កម្លាំងសមត្ថកិច្ចខេត្តព្រះសីហនុ កំពុងធ្វើការស៊ើបអង្កេតទៅលើករណីផ្ទុះអាវុធនៅកណ្តាលក្រុងព្រះសីហនុ ដែលបានបណ្តាលឱ្យបុរសម្នាក់បានស្លាប់និងសមត្ថកិច្ច២នាក់រងរបួស។
អ្នកនាំពាក្យរដ្ឋបាលខេត្តព្រះសីហនុ លោក ឃាង ភារម្យ បានប្រាប់វីអូឌីនៅរសៀលថ្ងៃចន្ទនេះថា ករណីផ្ទុះអាវុធនេះបានកើតឡើងនៅម៉ោងជាង១២យប់រំលងអធ្រាត្រឈានចូលថ្ងៃទី២៦ ខែកញ្ញា បង្កឡើងដោយជនជាតិខ្មែរចំនួន៣នាក់ ក្នុងនោះសមត្ថកិច្ចបានធ្វើការឃាត់ខ្លួនជនសង្ស័យម្នាក់។
លោកបន្តថា ករណីនេះ អាចជាករណីទំនាស់គ្នារវាងជនបង្កក្រោយពីពួកគេចេញពីផឹកស៊ី ហើយសមត្ថកិច្ចខេត្តកំពុងធ្វើការស៊ើបអង្កេត។
លោក ភារម្យ ថ្លែងថា៖ «ក្នុងនាមជាគណៈបញ្ជាខេត្ត គឺយើងបានដាក់ការយកចិត្តទុកដាក់ខ្លាំងបំផុតទៅលើការពង្រឹងសន្តិសុខសុវត្ថិភាពជូនបងប្អូនប្រជាពលរដ្ឋក្នុងខេត្តព្រះសីហនុផង ទាំងភ្ញៀវទេសចរ និងអ្នកវិនិយោគ គឺយើងយកចិត្តទុកដាក់ខ្ពស់ណាស់ ហើយគ្រប់បទល្មើស ស្ទើរតែគ្រប់បទល្មើសទាំងអស់ គឺយើងអាចបង្រ្កាបបាន។»
វីអូឌី មិនទាន់អាចសុំការបញ្ជាក់ពីស្នងការនគរបាលខេត្តព្រះសីហនុ លោក ជួន ណារិន្ទ និងស្នងការរងទទួលបន្ទុកផ្នែកព្រហ្មទណ្ឌ លោក កុល ផាលី បាននៅឡើយទេនៅថ្ងៃនេះ។
បើតាមអ្នកនាំពាក្យរដ្ឋបាលខេត្ត សកម្មភាពបាញ់បោះនោះ បានកើតឡើងនៅតាមបណ្តោយផ្លូវឯករាជ្យ ស្ថិតក្នុងសង្កាត់លេខ២ ក្រុងព្រះសីហនុ បណ្តាលឱ្យបុរសជាអ្នករត់កង់បីម្នាក់បានស្លាប់និងសមត្ថកិច្ចពីរនាក់រងរបួស។
អ្នកសម្របសម្រួលសមាគមការពារសិទ្ធិមនុស្សអាដហុកប្រចាំខេត្តព្រះសីហនុ អ្នកស្រី ចៀប សុធារី មានប្រសាសន៍ថា បច្ចុប្បន្ន ខេត្តព្រះសីហនុ តែងតែកើតមាននូវរឿងអសន្តិសុខនិងការបាញ់បោះជាច្រើនករណី ដែលបង្កជាក្តីបារម្ភមួយសម្រាប់ប្រជាពលរដ្ឋនៅទីនោះ។
លោកស្រី សុធារី ថ្លែងថា៖ «ថ្ងៃណាក៏បទល្មើសកើតឡើងសឹងតែរាល់ថ្ងៃ បញ្ហាគ្រឿងញៀន ការបង្ករបួសស្នាម គ្រោះថ្នាក់ចរាចរណ៍ ហើយថ្មីនេះមានការប្រើប្រាស់អាវុធ ហើយមានការបាញ់សម្លាប់ រឿងការប្រើប្រាស់អាវុធបាញ់សម្លាប់មួយរយៈមុនកូវីដ១៩ មានការប្រើប្រាស់អាវុធ ការចាប់ជំរិត មានច្រើន […] អីចឹងវាជាបញ្ហាមួយដែលធ្វើឱ្យប្រជាពលរដ្ឋរស់នៅក្នុងខេត្តព្រះសីហនុមានការខ្វល់ខ្វាយ ព្រួយបារម្ភពីបញ្ហាសន្តិសុខរបស់ពួកគាត់»។
អ្នកស្រី សុធារី ក៏បានជំរុញឱ្យអាជ្ញាធរមានសមត្ថកិច្ចពាក់ព័ន្ធ បង្កើនការយកចិត្តទុកដាក់និងទប់ស្កាត់បញ្ហាទាំងនេះឱ្យមានប្រសិទ្ធភាព ដើម្បីការពារសន្តិសុខសុវត្ថិភាពជូនប្រជាពលរដ្ឋ៕