រដ្ឋាភិបាលអាល្លឺម៉ង់ប្រកាសផ្តល់ហិរញ្ញប្បទានឥតសំណងចំនួន៧លានអឺរ៉ូដល់រដ្ឋាភិបាលកម្ពុជា សម្រាប់ឆ្លើយតបជាបន្ទាន់ទៅនឹងផលប៉ះពាល់នៃជំងឺកូវីដ១៩។
ការប្រកាសនេះបានធ្វើឡើងនៅក្នុងកិច្ចពិគ្រោះយោបល់រវាងរដ្ឋាភិបាលកម្ពុជានិងអាល្លឺម៉ង់នៅថ្ងៃទី៣០ ខែកញ្ញា នៅទីស្តីការក្រុមប្រឹក្សាអភិវឌ្ឍន៍កម្ពុជា (CDC) រាជធានីភ្នំពេញ។
ស្ថានទូតអាល្លឺម៉ង់ប្រចាំនៅកម្ពុជា បានលើកឡើងនៅក្នុងទំព័រហ្វេសប៊ុករបស់ខ្លួនកាលពីថ្ងៃព្រហស្បតិ៍ម្សិលមិញថា ការផ្តល់ហិរញ្ញប្បទានចំនួន៧លានអឺរ៉ូពីសំណាក់ប្រទេសអាល្លឺម៉ង់នេះ នឹងប្រើប្រាស់សម្រាប់កម្មវិធីអត្តសញ្ញាណកម្មគ្រួសារក្រីក្រ (IDPoor) ជាពិសេស ការផ្ទេរសាច់ប្រាក់របស់រដ្ឋាភិបាលកម្ពុជាដល់ជនក្រីក្រចំនួន៦លានអឺរ៉ូ និងប្រើប្រាស់ក្នុងការគាំទ្រដល់ក្រសួងសុខាភិបាលជាជំនួយបច្ចេកទេសចំនួន១លានអឺរ៉ូ។
ស្ថានទូតបញ្ជាក់ថា៖ «ថវិកាទាំងនេះនឹងត្រូវប្រើប្រាស់សម្រាប់យុទ្ធនាការលើកកម្ពស់ការយល់ដឹងវិធានការអនាម័យ ការបង្កើតមន្ទីរពិសោធន៍បង្អែកទី២ និងសម្រាប់ការព្យាបាលបន្ទាន់»។
បើតាមស្ថានទូតអាល្លឺម៉ង់ វិធានការទាំងពីរនេះនឹងត្រូវអនុវត្តដោយកម្មវិធីកិច្ចសហប្រតិបត្តិការកម្ពុជានិងអាល្លឺម៉ង់ដែលមានស្រាប់ តាមរយៈទីភ្នាក់ងារកិច្ចសហប្រតិបត្តិការអាល្លឺម៉ង់ (GIZ)។
សេចក្តីថ្លែងការណ៍រួមរវាងក្រុមប្រឹក្សាអភិវឌ្ឍន៍កម្ពុជានិងស្ថានទូតអាល្លឺម៉ង់ប្រចាំនៅកម្ពុជា បានបញ្ជាក់ដែរថា ហិរញ្ញប្បទានឥតសំណងប្រមាណ៧លានអឺរ៉ូពីសំណាក់ប្រទេសអាល្លឺម៉ង់នេះ ជាការផ្តល់បន្ថែមលើការផ្តល់ហិរញ្ញប្បទានចំនួន២,៥លានអឺរ៉ូ កាលពីខែមីនានិងខែមិថុនា ឆ្នាំ២០២០កន្លងទៅ ដើម្បីរួមចំណែកគាំទ្រដល់វិធានការឆ្លើយតបបន្ទាន់ទៅនឹងផលប៉ះពាល់ជំងឺកូវីដ១៩ និងវិធានការស្តារសេដ្ឋកិច្ចរបស់រដ្ឋាភិបាលកម្ពុជា៕