ការិយាល័យគណៈកម្មការអប់រំឯកជននៃប្រទេសថៃ បានបង្កើតគណៈកម្មាធិការពិសេសមួយ ដើម្បីស៊ើបអង្កេតក្នុងករណីធ្វើបាបសិស្សជាបន្តបន្ទាប់ នៅសាលារៀនឯកជនអន្តរជាតិ ឈ្មោះ Sarasas Witaed Ratchaphruek ទាំង៤២សាលា ដែលបង្កឱ្យឪពុកម្តាយ និងសាធារណជនមានការខឹងសម្បារ។
តាមប្រភពពីសារព័ត៌មាន Bangkok post បានឱ្យដឹងថា នាពេលថ្មីៗនេះ ការិយាល័យគណៈកម្មការអប់រំឯកជន បានប្រតិកម្មទៅនឹងអំពើធ្វើបាប និងការដាក់ទណ្ឌកម្មមិនសមរម្យទៅលើសិស្សនៅក្នុងសាលារៀនសារ៉ាស់។
កាលពីសប្តាហ៍មុន វីដេអូជាច្រើន ដែលបង្ហាញអំពីការរំលោភបំពានរបស់គ្រូ ទៅលើសិស្សថ្នាក់មត្តេយ្យម្នាក់ នៅក្នុងសាលារៀន ត្រូវបានចែកចាយតាមប្រព័ន្ធអ៊ីនធឺណេត។ តាមរយៈវីដេអូមួយ ដែលយកចេញពីទូរទស្សន៍នៅក្នុងថ្នាក់រៀន បានបង្ហាញពីសកម្មភាពគ្រូបង្រៀនបានរុញក្មេងស្រីម្នាក់ផ្ទប់ទៅនឹងកម្រាល និងទាញសក់របស់នាង នៅចំពោះមុខជំនួយការគ្រូ ដែលពុំមានការជួយអន្តរាគមន៍អ្វីទាំងអស់។
ក្រោយពីការបែកធ្លាយវីដេអូនេះ នៅថ្ងៃទី២៥ ខែកញ្ញា ឪពុកម្តាយសិស្សជាច្រើននាក់ បានទៅសាលារៀននេះ ដើម្បីជួបជាមួយគ្រូដែលធ្វើបាបសិស្សនៅក្នុងវីដេអូនោះ ដែលត្រូវគេស្គាល់ថាឈ្មោះ Ornuma។
បើទោះជាយ៉ាងណាក្តី សាលាក៏បានសម្តែងការសោកស្តាយ និងបានបណ្តេញអ្នកគ្រូ Ornuma ចេញពីការងារ រួមទាំងសន្យាថា នឹងចាត់វិធានការវិន័យទៅលើបុគ្គលិកផ្សេងៗទៀតដែលពាក់ព័ន្ធ។
ប្រភពដដែលបានស្រង់ប្រសាសន៍របស់ អគ្គលេខាធិការនៃគណៈកម្មការធិការអប់រំឯកជន លោក Attapon Truektrongចុះផ្សាយថា គណៈកម្មការអប់រំឯកជន រួមជាមួយនឹងនាយកដ្ឋានសុខភាពផ្លូវចិត្តនៃប្រទេសថៃ នឹងបញ្ជូនអ្នកជំនាញផ្នែកសុខភាព ដើម្បីវាយតម្លៃកុមារទាំងអស់ ដែលនៅក្នុងថ្នាក់រៀននោះ។
លោកបន្តថា លើសពីនេះ អង្គការ ត្រូវធ្វើការយ៉ាងជិតស្និទ្ធជាមួយឪពុកម្តាយ ដើម្បីចាត់វិធានការតាមផ្លូវច្បាប់ទៅលើបុគ្គលិក ដែលស្ថិតក្នុងហេតុការណ៍នោះ ហើយមិនបានជួយកុមាររងគ្រោះផងដែរ។
លោក Attapon បាននិយាយថា គ្រូបង្រៀនឈ្មោះ Ornuma មិនមានលិខិតអនុញ្ញាតបង្រៀននោះទេ ក៏ប៉ុន្តែសាលាបានជួលឱ្យនាងបង្រៀន។ លោកបន្តថា អង្គការបានស្នើសុំដល់សាលាសារ៉ាស់ទាំងអស់ ឱ្យអនុញ្ញាតដល់មាតាបិតាសិស្សអាចចូលមើលវីដេអូ CCTV ក្នុងថ្នាក់រៀនបាន និងធានាថាគ្រូទាំងអស់ មានអាជ្ញាប័ណ្ណត្រឹមត្រូវ ដែលចេញដោយក្រុមប្រឹក្សាគ្រូបង្រៀននៃប្រទេសថៃ។
ប្រធានក្រុមប្រឹក្សាភិបាលគ្រប់គ្រងសាលារៀនសារ៉ាស់ លោក Pibul Yongkamol បានមានប្រសាសន៍ថា សាលារៀនមិនមានគោលការណ៍ដាក់ទណ្ឌកម្មសិស្សដូច្នេះទេ ហើយសាលាបានប្រាប់គ្រូបង្រៀនទាំងអស់ ឱ្យបង្រៀនសិស្សដោយក្តីស្រឡាញ់ និងយកចិត្តទុកដាក់។
ជាមួយគ្នានេះដែរ កាលពីថ្ងៃចន្ទ គ្រូបង្រៀនជនជាតិហ្វីលីពីនអាយុ ២៥ឆ្នាំឈ្មោះ Orejola Marvin Liwanag ត្រូវបានគេរាយការណ៍ទៅប៉ូលីសខេត្តណុនថាបូរីថា បានរំលោភបំពានលើរាងកាយរបស់សិស្សថ្នាក់មត្តេយ្យនៅក្នុងសាលា ក៏ប៉ុន្តែត្រូវបានលោក Liwanag បដិសេធការចោទប្រកាន់នេះ។
បើទោះជាយ៉ាងនេះក្តី លោកក៏នៅតែរងនូវការចោទប្រកាន់ពីបទបង្រៀនដោយគ្មានលិខិតអនុញ្ញាតបង្រៀនផងដែរ៕
