ស្រ្តីជនជាតិទំពូនម្នាក់ នៅស្រុកអណ្តូងមាស ខេត្តរតនគិរី មានអាការពុលអាហារនិងបានស្លាប់ ក្រោយពីបានយកសត្វគីង្គក់ទៅធ្វើជាម្ហូបសម្រាប់ទទួលទាន។
អធិការនគរបាលស្រុកអណ្ដូងមាស លោក សោម ចាន់ដារ៉ា ប្រាប់វីអូឌីនៅថ្ងៃសុក្រនេះថា ជនរងគ្រោះដែលបានស្លាប់ ឈ្មោះ រចំ យូង អាយុ៤៥ឆ្នាំ ជាជនជាតិទំពូន រស់នៅភូមិកាតែ ឃុំម៉ាលិក ស្រុកអណ្តូងមាស ខេត្តរតនគិរី។
លោកបន្តថា មុនពេលកើតហេតុ ស្ត្រីរូបនោះបានចាប់យកសត្វគីង្គក់ទៅធ្វើម្ហូបសម្រាប់ទទួលទានតែម្នាក់ឯង ខណៈបងប្អូនទៅចម្ការអស់ ហើយក្រោយមកក៏មានអាការក្អួតចង្អោរ រាករូស និងបែកពពុះមាត់ រហូតបណ្តាលឱ្យស្លាប់បាត់បង់ជីវិតតែម្តង។
អធិការស្រុករូបនេះបញ្ជាក់ថា៖ «តាមការធ្វើកោសលវិច័យលើសពជនរងគ្រោះយ៉ាងល្អិតល្អន់ ក្រុមអ្នកឯកទេសសន្មតថា ជនរងគ្រោះពិតជាបានពុលអាហារមែន ព្រោះពុំមានស្លាកស្នាមអ្វីលើរាងកាយទេ»។
កាលពីខែមេសា ឆ្នាំ២០១៥ ក៏ធ្លាប់មានករណីបុរសជនជាតិពូនងម្នាក់ រស់នៅភូមិពូតាង ឃុំពូជ្រៃ ស្រុកពេជ្រាដា ខេត្តមណ្ឌលគិរី បានស្លាប់ដោយសារពុលម្ហូបដែលធ្វើពីសត្វគីង្គក់នេះផងដែរ៕