ឯកអគ្គរាជទូតកម្ពុជាប្រចាំប្រទេសកូរ៉េខាងត្បូង បានឱ្យដឹងថា ប្រទេសកូរ៉េខាងត្បូង នឹងជួយដល់កម្ពុជា លើគម្រោងបង្កើតមជ្ឈមណ្ឌលស្រាវជ្រាវ និងកោសល្យវិច្ច័យបទឧក្រិដ្ឋគ្រប់ប្រភេទ តបតាមសំណើររបស់រដ្ឋាភិបាលកម្ពុជា។
ឯកអគ្គរាជទូតកម្ពុជាប្រចាំនៅប្រទេសកូរ៉េខាងត្បូង លោក ឡុង ឌឺម៉ង់ បានប្រាប់វីអូឌី តាមតេឡេក្រាម (Telegram) នៅថ្ងៃទី៣០ ខែកញ្ញានេះថា គម្រោងបង្កើតមជ្ឈមណ្ឌលស្រាវជ្រាវ និងកោសល្យវិច្ច័យបទឧក្រិដ្ឋគ្រប់ប្រភេទនេះ នឹងផ្តោតសំខាន់លើការបណ្ដុះបណ្ដាលធនធានមនុស្ស ដើម្បីប្រឆាំងនឹងបទឧក្រិដ្ឋកម្មផ្សេងៗនៅកម្ពុជា រាប់ទាំងគ្រឿងញៀន ភេរវកម្ម អ៊ីនធឺណេត និងលាងលុយកខ្វក់ ជាដើម។
លោកបន្តថា ភាគីកូរ៉េខាងត្បូង នឹងជួយកម្ពុជាលើផ្នែកបច្ចេកទេស និងផ្តល់កម្ចីហិរញ្ញប្បទានសម្រាប់ការសាងសង់អគារមជ្ឈមណ្ឌល នៅពេលណាដែលមានសំណើរជាផ្លូវការពីរដ្ឋាភិបាលកម្ពុជា។
លោក ឡុង ឌីម៉ង់ មានប្រសាសន៍ថា៖ «ពេលនោះយើងនឹងអនុវត្តនិតិវិធីក្នុងការស្នើសុំហិរញ្ញប្បទានពីកូរ៉េ ដើម្បីយើងធ្វើការសាងសង់ ហើយកូរ៉េគេនឹងជួយក្នុងការបណ្តុះបណ្តាលទៅដល់ចៅក្រម ទៅដល់ព្រះរាជអាជ្ញា ទៅដល់សមត្ថកិច្ចប៉ូលីស ប៉េអ៊ឹម[កងរាជអាវុធហត្ថ]»។
មន្រ្តីការទូតរូបនេះ បញ្ជាក់បន្ថែមថា មជ្ឈមណ្ឌលនេះ ក៏នឹងដើរតួនាទីសំខាន់ក្នុងការសិក្សា ស្រាវជ្រាវ និងវិភាគលើវត្ថុសំណាកជីវសាស្រ្ត ដូចជា DNA និងមេរោគឆ្លងដូចជាកូវីដ១៩។
VOD មិនអាចសុំការបញ្ជាក់បន្ថែមទាក់ទងនឹងគម្រោងនេះ ពីអ្នកនាំពាក្យក្រសួងយុត្តិធម៌ លោក ជិន ម៉ាលីន និងអ្នកនាំពាក្យក្រសួងមហាផ្ទៃ លោក ខៀវ សុភ័គ បានទេ ដោយមន្រ្តីទាំងពីររូប មិនទាន់ទទួលបានរបាយការណ៍ព័ត៌មាននៅឡើយ។
អ្នកនាំពាក្យអគ្គស្នងការដ្ឋាននគរបាលជាតិ លោក ឆាយ គឹមខឿន លើកឡើងថា បច្ចុប្បន្នសមត្ថកិច្ចកម្ពុជាមានសមត្ថភាពក្នុងការស្រាវជ្រាវលើបទឧក្រិដ្ឋ ប៉ុន្តែខ្វះខាតសម្ភារៈទំនើបៗសម្រាប់បម្រើលើកិច្ចការនេះ។
លោកបានថ្លែងថា៖ «សម្រាប់សមត្ថិភាព គឺពូកែគ្រាន់តែអត់ឧបករណ៍ អត់មន្ទីរពិសោធន៍តែប៉ុណ្ណឹងទេ។ មានហើយតែវាមិនគ្រប់គ្រាន់ ហើយទំនើបដូចប្រទេសគេ»។
នាយកប្រតិបត្តិអង្គការសម្ព័ន្ធគណនេយ្យភាពសង្គម លោក សន ជ័យ គាំទ្រចំពោះការបង្កើតមជ្ឈមណ្ឌលដែលមានប្រតិបត្តិការជាមួយប្រទេសប្រជាធិបតេយ្យ ដូចជា កូរ៉េខាងត្បូង ខណៈដែលប្រទេសនេះ មានការអនុវត្តការបង្ក្រាបបទល្មើសឧក្រិដ្ឋធំៗដោយតម្លាភាព។
លោកបន្ថែមថា បច្ចុប្បន្ន សមត្ថកិច្ចកម្ពុជា ខ្វះខាតសម្ភារបច្ចេកទេសទំនើប ខណៈជំនាញធ្វើកោសល្យវិច្ច័យស្រាវជ្រាវលើបទឧក្រិដ្ឋមួយចំនួននៅមានកម្រិត និងមិនបានគ្រប់ជ្រុងជ្រោយ ដែលធ្វើឱ្យការពិតមិនត្រូវបានលាតត្រដាង ជាពិសេស បទល្មើសកើតឡើងនៅតាមទីជនបទ។
លោក សន ជ័យ មានប្រសាសន៍ថា៖ «ខ្ញុំឃើញករណីខ្លះទៅជាពិសេសអំពើឃាតកម្មនៅឯមូលដ្ឋាន ហាក់បីដូចជាមានការធ្វើកោសល្យវិច្ច័យក្នុងកម្រិតទាប ហើយករណីខ្លះត្រូវបានគេមើលឃើញថា ជាចំណុចចន្លោះប្រហោងដ៏ធំមួយក្នុងការបង្ហាញនូវការពិត»៕