រដ្ឋាភិបាលកម្ពុជា គ្រោងដាក់សំណើទៅក្រសួងការបរទេសថៃ ស្នើឱ្យបំភ្លឺជុំវិញករណីសណ្ឋាគារមួយរបស់ថៃដែលបានសាងសង់សំណង់ចម្លងតាមរចនាបទប្រាសាទបុរាណខ្មែរ។
សណ្ឋាគារថៃដែលត្រូវបានបណ្តាញសង្គមហ្វេសប៊ុករិះគន់រឿងរៀបចំតាមរចនាបទខ្មែរ ដូចទៅនឹងប្រាសាទបាយ័ន អង្គរ និងបន្ទាយស្រីនោះ មានឈ្មោះថា Le Palais Hotel មានទីតាំងនៅលើកោះផាងហ្គាន ខេត្តស៊ូរ៉ាតថានី ប្រទេសថៃ។
អ្នកនាំពាក្យក្រសួងវប្បធម៌ និងវិចិត្រសិល្បៈកម្ពុជា លោក ឡុងបុណ្ណា ស៊ីរីវត្ថ បានថ្លែងប្រាប់វីអូឌីនៅថ្ងៃសុក្រនេះថា ក្រសួងពាក់ព័ន្ធកម្ពុជា បាននិងកំពុងសិក្សា និងរៀបចំសំណើទៅក្រសួងការបរទេសថៃ ដើម្បីស្នើឱ្យភាគីថៃបំភ្លឺជុំវិញសំណង់សណ្ឋាគារដែលចម្លងតាមរចនាបទប្រាសាទបុរាណខ្មែរនេះ។
លោកបន្តថា ប្រាសាទអង្គរវត្តនិងប្រាសាទមួយចំនួនដែលកម្ពុជាបានចុះបញ្ជីបេតិកភណ្ឌពិភពលោក គឺជាសម្បត្តិមនុស្សជាតិដែលជាកាតព្វកិច្ចរបស់ប្រទេសនានាលើពិភពលោក ជួយអភិរក្សនិងផ្សព្វផ្សាយពីតម្លៃល្អឯកនៃប្រាសាទទាំងនោះ ប៉ុន្តែប្រទេសទាំងនោះគួរបញ្ជាក់ថារចនាបទប្រាសាទទាំងនោះបានមកពីប្រទេសកម្ពុជា។
លោក ស៊ីរីវត្ថ ថ្លែងថា៖ «ករណីនេះមិនមែនជារឿងខុសច្បាប់ទេ តែកុំឱ្យធ្វើអ្វីមួយ យករបស់ហ្នឹងទៅធ្វើឱ្យមានភាពអាប់ឱន អាហ្នឹងទទួលយកអត់បានទេ នេះជាតម្លៃសកលដែលប្រទេសនានាលើពិភពលោក ត្រូវការចូលរួមគ្នាថែរក្សា បើនេះជាតម្លៃសកល គាត់យកទៅផ្សព្វផ្សាយគឺត្រូវហើយ តែបើគាត់យកសាងសង់ហើយ ត្រូវដាក់ថា រចនាបទនេះយកពីប្រទេសកម្ពុជាផង»។
អ្នកនាំពាក្យក្រសួងទេសចរណ៍កម្ពុជា លោក តុប សុភ័ក មានប្រសាសន៍ថា ពាក់ព័ន្ធនឹងករណីនេះ ក្រសួងទេសចរណ៍និងក្រសួងពាក់ព័ន្ធ បានពិភាក្សាគ្នានិងសិក្សារឿងផ្លូវច្បាប់ដែរ ដោយភាគីកម្ពុជាបានស្នើទៅភាគីថៃឱ្យឆ្លើយតបនិងបកស្រាយ។
តែយ៉ាងណា លោកថា បើផ្អែកតាមបរិបទទេសចរណ៍ ការសាងសង់នេះមិនខុសច្បាប់នោះទេ ប្រសិនបើសណ្ឋាគារថៃនោះបានបញ្ជាក់ថា ជារចនាបទប្រាសាទណាមួយរបស់កម្ពុជា ព្រោះប្រទេសណាក៏អាចសាងសង់បានដែរ ឱ្យតែមានបញ្ជាក់អត្តសញ្ញាណប្រទេសជាម្ចាស់សាម៉ីឱ្យបានត្រឹមត្រូវ។
លោកថ្លែងដូច្នេះថា៖ «អ្វីដែលសំខាន់ គឺការដាក់ឈ្មោះនិងរចនាដាក់កុំឱ្យច្រឡំគ្នា ព្រោះម្នាក់ៗមានអត្តសញ្ញាណរៀងៗខ្លួន។ ហើយឥលូវយើងកំពុងមើលរឿងនេះ ប្រសិនឱ្យរកឫសគល់ដើមហេតុ […] ដោយយើងទទួលបានព័ត៌មាននេះហើយ ដោយយើងកំពុងរកដើមហេតុថា ចេញពីប្រភពណាឱ្យច្បាស់លាស់»។
ចំណែកអ្នកនាំពាក្យអាជ្ញាធរជាតិអប្សរា លោក ឡុង កុសល បានប្រាប់វីអូឌីនៅព្រឹកនេះថា នៅពេលនេះ អ្នកផ្នែកច្បាប់និងក្រុមការងារពាក់ព័ន្ធផ្សេងៗទៀត កំពុងធ្វើកិច្ចការងារនេះជាបន្តបន្ទាប់ តែសម្រាប់ព័ត៌មានជាក់លាក់លើសពីនេះ លោកមិនទាន់អាចជម្រាបបាននៅឡើយទេ។
លោកថា៖ «ខ្ញុំមិនទាន់បានដឹងដែរ […] តែក្រុមការងារជំនាញរបស់យើងមិនធ្វេសប្រហែសទេ ព្រោះយើងទើបទទួលបានព័ត៌មានដូចបងប្អូនយើងបានឃើញអ៊ីចឹងដែរ អ្វីដែលយើងរកមើលគឺផ្នែកច្បាប់សិន»។
ជាមួយគ្នានេះដែរ ប្រធានគណបក្សខ្មែរក្រោក លោក សុខ សុវណ្ណវឌ្ឍនាសារពង្ស ហៅ William Guang បានលើកឡើងក្នុងទំព័រហ្វេសប៊ុករបស់លោកថា សណ្ឋាគារមួយនៅប្រទេសថៃ ឈ្មោះ Le Palais Hotel បានចម្លងទាំងស្រុងនូវរចនាបទប្រាសាទបាយ័ន អង្គរ និងបន្ទាយស្រីរបស់ខ្មែរ។
លោកបន្តថា៖ «ខ្ញុំសង្ឃឹមថា មានការចាត់វិធានការលើសណ្ឋាគារនេះ ព្រោះវាបង្កការយល់ច្រឡំធំណាស់ទៅកាន់សកលលោក»។
វីអូឌី មិនទាន់អាចសុំការឆ្លើយតបជុំវិញករណីនេះពីស្ថានទូតថៃប្រចាំប្រទេសកម្ពុជា និងអ្នកគ្រប់គ្រងសណ្ឋាគារ Le Palais Hotel បាននៅឡើយទេ នៅថ្ងៃនេះ។
សូមជម្រាបថា រដ្ឋាភិបាលកម្ពុជា នាពេលកន្លងមក បានផ្តល់សិទ្ធិក្នុងការផលិតរូបចម្លាក់ប្រាសាទព្រះវិហារដែលជាបេតិកភណ្ឌពិភពលោក និងរូបប្រាសាទអង្គរវត្ត នៅក្នុងសួនទេសចរណ៍អាស៊ាន ស្ថិតនៅក្នុងទីក្រុងណាននីង ខេត្តក្វាងស៊ី ប្រទេសចិន និងប្រទេសអេស្បាញផងដែរ ខណៈដែលប្រទេសនេះបានដាក់អត្តសញ្ញាណប្រាសាទទាំងនោះថា មកពីប្រទេសកម្ពុជា៕
