រដ្ឋាភិបាលបានទម្លាក់ថវិកាជាង១២លានដុល្លារដែលជាប្រាក់កម្ចីរបស់ធនាគារអភិវឌ្ឍន៍អាស៊ី សម្រាប់អនុវត្តគម្រោងសាងសង់ប្រព័ន្ធរំដោះទឹកភ្លៀង ទឹកកខ្វក់ និងអាងប្រព្រឹត្តកម្ម ក្នុងក្រុងស្ទឹងសែន ខេត្តកំពង់ធំ។
រដ្ឋបាលខេត្តកំពង់ធំ បានឱ្យដឹងតាមទំព័រហ្វេសប៊ុកកាលពីថ្ងៃម្សិលមិញថា គម្រោងសាងសង់ប្រព័ន្ធរំដោះទឹកភ្លៀង ទឹកកខ្វក់ និងអាងប្រព្រឹត្តកម្មនេះ មានរយៈពេល៣ឆ្នាំ ចាប់ពីខែកក្កដា ឆ្នាំ២០២០ ដល់ខែកក្កដា ឆ្នាំ២០២៣ ក្នុងរង្វង់ទឹកប្រាក់ចំនួន ១២ ៧៦១ ៩០៧,៥៤ លានដុល្លារ ស្ថិតនៅសង្កាត់ដំរីជាន់ខ្លា ក្រុងស្ទឹងសែន ដែលទទួលសាងសង់ដោយក្រុមហ៊ុនចិន China First metallurgical Group Ltd. ។
ថ្លែងក្នុងពិធីបើកការដ្ឋានសាងសង់កាលពីថ្ងៃម្សិលមិញ លោក សុខ លូ អភិបាលខេត្តកំពង់ធំ មានប្រសាសន៍ថា គម្រោងសាងសង់នេះ បែងចែកជា២អនុគម្រោង រួមមាន គម្រោងទី១ ការសាងសង់ប្រព័ន្ធប្រព្រឹត្តកម្មទឹកកខ្វក់ ដែលមានសមត្ថភាពច្រោះបានប្រមាណ២ ៥០០ម៉ែត្រគូបក្នុង១ថ្ងៃ ជាមួយបំពង់លូទឹកស្អុយប្រវែងប្រមាណ៣៩,២គីឡូម៉ែត និងបណ្តាញលូបង្ហូរទឹកប្រវែងប្រមាណ១៧,១គីឡូម៉ែត។ ចំណែកគម្រោងទី២ ជាការសាងសង់ទីលានចាក់សំរាមដែលអាចផ្ទុកបរិមាណសំរាមបានប្រមាណ៤៨ ០០០ម៉ែត្រគូប រួមជាមួយការបំពាក់រថយន្តប្រមូលសំរាមនិងការទុកដាក់កាកសំណល់។
លោក សុខ លូ បានបញ្ជាក់ថា៖ «ពិតជាមានសំណាងណាស់ដែលទទួលបានគម្រោងនេះ សម្រាប់បងប្អូនអ្នករស់នៅក្នុងខេត្តកំពង់ធំ ដែលកំពុងជួបការលំបាកនៅពេលមានភ្លៀងធ្លាក់ម្តងៗ ធ្វើឱ្យមានការទឹកជនលិចផ្លូវ ដោយសារប្រព័ន្ធលូបង្ហូរទឹកស្អុយតូចចង្អៀតនិងចាស់ទ្រុឌទ្រោម ហើយប្រព័ន្ធលូមួយចំនួនមិនទាន់ត្រឹមត្រូវតាមស្តង់ដារនោះទេ»។
អភិបាលខេត្តរូបនេះក៏បានស្នើដល់អាជ្ញាធរពាក់ព័ន្ធនិងក្រុមហ៊ុនសាងសង់ ត្រូវអនុវត្តការសាងសង់ប្រកបដោយស្តង់ដារបច្ចេកទេស និងពន្លឿនការសាងសង់ឱ្យបានឆាប់ និងបានអំពាវនាវដល់ប្រជាពលរដ្ឋចូលរួមសហការ ដើម្បីឱ្យដំណើរការសាងសង់ប្រព្រឹត្តទៅដោយរលូននិងតាមការគ្រោងទុក៕
