពារស្រះទឹកនិងទីលានវាយកូនហ្គោលក្នុងទីក្រុងហ្គ្រេនភ្នំពេញ តាមប្លង់មេដែលបានផ្សព្វផ្សាយដោយក្រុមហ៊ុន វ៉ាយ អិល ភី គ្រុប»។
VOD មិនអាចទាក់ទងសុំការបំភ្លឺពីខាងក្រុមហ៊ុន ជីប ម៉ុង លែន បាននៅឡើយទេ នៅថ្ងៃចន្ទនេះ ខណៈរដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ លោក ជា សុផារ៉ា និងអ្នកនាំពាក្យសាលារាជធានីភ្នំពេញ លោក មេ៉ត មាសភក្តី បានបដិសេធអត្ថាធិប្បាយ ដោយប្រាប់ថាជាប់រវល់។
តែយ៉ាងណា ក្រុមហ៊ុន ជីប ម៉ុង លែន បានបញ្ជាក់ប្រាប់សារព័ត៌មានក្នុងស្រុកថា ពាក់ព័ន្ធនឹងករណីនេះ តំណាងម្ចាស់កម្មសិទ្ធិមុនបានបញ្ជាក់ថា ដីស្រះដែលប្រជាពលរដ្ឋធ្វើការតវ៉ាមិនឱ្យលុបនេះ ជាទីតាំងដែលត្រូវបានជីកយកអាចម៍ដីនិងប្រើប្រាស់ជាអាងស្តុកទឹកបណ្តោះអាសន្ន សម្រាប់ស្រោចស្រពទីលានវាយកូនហ្គោលតែប៉ុណ្ណោះ ។
ក្រុមហ៊ុន ជីប ម៉ុង លែន បានបញ្ជាក់ទៀតថា៖ «ក្រុមហ៊ុនបានប្តេជ្ញាកែប្រែអាងស្តុកទឹកបណ្តោះអាសន្ននេះ ឱ្យក្លាយទៅជាសួនឧទ្យានបៃតងចម្រុះ ដោយមានដើមឈើជាច្រើន កន្លែងហាត់ប្រាណ កន្លែងលេងសម្រាប់កុមារ និងទីតាំងសម្រាប់លំហែអារម្មណ៍ ដោយមានកន្លែងបាញ់ទឹក [ហៅថាគម្រោង “Central Park”] ជាជាងការរក្សាទុកអាងស្តុកទឹកនេះ»។
អ្នកនាំពាក្យក្រសួងបរិស្ថាន លោក នេត្រ ភក្ត្រា មានប្រសាសន៍ថា លោកនៅពុំទាន់ច្បាស់ថា ខាងក្រសួងបានទទួលញត្តិរបស់ប្រជាពលរដ្ឋហើយឬនៅទេ ដោយរង់ចាំសួរមន្ត្រីរដ្ឋបាលសិន។ តែយ៉ាងណា លោកថា ប្រសិនបើក្រសួងបានទទួលញត្តិនោះហើយ នោះក្រសួងនឹងពិនិត្យលើសំណើនេះទៅតាមនីតិវិធី៕
