ក្រសួងមហាផ្ទៃ ណែនាំដល់អភិបាលរាជធានី-ខេត្តទាំងអស់ ពង្រឹងការអនុវត្តតួនាទីភារកិច្ចស្មៀនឃុំ-សង្កាត់ ក្នុងដំណើរការពិនិត្យបញ្ជីឈ្មោះនិងការចុះឈ្មោះបោះឆ្នោតឆ្នាំ២០២០ ដើម្បីឱ្យដំណើរការនេះប្រព្រឹត្តទៅដោយជោគជ័យតាមផែនការកំណត់។
ក្នុងលិខិតរបស់អគ្គនាយកនៃអគ្គនាយកដ្ឋានរដ្ឋបាលនៃក្រសួងមហាផ្ទៃ លោក ប្រាក់ សំអឿន ផ្ញើជូនអភិបាលរាជធានី-ខេត្ត នៅថ្ងៃទី០២ ខែតុលា ឆ្នាំ២០២០ បានលើកឡើងថា យោងតាមប្រតិទិន ការពិនិត្យឈ្មោះនិងចុះឈ្មោះបោះឆ្នោតនឹងប្រព្រឹត្តទៅចាប់ពីថ្ងៃទី១ ដល់ថ្ងៃទី១៩ ខែតុលា ឆ្នាំ២០២០នេះ។
លោកបន្តថា ដើម្បីឱ្យដំណើរការពិនិត្យនិងចុះឈ្មោះបោះឆ្នោតប្រព្រឹត្តទៅបានលទ្ធផលជោគជ័យតាមផែនការដែលបានកំណត់ ក្រសួងស្នើដល់អភិបាលរាជធានី-ខេត្ត ត្រូវធ្វើការត្រួតពិនិត្យនិងពង្រឹងតួនាទីរបស់ស្មៀនឃុំ-សង្កាត់នីមួយៗ ដោយជំរុញឱ្យពួកគាត់យកចិត្តទុកដាក់អនុវត្តការងាររបស់ខ្លួននិងត្រូវមានវត្តមានជាប្រចាំនៅក្នុងឃុំសង្កាត់រៀងៗខ្លួន លើកលែងតែមានធុរៈចាំបាច់បំផុតឬមានបញ្ហាសុខភាពដែលមិនអាចបំពេញការងារបាន។
លោកបានគូសបញ្ជាក់ថា៖ «ករណីស្មៀនឃុំ-សង្កាត់អវត្តមាន មិនអាចបំពេញការងារបាន សាម៉ីខ្លួនត្រូវរាយការណ៍ជូនមេឃុំ-ចៅសង្កាត់ និងត្រូវស្នើសុំច្បាប់ឈប់សម្រាកតាមគោលការណ៍បែបបទ និងនីតិវិធីដែលបានកំណត់ ហើយអភិបាលក្រុង-ស្រុក-ខណ្ឌ ត្រូវសម្របសម្រួលនិងចាត់តាំងមន្ត្រីនៃរដ្ឋបាលក្រុង-ស្រុក-ខណ្ឌ ១រូប ដើម្បីជួយបំពេញការងារក្នុងការពិនិត្យបញ្ជីឈ្មោះនិងចុះឈ្មោះបោះឆ្នោតឆ្នាំ២០២០ ជំនួសស្មៀនឃុំ-សង្កាត់ដែលអវត្តមានឬមិនទាន់មានស្មៀនឃុំ-សង្កាត់ ដើម្បីធានានិរន្តរភាពការងារនេះ»។
សេចក្តីប្រកាសព័ត៌មានរបស់គណៈកម្មាធិការជាតិរៀបចំការបោះឆ្នោត (គជប) កាលពីថ្ងៃទី១ ខែតុលា បានឱ្យដឹងថា យោងតាមស្ថិតិប្រជាពលរដ្ឋនិងចំនួនការិយាល័យបោះឆ្នោតប៉ាន់ស្មាន គជប មានផែនការចុះឈ្មោះអ្នកបោះឆ្នោតថ្មីចំនួន៣០០ ៣៥០នាក់ និងលុបឈ្មោះចេញពីបញ្ជីបោះឆ្នោតចំនួន១២៣ ២៥១នាក់ ខណៈការិយាល័យបោះឆ្នោតមានចំនួន ២៣ ៤១៨ការិយាល័យ។
គជប ក៏បានអំពាវនាវដល់ប្រជាពលរដ្ឋខ្មែរទាំងអស់ដែលមិនទាន់បានចុះឈ្មោះបោះឆ្នោត ទៅចុះឈ្មោះបោះឆ្នោតនៅតាមសាលាឃុំ-សង្កាត់ឱ្យបានគ្រប់ៗគ្នា៕
