ក្រុមយុវជនទាមទារសិទ្ធិសេរីភាពនៅដែនដីហុងកុង ចាត់ទុកថ្ងៃបង្កើតឡើងនៃសាធារណរដ្ឋប្រជាមានិតចិន គឺជាថ្ងៃដែលហុងកុងស្លាប់ ខណៈសមត្ថកិច្ចបង្កើនការស្វែងរកនិងចាប់ខ្លួនក្រុមយុវជនដែលតវ៉ាទាមទារសេរីភាព។
នគរបាលប្រឆាំងកុបកម្មហុងកុង បានដើរល្បាតតាមផ្លូវ ហាមឃាត់ការហែក្បួនប្រឆាំងនឹងរដ្ឋាភិបាល និងបានចាប់ខ្លួនមនុស្សរាប់សិបនាក់កាលពីថ្ងៃព្រហស្បតិ៍ម្សិលមិញ ខណៈមេដឹកនាំដែនដីហុងកុង លោកស្រី Carrie Lam បានសាទរថ្ងៃបុណ្យជាតិចិន គឺថ្ងៃបង្កើតឡើងសាធារណរដ្ឋប្រជាមានិតចិននៅថ្ងៃនេះ។
សមត្ថកិច្ចបានផ្សព្វផ្សាយសារនៅលើបណ្តាញសង្គមហ្វេសប៊ុកថា ពួកគេកំពុងតែស្វែងរកបុរសពីរនាក់ទៀតដែលពាក់ព័ន្ធការចោទថា បានទម្លាក់គ្រាប់បែកនៅលើផ្លូវក្នុងគោលបំណងបង្កចលាចល នាំឱ្យមានការកកស្ទះផ្លូវធ្វើដំណើរក្នុងទីក្រុង។
ក្រុមអ្នកតវ៉ាមានបំណងរៀបចំការប្រមូលផ្តុំសារជាថ្មី ដើម្បីប្រឆាំងច្បាប់សន្តិសុខជាតិដែលពួកគេចោទថា ចិនរៀបចំឡើងដើម្បីកៀបសង្កត់លើហុងកុង។ ការតវ៉ាក៏ភ្ជាប់គោលបំណងក្នុងការទាមទារឱ្យដោះលែងគ្នារបស់ពួកគេ១២នាក់ឱ្យមានសេរីភាពវិញ និងទាមទារឱ្យដែនដីហុងកុងក្លាយទៅជាដែនដីមានសេរីភាពពីចិនដូចនៅតៃវ៉ាន់។
សមត្ថកិច្ចចេញបម្រាមហាមការប្រមូលផ្តុំតវ៉ា ដោយបញ្ជាក់ហេតុផលថា ដើម្បីកុំឱ្យមានការឆ្លងមេរោគកូវីដ១៩និងការពារកុំឱ្យមានអំពើហិង្សា។ អ្នកដើរផ្សារទិញអីវ៉ាន់និងអ្នកដំណើរតាមផ្លូវនៅតែជជែកគ្នាពីការគាំទ្រលើក្រុមអ្នកតវ៉ាដើម្បីទាមទារឱ្យមានការគ្រប់គ្រងតាមបែបប្រជាធិបតេយ្យ ប៉ុន្តែនៅមិនទាន់មានសញ្ញាបង្ហាញពីការប្រមូលផ្តុំជាទ្រង់ទ្រាយធំអ្វីនោះទេ។
ស្ត្រីឈ្មោះ Jay ជាសមាជិកក្រុមអ្នកតវ៉ាដើម្បីប្រជាធិបតេយ្យម្នាក់ ថ្លែងប្រាប់រ៉យទ័រថា ថ្ងៃទិវាជាតិបង្កើតសាធារណរដ្ឋប្រជាមានិតចិន គឺថ្ងៃដែលហុងកុងស្លាប់។ អ្នកស្រីបញ្ជាក់ថា ពេលនេះប្រជាជនហុងកុងទទួលរងការកៀបសង្កត់ខ្លាំង ប៉ុន្តែពួកគាត់ប្តេជ្ញាតស៊ូតវ៉ាទាមទារសិទ្ធិសេរីភាព។
នៅព្រឹកនេះ លោកស្រី Lam បានចូលរួមជាមួយថ្នាក់ដឹកនាំជាន់ខ្ពស់ផ្សេងទៀតជាមន្ត្រីនៅហុងកុង និងមន្ត្រីចិនប៉េកាំង បានចូលរួមបង្ហូតទង់ជាតិនៅក្នុងទីតាំងដែលមានការរៀបចំដោយកម្លាំងនគរបាលនិងសន្តិសុខការពារសុវត្ថិភាពតឹងរ៉ឹង។
លោកស្រី Lam ថ្លែងថា ក្នុងរយៈពេល៣ខែកន្លងទៅនេះ គឺរដ្ឋាភិបាលប្រឹងប្រែងរៀបចំសន្តិសុខសណ្តាប់ធ្នាប់ឡើងវិញ ហើយប្រជាពលរដ្ឋអាចរីករាយជាមួយសិទ្ធិនិងសេរីភាពជាមូលដ្ឋានរបស់ពួកគេឡើងវិញ៕