ធនាគារពិភពលោកព្យាករថាភាពក្រីក្រនៅកម្ពុជាទំនងជាកើនឡើងវិញព្រោះកំណើនសេដ្ឋកិច្ចមានសភាពមិនសូវល្អដោយសារតែការរីករាលដាលជាសកលនៃជំងឺកូវីដ១៩។
ក្នុងចេញរបាយការណ៍បច្ចុប្បន្នភាពសេដ្ឋកិច្ចសម្រាប់តំបន់អាស៊ីបូព៌ានិងប៉ាស៊ីហ្វិក ដែលចេញដោយធនាគារពិភពលោកនៅថ្ងៃទី២៨ខែកញ្ញាម្សិលមិញ បានរកឃើញថាស្ថានភាពសេដ្ឋកិច្ចនៅក្នុងតំបន់នេះកំពុងរងផលប៉ះពាល់ខ្លាំង ដែលបណ្ដាលឱ្យការបិទខ្ទប់សេដ្ឋកិច្ចចំពោះការរីករាលដាលនៃមេរោគកូវីដ១៩។
ក្នុងរបាយការណ៍នោះ ធនាគារពិភពលោកក៏បានភ្ជាប់ព្រឹត្តិប័ត្រសង្ខេបស្ដីពីស្ថានភាពសេដ្ឋកិច្ច ដែលកំពុងត្រដាបត្រដួសចំពោះមុខការធ្លាក់ចុះ នៃវិស័យសំខាន់ៗរបស់ក្បាលម៉ាស៊ីនជំរុញកំណើនសេដ្ឋកិច្ចកម្ពុជាជាពិសេស វិស័យសំណង់ទេសចរណ៍, និងការនាំចេញទំនិញ។ ស្ថាប័ននេះថាវិស័យទាំងអស់នេះនៅតែបន្តទទួលរងការប៉ះពាល់យ៉ាងធ្ងន់ធ្ងរពីវិបត្តិដែលបង្កឡើងដោយការរាលដាលជំងឺកូវីដ១៩។
ធនាគារពិភពលោកកត់សម្គាល់ថា៖ «សេដ្ឋកិច្ចនៅក្នុងឆ្នាំ២០២០បានព្យាករទុកថានឹងមានកំណើនអវិជ្ជមាន គឺ -២ភាគរយដែលជាការធ្លាក់ចុះយ៉ាងគំហុកបំផុតមិនធ្លាប់មានក្នុងប្រវត្តិសាស្ត្រថ្មីៗនេះរបស់កម្ពុជា ជាហេតុប៉ះពាល់ធ្ងន់ធ្ងរទៅលើសុខុមាលភាពគ្រួសារនិងអាចធ្វើឱ្យភាពក្រីក្រកើនឡើងទៀតផង»។
ធនាគារពិភពលោក បង្ហាញលទ្ធផលនៃការស្ទង់មតិមួយដែលខ្លួនធ្វើឡើងកាលពីខែឧសភា ឆ្នាំ២០២០ រកឃើញថា ក្នុងចំណោមអ្នកផ្តល់ចម្លើយ៧០០នាក់នៅតាមគ្រួសារផ្សេងៗគ្នា មាន១២ភាគរយបានឈប់ធ្វើការ ៨២ភាគរយនៃអាជីវកម្មគ្រួសារដែលមិនប្រកបរបរកសិកម្មមានចំណូលធ្លាក់ចុះដោយសារតែជំងឺកូវីដ១៩។ ជាលទ្ធផល ៦គ្រួសារ ក្នុងចំណោម១០គ្រួសារបានឱ្យដឹងថាពួកគេបានកាត់បន្ថយបរិមាណនៃការទទួលទានអាហារចំណីនិងចំណាយលើតម្រូវការផ្សេងៗ។
ធនាគារពិភពលោក ក៏បានស្ទង់មតិចំពោះក្រុមហ៊ុនឯកជនដែរកាលពីខែមិថុនា ឆ្នាំ២០២០ ដោយរកឃើញថាក្រុមហ៊ុនទាំងនោះកំពុងជួបការលំបាកផ្នែកសេដ្ឋកិច្ច។ ការស្ទង់មតិនោះ បានបង្ហាញថាក្នុងចំណោមក្រុមហ៊ុន ៥៣៧ ដែលផ្តល់ចម្លើយ មាន១៨ភាគរយដែលបានបិទទ្វារបណ្តោះអាសន្នជាស្ថាពរតែម្តង ដោយសារតែជំងឺកូវីដ១៩។
ធនាគារពិភពលោក បានលើកឡើងថា៖ «ត្រង់នេះបានជះផលប៉ះទង្គិចយ៉ាងអាក្រក់ទៅលើសុខុមាលភាព ជាពិសេសទៅលើជនក្រីក្រនិងក្រុមជនងាយរងគ្រោះបំផុតដែលសឹងតែគ្មានមធ្យោបាយសម្រាប់លៃលកចំពោះស្ថានភាពនេះបានទេ។ អត្រាភាពក្រីក្រនៅកម្ពុជាទំនងជានឹងកើនឡើងវិញដោយសារតែកំណើនសេដ្ឋកិច្ចមានសភាពមិនសូវល្អបន្ថែមដោយការបាត់បង់ការងារ ការធ្លាក់ចុះក្នុងចំណូលគ្រួសារ និងការឡើងថ្លៃទំនិញស្បៀងអាហារផង។»
ធនាគារពិភពលោក បន្ថែមទៀតថា ការថមថយកាន់តែខ្លាំងនូវមូលធនមនុស្សក្នុងស្រុកក៏ជាហានិភ័យមួយទៀតដែរដោយសារសកម្មភាពសិក្សានិងលទ្ធផលនៃការរៀនចេះធ្លាក់ចុះនៅពេលដែលសាលារៀនត្រូវបានបិទទ្វារ។ ភាពមិនប្រាកដប្រជានៅមានច្រើនជុំវិញចក្ខុវិស័យកំណើនសេដ្ឋកិច្ចរបស់កម្ពុជា។
អ្នកនាំពាក្យក្រសួងសេដ្ឋកិច្ចនិងហិរញ្ញវត្ថុ លោក មាស សុខសេនសាន មានប្រសាសន៍ថាលោកទទួលស្គាល់ថា ជំងឺកូវីដ១៩នេះ បានបង្ករឱ្យមានផលប៉ះពាល់ធ្ងន់ធ្ងរលើគ្រប់វិស័យនៅកម្ពុជា លើកលែងតែវិស័យកសិកម្មមួយប៉ុណ្ណោះ។
លោកមាស សុខសេនសាន៖«ជាទូទៅប៉ះទាំងអស់លើគ្រប់វិស័យប៉ុន្តែលើកលែងតែវិស័យកសិកម្មមួយមានកំណើន ហើយវិស័យប៉ះធ្ងន់ជាងគេនឹងគឺវិស័យទេសចរណ៍។»
ទិន្នន័យដែលផ្ដល់ដោយមន្ត្រីក្រសួងផែនការបង្ហាញថា គិតត្រឹមបំណាច់ខែកញ្ញា គ្រួសារប្រជាពលរដ្ឋក្រីក្រប្រមាណជាង២លាននាក់(ចំនួន ២.៦៨៥.៨៤៥នាក់) ឬស្មើ៦សែននាក់ឬស្មើនឹងជាង៦សែនគ្រួសារ( ៦៦៨.៦៨៣គ្រួសារ) បានទទួលសាច់ប្រាក់ឧបត្ថមពីរាជរដ្ឋាភិបាល។
រដ្ឋមន្ត្រីក្រសួងផែនការ លោក ឆាយ ថន មានប្រសាសន៍កាលពីថ្ងៃទី២៨ខែកញ្ញាថា ដោយសារវិបត្តិនៃការរីករាលដាលជំងឺកូវីដ១៩នេះ បានធ្វើឱ្យសេដ្ឋកិច្ចរបស់ពិភពលោក រួមនឹងកម្ពុជា ត្រូវបានធ្លាក់ចុះនិងប៉ះពាល់យ៉ាងខ្លាំងដល់សេដ្ឋកិច្ច ជាពិសេសប្រជាជនក្រីក្រតែម្តង។ នេះបើតាមការចុះផ្សាយរបស់កាសែតរស្មីកម្ពុជាដែលចេញផ្សាយកាលពីថ្ងៃទី២៨ខែកញ្ញា។
អ្នកស្រាវជ្រាវការអភិវឌ្ឍន៍សង្គម លោកបណ្ឌិត មាស នី មានប្រសាសន៍ថា លោកឯកភាពចំពោះ ការអះអាងរបស់ធនាគារពិភពលោកដែលថា អត្រាក្រីក្រនៅកម្ពុជានឹងកើនឡើង។ លោកបញ្ជាក់ថា អ្នកប្រឈមធ្ងន់ធ្ងរជាងគេគឺក្រុមអ្នកបាត់បង់ការងារ និងអ្នកប្រកបរបរក្រៅប្រព័ន្ធ ពិសេសអ្នករកស៊ីលើវិស័យទេសចរណ៍។
ប្រសាសន៍លោកបណ្ឌិត មាស នី មានប្រសាសន៍ថា៖«ជាទិដ្ឋភាពទូទៅបើយើងមើលទៅមិនមែនធ្លាក់តែពលរដ្ឋទេ សូម្បីតែរដ្ឋហ្នឹងក៏ធ្លាក់ចំណូលដែរ ។ យើងគ្រាន់តែមើលភ្នែកទទេក៏ដឹងថាជីវភាពពលរដ្ឋកាន់តែយ៉ាប់ ពិសេសក្រុមអ្នករត់ម៉ូតូឌុប តុកៗឬអ្នកប្រកបរបរក្រៅប្រព័ន្ធជាដើម។ ជារួមខ្ញុំឯកភាពចំពោះការទស្សន៍ទាយរបស់ធនាគារពិភពលោក»។
នារីបម្រើខារ៉ាអូខេ ម្នាក់ឈ្មោះ សេង ស្រីលក្ខណ៍ ថ្លែងប្រាប់វីអូឌីតាមទូរស័ព្ទថា នាងគ្មានការងារធ្វើរយៈពេល៦ខែមកហើយ ដោយសារតែខារ៉ាអូខេដែលនាងធ្វើការបានបិទទ្វារ។ កញ្ញាបញ្ជាក់ថា ជីវភាពរបស់នាងកាន់តែយ៉ាប់យ៉ឺន ខណៈដែលបំណុលរបស់នាងកាន់តែកើនឡើង។
សេង ស្រីលក្ខណ៍ ប្រាប់ថា៖«ពេលអត់ការងារធ្វើនេះ ចាយលុយអស់អត់អីហូបខ្ចីគេថែម អាលូវកាន់តែវ័ណ្ឌកហើយ។ រស់មួយថ្ងៃគិតមួយថ្ងៃហើយពេលនេះ»។
យ៉ាងណាក៏ដោយធនាគារពិភពលោកបានអះអាងក្នុងរបាយការណ៍ថា សកម្មភាពសេដ្ឋកិច្ចផ្ទៃក្នុងរបស់កម្ពុជាបានចាប់ផ្តើមកម្រើកបណ្តើរៗឆ្ពោះទៅរកប្រក្រតីភាពឡើងវិញហើយក្រោយពីមានការសម្រាលលើវិធានការរក្សាគម្លាតសុវត្ថិភាពសង្គម ហើយតម្រូវការក្នុងស្រុករួមមានការធ្វើដំណើរនិងសកម្មភាពទេសចរណ៍ក្នុងស្រុកផងកំពុងតែងើបឡើងវិញ។
ធនាគារពិភពលោកផ្ដល់អនុសាសន៍ឱ្យរាជរដ្ឋាភិបាលកម្ពុជាចាំបាច់ត្រូវសម្រួលដល់ការវិនិយោគក្នុងស្រុកនិងបរទេសដោយបង្កើនតម្លៃបន្ថែមក្នុងស្រុកនិងបង្កើតការងារឱ្យបានច្រើនថែមទៀត។
ប្រមុខរាជរដ្ឋាភិបាលកម្ពុជាកម្ពុជា កាលពីឆ្នាំ២០១៩ ថ្លែងសុន្ទរកថាក្នុងសន្និបាតប្រចាំឆ្នាំ របស់គណៈកម្មការសេដ្ឋកិច្ច និងសង្គមកិច្ចសម្រាប់អាស៊ី និងប៉ាស៊ីហ្វិក នៃអង្គការសហប្រជាជាតិ (UN-ESCAP) ដោយអះអាងថា ភាពក្រីក្រនៅកម្ពុជាកាលពីឆ្នាំ២០១៩ស្ថិតក្នុងរង្វង់១០%ដោយគិតបន្ទាត់ក្រីក្រត្រឹម៤ពាន់៨០០រៀល៕