អ្នករាយការណ៍ព័ត៌មានតាមអនឡាញ ៤នាក់ បានរងការវាយប្រហារពីសំណាក់មនុស្សមួយក្រុមនៅក្នុងស្រុកមេមត់កាលពីយប់ឈានចូលថ្ងៃចន្ទកន្លងមកនេះ ក្រោយពីពួកគេរាយការណ៍ពីការដឹកជញ្ជូនឈើនៅក្នុងខេត្តត្បូងឃ្មុំ។
លោក មួក សារ៉ែន ដែលជានិពន្ធនាយករងនៃសារព័ត៌មានអនឡាញចក្រភពព័ត៌មាន បានប្រាប់វីអូឌីកាលពីថ្ងៃម្សិលមិញថា លោក និងអ្នកសារព័ត៌មាន ៣រូបទៀត បានរងការវាយប្រហារពីសំណាក់មនុស្សមួយក្រុមនៅម៉ោង ១២កន្លះយប់ឈានចូលថ្ងៃចន្ទកន្លងមកនេះ អំឡុងពេលពួកលោកឈប់សម្រាកនៅតាមផ្លូវជាតិលេខ៧ ស្ថិតម្ដុំច្រកបឹងជ្រោងនៅក្នុងភូមិដូងទី២ ឃុំត្រមូង ក្នុងស្រុកមេមត់។
លោក សារ៉ែន ប្រាប់ថា លោកបានរងរបួសត្រង់ជើង ហើយអ្នកសារព័ត៌មានមួយរូបទៀត បានរងរបួសត្រង់ផ្នែកខាងក្រោមនៃឆ្អឺងជំនី ក្រោយពីរងការវាយប្រហារពីសំណាក់មនុស្សមួយក្រុមដែលលោកថា បានធ្វើដំណើរតាមរថយន្តស៊ាំងយ៉ុងមកបាំងមុខរថយន្តរបស់លោក។
អ្នកសារព័ត៌មានរូបនេះ ប្រាប់ថា លោកមិនស្គាល់អត្តសញ្ញាណក្រុមមនុស្សទាំងនោះទេ ប៉ុន្តែ បានសង្ស័យថា ពួកគេជាក្រុមឈ្នួញរកស៊ីឈើ ដែលលោកបានរាយការណ៍ពីបទល្មើសដឹកជញ្ជូនឈើនៅក្នុងខេត្តត្បូងឃ្មុំកាលពីថ្ងៃអាទិត្យចុងសប្ដាហ៍កន្លងមក។
លោក មួក សារ៉ែន ប្រាប់ថា៖ «សង្ស័យមួយក្រុមហ្នឹងហើយដែលគុំគួន ព្រោះក្រុមហ្នឹងបានបោះពាក្យសម្ដី មកក្រុមសារព័ត៌មានយើងថា បងឯងប្ដឹងចាប់ឡានខ្ញុំហ្នឹង អត់អីទេយកចុះ បួនប្រាំរយ ហើយវាគំរាមថា ឡានលោកឯងនឹងលើសខ្ញុំរាប់រយដង»។
ក្រៅពីលោក រេន សំណាង ដែលជាអ្នករាយការណ៍ព័ត៌មានឲ្យសារព័ត៌មានអនឡាញភ្នែកម្នាស់ លោក សារ៉ែន ប្រាប់ថា លោកមិនស្គាល់អ្នកសារព័ត៌មាណ២រូបទៀតដែលស្ថិតក្នុងដំណើរជាមួយគ្នានោះឡើយ។
លោក រេន សំណាង បានប្រាប់ថា រូបលោក និងអ្នករាយការណ៍ព័ត៌មានមកពី ៥អង្គភាព បានរាយការណ៍ទៅសមត្ថកិច្ចអំពីរថយន្តមួយគ្រឿងដឹកជញ្ជូនឈើ បន្ទាប់ពីឃើញរថយន្តនោះដូរសំបកកង់នៅស្ថានីយ៍ចំណតរថយន្តផ្សារមេមត់។
លោក សំណាង ប្រាប់បន្តថា រថយន្តដឹកជញ្ជូនឈើនោះ ត្រូវបានកងកម្លាំងអាវុធហត្ថស្រុកមេមត់បង្ក្រាបកាលពៅថ្ងៃទី២៦ ខែកញ្ញា ប៉ុន្តែ លោកថា ម្ចាស់រថយន្តបានគេចចេញពីការបង្ក្រាបរបស់សមត្ថកិច្ច ហើយដើរមកថតស្លាកលេខរថយន្តរបស់ក្រុមអ្នកសារព័ត៌មាន។
លោក រេន សំណាង ប្រាប់ថា៖ «គាត់[ម្ចាស់រថយន្ត]កត់ស្លាកលេខឡាន ហើយគាត់បោះពាក្យសម្ដីថា មិនឲ្យលើសពីមួយអាទិត្យទេ គាត់នឹងធ្វើសកម្មភាពហើយ»។
លោក សារ៉ែន បានឲ្យដឹងថា ក្រោយពីរងការវាយប្រហារបែបនេះ ពួកលោកបានដាក់ពាក្យបណ្ដឹងទៅអធិការដ្ឋាននគរបាលស្រុកមេមត់រួចហើយ ដើម្បីឲ្យជួយស្រាវជ្រាវករណីនេះ។
អធិការនគរបាលស្រុកមេមត់ លោក ហុង គឹមហឿន បានឲ្យដឹងថា សមត្ថកិច្ចកំពុងដំណើរស៊ើបអង្កេតករណីនេះទៅតាមបណ្ដឹងរបស់ក្រុមអ្នកសារព័ត៌មាន។
លោក ហុង គឹមហឿន ប្រាប់ថា៖ «សួរខ្ញុំក៏ខ្ញុំអត់ត្រូវប្រាប់ដែរ តែខ្ញុំបំពេញនីតិវិធីហើយ ព្រោះកិច្ចការកសាងសំណុំរឿងបទល្មើសព្រហ្មទណ្ឌមិនអាចដើរនិយាយបានទេ! ខ្ញុំនិយាយប៉ុណ្ណេះ! តែដំណើរការនីតិវិធីកំពុងតែបន្តបាទ!»។
អ្នកនាំពាក្យក្រសួងព័ត៌មាន លោក មាស សុភ័ណ្ឌ បានប្រាប់វីអូឌីថា ក្រសួងព័ត៌មានបានដឹងពីករណីវាយប្រហារលើក្រុមអ្នកសារព័ត៌មាននេះហើយ ហើយក្រសួងកំពុងធ្វើការជាមួយសមត្ថកិច្ចពាក់ព័ន្ធ។
លោក មាស សុភ័ណ្ឌ និយាយថា៖ «អ៊ីចឹងក្រសួងក៏កំពុងពិនិត្យមើលរឿងហ្នឹងទៅតាមសមត្ថកិច្ចជាមួយសមត្ថកិច្ចក្រសួង សមត្ថកិច្ចដែលកំពុងធ្វើកិច្ចការហ្នឹងដែរ»។
នាយកប្រតិបត្តិសម្ព័ន្ធអ្នកសារព័ត៌មានកម្ពុជា (ខេមបូចា) លោក ណុប វី បានឱ្យដឹងថា ការវាយដុំ និងការធ្វើទុក្ខបុកម្នេញទៅលើអ្នកសារព័ត៌មាន គឺជាសារមួយគំរាមកំហែងដល់បងប្អូនសារព័ត៌មានក្នុងការលើកកម្ពស់នូវតម្លាភាពព័ត៌មាន ព្រមទាំងប្រឆាំងនូវបទល្មើសផ្សេងទៀត។
លោក ណុប វី និយាយថា៖ «នៅពេលដែលមានការវាយដំបង្កអោយមានរបួសស្នាមធ្ងន់ធ្ងរនេះ គឺវាធ្វើអោយមានការភ័យខ្លាចដល់បងប្អូនអ្នកសារព័ត៌មាន មួយទៀតពិសេសគឺបងប្អូនអ្នកសារព័ត៌មានដែល គាត់ហ៊ាននៅក្នុងការចេញមុខធ្វើសេចក្ដីរាយការណ៍ ឬក៏ថតរូបភាព សរសេរព័ត៌មានចំពោះករណីបទល្មើសព្រៃឈើផ្សេងៗដែលកើតមានឡើងនៅក្នុងសង្គមយើងហ្នឹង»៕
