រដ្ឋាភិបាលសម្រេចបន្តផ្តល់ប្រាក់ឧបត្ថម្ភរយៈពេល៣ខែទៀត ទៅដល់បុគ្គលិកកម្មករក្នុងវិស័យវាយនភណ្ឌកាត់ដេរនិងកម្មករវិស័យទេសចរណ៍ ក្រោយពិនិត្យឃើញថា វិស័យទាំងនេះនៅបន្តរងផលប៉ះពាល់ខ្លាំងដោយសារការរីករាលដាលនៃជំងឺកូវី១៩។
ក្នុងសេចក្តីប្រកាសព័ត៌មានចុះថ្ងៃទី៣០ ខែកញ្ញា រដ្ឋាភិបាលបានលើកឡើងថា វិស័យសំខាន់ៗមួយចំនួនដូចជា វិស័យវាយនភណ្ឌកាត់ដេរ វិស័យទេសចរណ៍ និងវិស័យអាកាសចរណ៍ជាដើម នៅតែរងផលប៉ះពាល់ខ្លាំងជាងគេពីវិបត្តិនៃជំងឺកូវីដ១៩ ដែលបានធ្វើឱ្យពលរដ្ឋនិងកម្មករដែលទទួលបានផលពីវិស័យទាំងនេះក៏ប៉ះពាល់ផងដែរ។
រដ្ឋាភិបាលបញ្ជាក់ថា ដើម្បីជួយសម្រួលដល់វិស័យវាយនភណ្ឌកាត់ដេរនិងវិស័យទេសចរណ៍ រដ្ឋាភិបាលសម្រេចបន្តផ្តល់ប្រាក់ឧបត្ថម្ភ៤០ដុល្លារក្នុងមួយខែសម្រាប់កម្មករម្នាក់នៃវិស័យទាំងពីរនេះរយៈពេល៣ខែទៀត រហូតដល់ដំណាច់ខែធ្នូ ឆ្នាំ២០២០ ហើយថៅកែទទួលបន្ទុកចេញ៣០ដុល្លារ ពោលគឺបុគ្គលិកកម្មករទទួលបាន៧០ដុល្លារក្នុងមួយខែអំឡុងពេលដែលពួកគេព្យួរការងារ។
បើតាមសេចក្តីប្រកាសព័ត៌មានដដែល រដ្ឋាភិបាលក៏បន្តលើកលែងការបង់ពន្ធប្រចាំខែគ្រប់ប្រភេទចំពោះសណ្ឋាគារ ផ្ទះសំណាក់ ភោជនីយដ្ឋាន និងក្រុមហ៊ុនភ្នាក់ងារទេសចរណ៍ដែលចុះបញ្ជីជាមួយអគ្គនាយកដ្ឋានពន្ធដារ និងមានសកម្មភាពអាជីវកម្មសម្រាប់រយៈពេល៣ខែទៀតផងដែរ។
ប្រធានសហភាពការងារកម្ពុជា លោក អាត់ ធន់ បានសាទរចំពោះយន្តការរបស់រដ្ឋាភិបាលដែលសម្រេចបន្តផ្តល់ប្រាក់ឧបត្ថម្ភដល់កម្មករដែលព្យួរការងារ៣ខែទៀតនេះ ប៉ុន្តែលោកក៏សុំឱ្យរដ្ឋាភិបាលពិចារណាផ្តល់ប្រាក់ឧបត្ថម្ភនេះទៅដល់កម្មករក្នុងវិស័យផ្សេងៗទៀតដែលកំពុងរងផលប៉ះពាល់ដោយសារជំងឺកូវីដនោះដែរ។
លោក អាត់ ធន់ ប្រាប់ថា៖ «ហើយអ្វីដែលយើងចង់ឃើញ គឺទី១ ត្រូវធ្វើបច្ចុប្បន្នភាពឬបញ្ជីឱ្យបានច្បាស់លាស់ចំពោះអ្នកអត់ការងារធ្វើឬក៏ព្យួរការងារនៃវិស័យទាំងពីរហ្នឹង និងទី២ គួរតែពង្រីកការផ្តល់ប្រាក់ឧត្ថម្ភនេះទៅវិស័យផ្សេងទៀតដែលគាត់រងគ្រោះដែរ។ ហើយទី៣ ត្រូវបង្កើតការងារឬឱកាសផ្សេង ព្រោះលុយនេះវាតិចតួចពេក ដែលវាមិនអាចធានាការរស់នៅសមរម្យបាន។ យកល្អ! រដ្ឋាភិបាលគួរបន្ថែមឱ្យច្រើនជាងនេះក៏ល្អដែរ»។
អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ ប្រាប់វីអូឌីនៅថ្ងៃព្រហស្បតិ៍នេះថា គិតត្រឹមដំណាច់ខែកញ្ញាកន្លងមកនេះ រដ្ឋាភិបាលផ្ដល់ប្រាក់១៩លានដុល្លារទៅដល់បុគ្គលិកនិងកម្មករដល់ទៅជាង២៨ម៉ឺន(២៨២ ៧៩៥)នាក់ ដែលត្រូវបានព្យួរការងារនៅក្នុងវិស័យកាត់ដេរ។
តួលេខរបស់ក្រសួងការងារ និងបណ្ដុះបណ្ដាលវិជ្ជាជីវៈ បង្ហាញថា គិតត្រឹមថ្ងៃទី១ ខែតុលានេះ រដ្ឋាភិបាលបានផ្ដល់ប្រាក់ឧបត្ថម្ភ៣១លើករួចមកហើយទៅដល់បុគ្គលិកនិងកម្មករចំនួនជាង៤៦ម៉ឺន(៤៦៦ ០៨០)នាក់ ដែលត្រូវបានព្យួរការងារតាមរោងចក្រ សហគ្រាស ឬក្រុមហ៊ុនចំនួន ១ ៦៥៥ នៅក្នុងវិស័យកាត់ដេរនិងទេសចរណ៍។
ប្រធានសមាគមទីភ្នាក់ងារទេសចរណ៍កម្ពុជា អ្នកស្រី ឆាយ ស៊ីវលីន បានឱ្យដឹងថា វិស័យទេសចរណ៍បានទទួលរងផលប៉ះពាល់ខ្លាំងក្រោយពីការផ្ទុះឡើងនិងការរីករាលដាលនៃវីរុសកូរ៉ូណា ដែលនាំឱ្យចំនួនភ្ញៀវទេសចរធ្លាក់ចុះ។
អ្នកស្រី ឆាយ ស៊ីវលីន បន្ថែមថា បញ្ហានេះបានធ្វើឱ្យកម្មករក្នុងវិស័យទេសចរណ៍គ្មានការងារនិងគ្មានថវិកាសម្រាប់ផ្គត់ផ្គង់ជីវភាពគ្រួសារ ខណៈថៅកែក៏មានបញ្ហាសេដ្ឋកិច្ច។
អ្នកស្រី ឆាយ ស៊ីវលីន ប្រាប់ថា៖ «រដ្ឋាភិបាលត្រូវបន្ថែមលើសពី៤០ដុល្លារ ទើបអ្នកជំនាញទេសចរណ៍អាចរស់បាន ហើយការទម្លាក់កម្ចីក្នុងអត្រាការប្រាក់ទាបជាងឯកជនមកឱ្យម្ចាស់សហគ្រាសនៅក្នុងវិស័យទេសចរណ៍នេះ គួរតែធ្វើឱ្យបានឆាប់ ព្រោះយើងជាម្ចាស់សហគ្រាសត្រូវការទុនយកមកបង្វិល និងជួយលើកលែងពន្ធនានាដោយសារយើងកំពុងតែស្ថិតនៅក្នុងស្ថានភាពលំបាក»៕
