សង្គម

សមត្ថកិច្ចថា អ្នកសារព័ត៌មាន CBN ស្លាប់ដោយគ្រោះថ្នាក់ចរាចរណ៍ មិនមែនករណីឃាតកម្ម

លោក សាំ ឧត្ដម
| ២៩ កញ្ញា ២០២០
ម៉ោង ១៧:៤៩

ពិធីបុណ្យសពលោក គួយ ពិសិត អ្នកយកព័ត៌មានរបស់ CBN TV ONLINE នៅថ្ងៃទី២៩ កញ្ញា ២០២០ (រូបភាពពីវីដេអូ CBN TV)

សមត្ថកិច្ចរាជធានីភ្នំពេញ អះអាងថា អ្នកសារព័ត៌មានរបស់អង្គភាព CBN TV Online ដែលបានស្លាប់ នៅសង្កាត់ចោមចៅ៣ មិនមែនជាករណីឃាតកម្មនោះទេ ខណៈការធ្វើកោសល្យវិច័យ បញ្ជាក់ថា ជាករណីគ្រោះថ្នាក់ចរាចរណ៍។

កាលពីថ្ងៃម៉ោងជិត៣ទៀបភ្លឺ ថ្ងៃទី២៩ ខែកញ្ញា ឆ្នាំ២០២០នេះ ប្រជាពលរដ្ឋបានប្រទះឃើញ អ្នកសារព័ត៌មានអង្គភាព CBN TV Online ម្នាក់ ឈ្មោះ គួយ ពិសិត អាយុ ២៤ឆ្នាំ បានស្លាប់ នៅចំណុចផ្លូវបេតុង ភូមិព្រៃទា សង្កាត់ចោមចៅ៣ ខណ្ឌពោធិ៍សែនជ័យ។

ក្រោយហេតុការណ៍នោះ គេទំព័រអង្គភាព CBN TV Online និងសារព័ត៌មានមួយចំនួន បានចុះផ្សាយថា ករណីស្លាប់របស់ជនរងគ្រោះរូបនេះ ជាករណីឃាតកម្ម។

តែយ៉ាងណា អធិការដ្ឋាននគរបាលខណ្ឌពោធិ៍សែនជ័យ លោកវរសេនីយន៍ទោ ម៉ម វុទ្ធី បានប្រាប់វីអូឌីនៅរសៀលថ្ងៃអង្គារនេះថា ករណីស្លាប់របស់អ្នកសារព័ត៍មានរូបនេះ មិនមែនជាករណីឃាតកម្មនោះទេ តែជាករណីគ្រោះថ្នាក់ចរាចរណ៍។

លោកបានបញ្ជាក់ថា៖«ខ្ញុំធ្វើតាមជំនាញរបស់ខ្ញុំ គឺធ្វើកោសល្យវិច័យ ហើយនិងមានសាក្សី បន្ទាប់មកមានការអះអាងពីអ្នកជិតខាង ដែលគាត់ឃើញផ្ទាល់ភ្នែក»។

ស្រដៀងគ្នានេះផងដែរ នាយប៉ុស្ដ៍នគរបាលសង្កាត់ចោមចៅ៣ លោក ថេង កុសល បានអះអាងដូចគ្នាថា អ្នកកាសែតរូបនោះ បានស្លាប់ក្នុងករណីគ្រោះថ្នាក់ចរាចរណ៍។

លោកថា ៖ «យើងផ្អែកលើកោសល្យវិច្ជ័យធ្វើជាមួយខាងក្រុមខាងអ្នកជំនាញរបស់រាជរដ្ឋាភិបាលរបស់យើង[…] គាត់បញ្ជាក់ច្បាស់ហើយជាមួយឪពុកជនរងគ្រោះ»។

វីអូឌី មិនអាចទាន់សុំការបញ្ជាក់ពីអង្គភាពសារព័ត៌មាន CBN TV Online និងគ្រួសារសពបាននៅឡើយទេនៅរសៀលថ្ងៃនេះ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។