មន្ត្រីអគ្គស្នងការដ្ឋាននគរបាលជាតិ បានឱ្យដឹងថា មកដល់ព្រឹកថ្ងៃចន្ទនេះ សមត្ថកិច្ចនៅពុំទាន់ចាប់ខ្លួនជនសង្ស័យដែលបាញ់សម្លាប់បុរសម្នាក់ជាជាងកាត់សក់នៅក្នុងខណ្ឌទួលគោក បាននៅឡើយទេ។
អ្នកនាំពាក្យអគ្គស្នងការដ្ឋាននគរបាលជាតិ លោក ឆាយ គឹមខឿន មានប្រសាសន៍ថា សមត្ថកិច្ច កំពុងបន្តស្រាវជ្រាវរកជនសង្ស័យដែលបាញ់សម្លាប់បុរសជាងសក់នោះ ប៉ុន្តែមកដល់ម៉ោងជាង១០ព្រឹកនេះ នៅមិនទាន់រកឃើញនៅឡើយ។
លោកថា៖ «មិនមែនស្រាវជ្រាវទេ គឺកំពុងតាមចាប់ [ជនសង្ស័យ] ខ្ញុំពុំទាន់ជម្រាបបានទេ ព្រោះមិនទាន់ចាប់ខ្លួនបាន ខ្ញុំសុំមិនផ្តល់ព័ត៌មាន ចាំចាប់មនុស្សបានមកសិន»។
កាលពីវេលាម៉ោងជាង១០យប់ ថ្ងៃទី២៦ ខែកញ្ញា មានហេតុការណ៍បាញ់សម្លាប់ជាងកាត់សក់ នៅជិតសាលារៀនទួលគោក ស្ថិតនៅសង្កាត់បឹងកក់២ ខណ្ឌទួលគោក។
ក្នុងហេតុការណ៍នោះ បានបណ្តាលឱ្យជាងកាត់សក់ម្នាក់ឈ្មោះ សុខ សុកេន អាយុជាង៣០ឆ្នាំ ត្រូវបានជនល្មើសបាញ់សម្លាប់។ ក្រោយការស្លាប់ ជាងកាត់សក់រូបនោះបានបន្សល់ទុកកូនស្រី៤នាក់ ដែលមានអាយុចម្លោះពី១ឆ្នាំ ដល់អាយុ១១ឆ្នាំ។
លោក ឆាយ គឹមខឿន បានបញ្ជាក់ប្រាប់វីអូឌីកាលពីថ្ងៃអាទិត្យថា តាមការស៊ើបអង្កេតបឋម ជនសង្ស័យដែលបាញ់សម្លាប់ជាងកាត់សក់ ទំនងជាមន្ត្រីនគរបាលខណ្ឌ។ ប៉ុន្តែលោកមិនបានបញ្ជាក់ថាខណ្ឌណានោះទេ ដោយថា ទុកឱ្យសមត្ថកិច្ចស្រាវជ្រាវឱ្យច្បាស់លាស់ជាមុនសិន។
ចំណែកអ្នកនាំពាក្យស្នងការដ្ឋាននគរបាលរាជធានីភ្នំពេញ លោក សាន សុខសីហា បានបដិសេធប្រាប់អត្តសញ្ញាណជនសង្ស័យដែរ ដោយប្រាប់ថា ទុកឱ្យសមត្ថកិច្ចតាមចាប់ខ្លួនជនសង្ស័យឱ្យបានសិន៕
