ចៅក្រមសហព័ន្ធអាមេរិក លោក Carl J. Nichols បានសម្រេចផ្អាកជាបណ្តោះអាសន្ននូវបម្រាមរបស់លោក Trump ដែលហាមឃាត់ការទាញយកកម្មវិធីវីដេអូ TikTok ពីកម្មវិធី App Store នៅសហរដ្ឋអាមេរិក។
កាលពីពេលថ្មីៗនេះ លោក ត្រាំ ប្រធានាធិបតីសហរដ្ឋអាមេរិក បានចេញបទបញ្ជាមួយ ដោយកំណត់ឱ្យក្រុមហ៊ុន Apple និង Google បិទការទាញយកកម្មវិធី Tik Tok ចាប់ពីម៉ោង១១និង៥៩នាទីយប់ ម៉ោងនៅក្នុងសហរដ្ឋអាមេរិក ចាប់ពីថ្ងៃទី២៧ ខែកញ្ញា តទៅ។
លោកចៅក្រម Carl J. Nichols បានបញ្ជាក់នៅក្នុងសេចក្តីបង្គាប់បឋមមួយដែលត្រូវបានសារព័ត៌មាន sputniknews.com ស្រង់ប្រសាសន៍មកផ្សព្វផ្សាយកាលពីថ្ងៃអាទិត្យថា វិធានការដែលហាមមិនឱ្យទាញយកកម្មវិធីនេះ ជាការដកហូតសិទ្ធិយ៉ាងសំខាន់របស់ក្រុមហ៊ុន។ តែយ៉ាងណា តុលាការអាមេរិកមិនបានបញ្ជាក់ច្បាស់លាស់ពីមូលហេតុឡើយ ដោយរង់ចាំការជជែកជាមួយភាគីដើមបណ្ដឹងនិងចុងបណ្ដឹងសិន មុននឹងបញ្ចេញដីកាជាសាធារណៈ។
សារព័ត៌មានដដែលបានបន្តថា ការសម្រេចចិត្តរបស់ចៅក្រម អាចធានាបាននូវសេចក្តីបង្គាប់បឋម ដែលនឹងអនុញ្ញាតឱ្យកម្មវិធីមួយនេះនៅតែបន្តមាននៅក្នុងប្រទេសអាមេរិក។
TikTok បានកំពុងប្រឈមមុខជាមួយសម្ពាធពីរដ្ឋបាល Trump តាំងពីខែសីហាមកម៉្លេះ នៅពេលដែលប្រធានាធិបតីរូបនេះ បានប្រកាសពីចេតនារបស់គាត់ក្នុងការបិទកម្មវិធីវីដេអូមួយនេះនៅសហរដ្ឋអាមេរិក ដោយលើកឡើងពីការភ័យខ្លាចនៃ «ការគំរាមកំហែងដល់សន្តិសុខជាតិ»។
កាលពីថ្ងៃទី១៨ ខែកញ្ញា ឆ្នាំ២០២០ ក្រុមហ៊ុន TikTok និងក្រុមហ៊ុន ByteDance ដែលជាម្ចាស់ក្រុមហ៊ុនបណ្ដាញទំនាក់ទំនងសង្គមចិនមួយ បានដាក់ពាក្យបណ្តឹងទៅកាន់តុលាការសហព័ន្ធវ៉ាស៊ីនតោន សហរដ្ឋអាមេរិក ដើម្បីប្រឆាំងជំទាស់នឹងបម្រាមដាក់ចេញដោយរដ្ឋបាល លោក ដូណាល់ ត្រាំ។ នៅក្នុងពាក្យបណ្ដឹងនោះ ក្រុមហ៊ុនទាំងពីរបានលើកឡើងថា បម្រាមរបស់លោក ត្រាំ គឺធ្វើឡើងក្រោមហេតុផលនយោបាយ និងបំពានលើច្បាប់ First Amendment rights នៃសហរដ្ឋអាមេរិក។
តើអ្វីទៅជាដំណោះស្រាយរបស់ TikTok នៅសហរដ្ឋអាមេរិក?
នៅក្នុងការពិពណ៌នារបស់សារព័ត៌មាន sputniknews.com បានបន្តថា ជាការភ័យខ្លាចនៃ «ការគំរាមកំហែងដល់សន្តិសុខជាតិ» ដែលបានចោទប្រកាន់ទៅលើក្រុមហ៊ុនចិនមួយនេះ លោក ត្រាំ បានប្រកាសនៅក្នុងខែសីហាថា លោកនឹងបិទកម្មវិធី TikTok នៅលើដីសហរដ្ឋអាមេរិក។ លោកនិយាយថា ប្រសិនបើក្រុមហ៊ុន ByteDance មិនលក់កម្មវិធីមួយនេះមកឱ្យសហរដ្ឋអាមេរិកនៅក្នុងរយៈពេល៤៥ថ្ងៃនោះទេ TikTok នឹងត្រូវដាក់ឱ្យហាមឃាត់ពីសហរដ្ឋអាមេរិក ដោយចាប់ផ្ដើមពីថ្ងៃទី១២ ខែវិច្ឆិកា។
ការចែកចាយ TikTok នៅក្នុងកម្មវិធី App Store របស់សហរដ្ឋអាមេរិក ត្រូវបានគេគ្រោងនឹងហាមឃាត់នៅថ្ងៃទី២០ ខែកញ្ញា ប៉ុន្តែនៅពេលដែលកិច្ចព្រមព្រៀងខិតជិតមកដល់ កាលបរិច្ឆេទកំណត់ត្រូវបានប្តូរទៅថ្ងៃទី២៧ ខែកញ្ញាវិញ។
រដ្ឋបាលលោក ត្រាំ បានអះអាងថា TikTok រួមជាមួយកម្មវិធីផ្ញើសារ WeChat គឺមានទំនាក់ទំនងជាមួយរដ្ឋាភិបាលចិន ហើយអាចជ្រៀតជ្រែកក្នុងការបោះឆ្នោតប្រធានាធិបតីអាមេរិកនាពេលខាងមុខ តែនេះជាអ្វីដែលទាំងក្រុងប៉េកាំង និង ByteDance បានច្រានចោលម្តងហើយម្តងទៀត។
នៅថ្ងៃទី១៩ ខែកញ្ញា ប្រធានាធិបតីអាមេរិក លោក ត្រាំ បានថ្លែងថា លោកស្វាគមន៍ចំពោះកិច្ចព្រមព្រៀងរវាងក្រុមហ៊ុន ByteDance, Oracle និង Walmart ប៉ុន្តែម្ចាស់ក្រុមហ៊ុនរបស់ TikTok បានទទូចចង់កាន់កាប់ភាគហ៊ុន៨០ភាគរយ នៅក្នុងប្រតិបត្តិការរបស់សហរដ្ឋអាមេរិក។
បន្ទាប់មក លោក ត្រាំ បានទទូចសុំឱ្យក្រុមហ៊ុន Oracle និង Walmart គ្រប់គ្រងលើក្រុមហ៊ុន TikTok ទាំងស្រុង បើមិនដូច្នោះទេ វ៉ាស៊ីនតោននឹងមិនយល់ព្រមលើកិច្ចព្រមព្រៀងនោះទេ។
គោលដៅរបស់រដ្ឋបាល Trump លើ TikTok គឺស្របទៅនឹងភាពតានតឹងដែលក្រុងវ៉ាស៊ីនតោននិងទីក្រុងប៉េកាំងកំពុងប្រឈមមុខនាពេលថ្មីៗនេះ ដោយសេតវិមានបានចោទប្រកាន់ប្រទេសចិនថា ជាដើមហេតុនាំឱ្យមានការរាតត្បាតជំងឺកូវីដ១៩ និងការប៉ុនប៉ងបំផ្លាញសន្តិសុខជាតិរបស់សហរដ្ឋអាមេរិក។
ក្រៅពី TikTok ក្រុមហ៊ុនយក្ស Huawei របស់ចិន ក៏ប្រឈមជាមួយសម្ពាធខ្លាំងពីសេតវិមានផងដែរ ដោយលោក ត្រាំ កំពុងដាក់ក្រុមហ៊ុននេះនៅក្នុងបញ្ជីខ្មៅពាណិជ្ជកម្មនិងជំរុញឱ្យប្រទេសដទៃទៀតឈប់ធ្វើការជាមួយក្រុមហ៊ុនចិនដើម្បីអភិវឌ្ឍហេដ្ឋារចនាសម្ព័ន្ធ 5G៕
