ព្រះមហាក្សត្របានចេញព្រះរាជក្រឹត្យត្រាស់បង្គាប់បន្ថយឋានន្តរសក្តិលោក សៀន សុវណ្ណា ចំនួន២ថ្នាក់ ពីឧត្តមសេនីយ៍ឯក(ផ្កាយ៣)មកឧត្តមសេនីយ៍ត្រី(ផ្កាយ១)វិញ។
ព្រះរាជក្រឹត្យព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា នៅថ្ងៃទី៣០ ខែកញ្ញា ឆ្នាំ២០២០នេះ បានត្រាស់បង្គាប់បន្ថយឋានន្តរសក្តិលោកឧត្តមសេនីយ៍ឯក សៀន សុវណ្ណា ចំនួន២ថ្នាក់ មកត្រឹមជាឧត្តមសេនីយ៍ត្រី នៅក្នុងក្របខណ្ឌមន្រ្តីនគរបាលជាតិនៃក្រសួងមហាផ្ទៃ។ ការចេញព្រះរាជក្រឹត្យបន្ថយឋានន្តរសក្តិនេះ បានធ្វើឡើងបន្ទាប់ពីមានសំណើទូលថ្វាយដោយលោកនាយករដ្ឋមន្ត្រី ហ៊ុន សែន។
អ្នកនាំពាក្យអគ្គនាយកដ្ឋានសវនកម្មផ្ទៃក្នុង លោក ជា តារា មានប្រសាសន៍ប្រាប់វីអូឌីថា ការបន្ថយឋានន្តរសក្តិលោក សៀន សុវណ្ណា ដោយសារតែលោកមានកំហុសឆ្គងនឹងវិន័យនគរបាល។
លោកថា៖ «ដោយសារតែតាមក្រុមប្រឹក្សាវិន័យសំណើរបស់អគ្គនាយកដ្ឋានសវនកម្មផ្ទៃក្នុង គឺគាត់បានស្នើសុំបន្ថយឋានន្តរសក្តិ ហើយដកគាត់ពីអគ្គនាយករង ដោយសារគាត់មានកំហុសតាមការស៊ើបអង្កេតរបស់ក្រុមការងារនៃក្រុមប្រឹក្សាវិន័យរបស់អគ្គនាយកដ្ឋានសវនកម្ម អញ្ចឹងទៅគាត់មានការខុសឆ្គងខ្លះទៅនឹងវិន័យកងកម្លាំងវិន័យនគរបាល អ៊ីចឹងហើយក៏តាមការនិងមានបណ្ដឹងខ្លះរបស់សវនដ្ឋាន»។
កាលពីថ្ងៃទី០២ ខែកក្កដា ឆ្នាំ២០២០ លោកនាយករដ្ឋមន្ត្រី ហ៊ុន សែន បានចេញអនុក្រឹត្យបញ្ចប់មុខតំណែងលោក សៀន សុវណ្ណា ពីអគ្គនាយករងនៃអគ្គនាយកដ្ឋានសវនកម្មផ្ទៃក្នុង ក្រសួងមហាផ្ទៃផងដែរ៕