កម្លាំងប្រដាប់អាវុធនិងអាជ្ញាធរពាក់ព័ន្ធខេត្តព្រះសីហនុ បានឃាត់ខ្លួនបុរសជនជាតិវៀតណាមម្នាក់ដែលបានលាក់ទុកក្រឡចាស់ៗជិត៣០០ក្រឡ ដោយសង្ស័យថាជាក្រឡបុរាណ។
អ្នកនាំពាក្យរដ្ឋបាលខេត្តព្រះសីហនុ លោក ឃាង ភារម្យ ប្រាប់វីអូឌីនៅថ្ងៃនេះថា កងកម្លាំងប្រដាប់អាវុធ ព្រះរាជអាជ្ញារងអមសាលាដំបូងខេត្ត និងប្រធានមន្ទីរវប្បធម៌ខេត្ត បានឃាត់ខ្លួនជនជាតិវៀតណាមម្នាក់កាលពីថ្ងៃទី២៧ ខែកញ្ញា ស្ថិតនៅចំណុចផែរ៉ូយ៉ាល់ ស្ថិតនៅភូមិ៣ សង្កាត់៣ ក្រុងព្រះសីហនុ។ លោកបន្តថា ការឃាត់ខ្លួននេះធ្វើឡើងបន្ទាប់ពីជនជាតិវៀតណាមរូបនេះ បានលាក់ទុកក្រឡចំនួន២៨១ក្រឡ ដែលសមត្ថកិច្ចសង្ស័យថាជាវត្ថុបុរាណ។
លោកបានបញ្ជាក់ថា៖ «សមត្ថកិច្ចលោកបានឃាត់ខ្លួនជនសង្ស័យហ្នឹង ព្រមទាំងដកហូតក្រឡហ្នឹង មានទាំងតូច មានទាំងធំ សរុប២៨១ក្រឡ ដើម្បីបន្តនីតិវិធី។ អ៊ីចឹង ចំពោះការសន្និដ្ឋានថា ជាក្រឡបុរាណឬក៏យ៉ាងណានោះ មន្ទីរជំនាញកំពុងធ្វើកោសលវិច័យទៅលើកិច្ចការងារហ្នឹង។ យើងទុកកិច្ចការងារហ្នឹងជាសមត្ថកិច្ចរបស់ជំនាញ មិនទាន់អាចធ្វើការបញ្ជាក់លម្អិតបានទេ»។
បើតាមអ្នកនាំពាក្យរូបនេះ បច្ចុប្បន្ន មន្ត្រីអាវុធហត្ថខេត្ត កំពុងធ្វើការសាកសួរជនជាតិវៀតណាមនោះ ដើម្បីអនុវត្តនីតិវិធីបន្ត។ ជនសង្ស័យជាជនជាតិវៀតណាមនោះ មានឈ្មោះ ឡេ វ៉ាងហួន អាយុ៤២ឆ្នាំ។
ប្រធានមន្ទីរវប្បធម៌ខេត្តព្រះសីហនុ លោក ប៊ុត បុប្ផា មានប្រសាសន៍ថា តាមការពិនិត្យនិងសន្និដ្ឋានបឋម ក្រឡទាំងនោះអាចជាក្រឡបុរាណ ដែលអាយុកាលវាអាចនៅចន្លោះសតវត្សទី១៥និងទី១៧។ តែយ៉ាងណា លោកថា ក្រសួងកំពុងពិនិត្យពីប្រវត្តិក្រឡទាំងនោះ។
លោកថា៖ «ក្រឡហ្នឹងយើងសន្មតជាបឋមសិនថា អាចជាវត្ថុបុរាណ ដោយសារតែក្រឡហ្នឹង វាមានទំហំប្រហាក់ប្រហែលនឹងក្រឡដែលគេរកឃើញសំពៅមួយនៅខេត្តកោះកុងអ៊ីចឹង ហើយអាយុកាលវាអាចចន្លោះពីសតវត្សទី១៥និងសតវត្សទី១៧ ដូច្នេះយើងសន្និដ្ឋានបឋមសិន ហើយយើងនឹងរង់ចាំខាងក្រសួងចុះទៅពិនិត្យ»។
ទោះជាយ៉ាងណា លោក ប៊ុត បុប្ផា បានបញ្ជាក់ថា មន្ទីរវប្បធម៌ខេត្ត នៅមិនទាន់ដឹងនៅឡើយថាតើជនជាតិវៀតណាមរូបនេះបានយកក្រឡទាំងអស់នេះមកពីប្រភពណា ហើយយកទៅណានោះទេ ដោយសារបច្ចុប្បន្នខាងមន្ត្រីអាវុធហត្ថ កំពុងធ្វើការសាកសួរជនសង្ស័យរូបនោះ។
អ្នកនាំពាក្យក្រសួងវប្បធម៌ និងវិចិត្រសិល្បៈ លោក ឡុង ប៉ុណ្ណាស៊ីរីវត្ថ មានប្រសាសន៍ថា ក្រសួងនឹងចុះពិនិត្យក្រឡទាំងនោះនៅខេត្តព្រះសីហនុ នៅថ្ងៃស្អែកនេះ។
លោកថា៖ «ជំហានដំបូងហ្នឹង យើងទៅទុកឱ្យខាងប៉េអឹមគាត់សួរចម្លើយ សួរអីសិនទៅ។ បើសិនជាករណីហ្នឹង វាអាចមានទំនាក់ទំនងខាងជំនួញ វាអាចមានសំពៅលិចអីនៅសមុទ្រយើង សមុទ្រគេវាធម្មតាទេ»។
កាលពីខែកុម្ភៈ ឆ្នាំ២០០៦ កម្ពុជាបានរកឃើញសំពៅបុរាណមួយគ្រឿងដែលផ្ទុកដោយក្រឡ ក្អមឆ្នាំងបុរាណ ព្រមទាំងវត្ថុបុរាណជាច្រើនទៀត ដែលលិចនៅដែនសមុទ្រកោះស្តេច ស្រុកគិរីសាគរ ខេត្តកោះកុង ដោយវត្ថុបុរាណទាំងនោះស្ថិតក្នុងរជ្ជកាល៣០០ទៅ៤០០ឆ្នាំមុន៕
