សមត្ថកិច្ចរាជធានីភ្នំពេញ បានចាប់ខ្លួនជនសង្ស័យម្នាក់ ដែលក្លែងបន្លំជាមន្ត្រីនគរបាលជាតិ ពាក់ស័ក្តិ៥ និងបានបញ្ជូនសំណុំរឿងទៅសាលាដំបូងរាជធានីភ្នំពេញ នៅថ្ងៃពុធនេះ។
ស្នងការដ្ឋាននគរបាលរាជធានីភ្នំពេញ បានឱ្យដឹងក្នុងទំព័រហ្វេសប៊ុកនៅថ្ងៃទី៣០ ខែកញ្ញានេះថា បុរសជនសង្ស័យ ដែលក្លែងបន្លំខ្លួនជាសមត្ថកិច្ចនគរបាលជាតិនោះ មានឈ្មោះ ប៉ាង កាក់ទិការ និងដាក់ឈ្មោះលើឯកសណ្ឋាននគរបាលថា សម្បត្តិ សកក្កដា អាយុ២១ឆ្នាំ ជនជាតិខ្មែរ ត្រូវបានសមត្ថកិច្ចការិយាល័យព្រហ្មទណ្ឌកម្រិតស្រាលនៃស្នងការដ្ឋាន ធ្វេីការឃាត់ខ្លួននៅសង្កាត់ទឹកល្អក់២ ខណ្ឌទួលគោក។
ស្នងការដ្ឋាន បន្តថា សមត្ថកិច្ចជំនាញបានរៀបចំឯកសារបញ្ជូនខ្លួនជនសង្ស័យរូបនេះ ទៅតុលាការនៅថ្ងៃនេះ ដេីម្បីបន្តអនុវត្តតាមនីតិវិធីច្បាប់ ដោយចោទប្រកាន់ពីបទ ប្រេីប្រាស់ដោយខុសច្បាប់នូវសម្លៀកបំពាក់ជាអាទិ៍ សម្រាប់អាជ្ញាធរសាធារណ: (ស្លៀកសម្លៀកបំពាក់ឯកសណ្ឋាននគរបាលជាតិ និងកងរាជអាវុធហត្ថ ) ប្រព្រឹត្តនៅរាជធានីភ្នំពេញ តាំងពីឆ្នាំ២០១៩ រហូតដល់បច្ចុប្បន្ន។
ស្នងការដ្ឋាន បានបន្ថែមថា ក្រៅពីការបន្លំខ្លួនធ្វើជាមន្ត្រីនគរបាលជាតិ ជនសង្ស័យរូបនេះ ក៏បានលួចបង្កេីតគណនីហ្វេសបុកក្លែងក្លាយរបស់ស្នងការដ្ឋាននគរបាលរាជធានីភ្នំពេញផងដែរ។
បើតាមស្នងការដ្ឋាននគរបាលរាជធានីភ្នំពេញ វត្ថុតាងដែលសមត្ថកិច្ចបានរឹបអូសបានរួមមាន វិទ្យុទាក់ទងចំនួន ០៥ គ្រឿង, ទូរសព្ទ័ដៃ ០១គ្រឿង, ខ្នោះដៃ ចំនួន ០៣គូ, អាវឈុតមន្ត្រីនគរបាល មានដាក់ឈ្មោះ វ.ទោ សម្បត្តិ សកក្កដា ចំនួន ៣កំផ្លេ និងអាវមន្ត្រីនគរបាលមួយចំនួនទៀត, អាវុធខ្លីជ័រ ពណ៌ខ្មៅ ចំនួន ០១ដើម, ដាវដែកមានស្រោម ចំនួន ០១ដើម, សក្តិថ្នាក់វរសនីយ៍ទោ ចំនួន ០១គូ និងថ្នាក់វរសនីយ៍ឯក ចំនួន ០១គូ រួមនិងសម្ភារៈមួយចំនួនទៀត៕