ក្រសួងសុខាភិបាលកម្ពុជា បានសហការជាមួយមូលនិធិអាស៊ី-អឺរ៉ុប រៀបចំវេទិកាប្រយុទ្ធប្រឆាំងនឹងឱសថក្លែងក្លាយ និងឱសថអន់គុណភាព។
សេចក្ដីជូនព័ត៌មានរបស់ក្រសួងសុខាភិបាល បានឱ្យដឹងថា វេទិកានេះ នឹងបា្ររព្ធធ្វើឡើងនៅថ្ងៃទី២៩ និងថ្ងៃទី៣០ ខែកញ្ញា ឆ្នាំ២០២០ ដោយផ្ដោតសំខាន់ទៅលើប្រធានបទមួយចំនួន។
ក្រសួងបន្តថា ប្រធានបទាំងនោះ រួមមាន បន្ទុករបស់ពិភពលោកនៃវិបត្តិជំងឺកូវីដ១៩ អភិក្រម ពហុនយោបាយ គោលនយោបាយ, យន្ដការរបស់អាស៊ី-អឺរ៉ុប សម្រាប់ការប្រយុទ្ធនឹងឱសថក្លែងក្លាយ និងអន់គុណភាព, កាលានុវត្តភាពសម្រាប់កិច្ចសហប្រតិបត្តិការ និងការស្នើអនុសាសន៍សម្រាប់ការប្រយុទ្ធប្រឆាំងនឹងឱសថក្លែងក្លាយ និងអន់គុណភាព ដាក់ជូនកិច្ចប្រជុំកំពូលអាស៊ី-អឺរុប លើកទី១៣។
ក្រសួងបានឱ្យដឹងដែរថា កិច្ចប្រជុំនេះ នឹងមានការចូលរួមពីឧត្តមមន្ត្រីសុខាភិបាលទទួលបន្ទុកគោលនយោបាយ ឱសថ និងកិច្ចសហប្រតិបត្តិការអន្តរជាតិនៃប្រទេសមកពីតំបន់អាស៊ីអឺរ៉ុប ចំនួន ៥១ប្រទេស រួមទាំងអគ្គលេខាធិការដ្ឋានអាស៊ាន និងលេខាធិការដ្ឋានអឺរ៉ុប សរុបប្រមាណ ៣០០នាក់។ សម្រាប់កម្ពុជា លោក ម៉ម ប៊ុនហេង រដ្ឋមន្រ្តីក្រសួងសុខាភិបាល នឹងចូលរួមកិច្ចប្រជុំនេះ៕