រដ្ឋមន្ត្រីក្រសួងមហាផ្ទៃ បានឱ្យដឹងថា អត្រាគ្រោះថ្នាក់ចរាចរណ៍ផ្លូវគោក ក្នុងរយៈពេល៩ខែឆ្នាំនេះ បានកើតឡើងចំនួន២៤៣០ករណី មានការថយចុះជាង២៣ភាគរយ បើធៀបនឹងរយៈពេលដូចគ្នាកាលពីឆ្នាំមុន។
រដ្ឋមន្ត្រីក្រសួងមហាផ្ទៃ លោកឧបនាយករដ្ឋមន្ត្រី ស ខេង បានលើកឡើងក្នុងទំព័រហ្វេសប៊ុករបស់លោកកាលពីថ្ងៃម្សិលមិញថា តាមរបាយការណ៍ គិតចាប់ពីខែមករាដល់ខែកញ្ញា គ្រោះថ្នាក់ចរាចរណ៍ផ្លូវគោក បានកើតឡើងសរុបចំនួន២៤៣០លើក ថយចុះ៧២៩លើក ស្មើនឹង២៣,០៧% បើធៀបនឹងរយៈពេលដូចគ្នាកាលពីឆ្នាំមុនដែលមានគ្រោះថ្នាក់កើតឡើងដល់ទៅ៣១៥៩លើក។
លោកបានបន្តថា ចំពោះអត្រាអ្នកស្លាប់វិញ ៩ខែឆ្នាំនេះ មានចំនួន១២៥៧នាក់ ថយចុះ២៦៤នាក់ ស្មើ១៧,៣៥% បើធៀបនឹង៩ខែឆ្នាំមុន មានអ្នកស្លាប់ដល់ទៅ១៥២១នាក់។
ចំណែកអ្នករបួសមានចំនួន៣៦៦៣នាក់ ថយចុះ១០៨៨នាក់ ស្មើនឹង២២,៤១% ខណៈ៩ខែឆ្នាំមុនមានដល់ទៅ៤៧២១នាក់។ ជាមួយគ្នានេះដែរ លោក ស ខេង បានអំពាវនាវដល់អ្នកបញ្ជាយានយន្តទាំងអស់ បន្តប្រកាន់ខ្ជាប់នូវស្មារតីបើកបរដោយគោរពច្បាប់ចរាចរណ៍និងប្រុងប្រយ័ត្នគ្រប់ពេលវេលា។
លោកក៏ស្នើដល់ថ្នាក់ដឹកនាំសមត្ថកិច្ចគ្រប់លំដាប់ថ្នាក់ បន្តបំពេញភារកិច្ចក្នុងការរក្សាសុវត្ថិភាពចរាចរណ៍ជូនប្រជាពលរដ្ឋ និងផ្តល់ការលើកទឹកចិត្តដល់មន្ត្រីដោយស្មារតីយកចិត្តទុកដាក់ខ្ពស់។
កាលពីថ្ងៃទី១ ខែឧសភា ឆ្នាំ២០២០ គណៈកម្មាធិការជាតិសុវត្ថិភាពចរាចរណ៍ផ្លូវគោក បានចាប់ផ្តើមយុទ្ធនាការរឹងបន្តឹងការអនុវត្តច្បាប់ចរាចរណ៍ ដោយបន្ថែមទឹកប្រាក់ផាកពិន័យច្រើនជាងមុន ដើម្បីការពារអាយុជីវិតប្រជាពលរដ្ឋ៕
