មន្ទីរសុខាភិបាលខេត្តបន្ទាយមានជ័យអំពាវនាវឱ្យពលរដ្ឋបង្កើនការប្រុងប្រយ័ត្ន បន្ទាប់ពីក្មេងប្រុសម្នាក់មានរោគសញ្ញាឆ្កែឆ្កួតធ្ងន់ធ្ងរ ហើយសមាជិកគ្រួសារ៦នាក់ផ្សេងទៀតត្រូវបញ្ជូនទៅចាក់វ៉ាក់សាំងដោយបារម្ភខ្លាចមានមេរោគប្រភេទនេះដែរ។
ក្មេងប្រុសម្នាក់នៅខេត្តបន្ទាយមានជ័យ ត្រូវបានគ្រូពេទ្យពិនិត្យឃើញមានរោគសញ្ញាជំងឺឆ្កែឆ្កួតកម្រិតធ្ងន់ធ្ងរ ក្រោយពីឆ្កែខាំប្រហែល២០ថ្ងៃ ហើយមិនបានទៅព្យាបាលឲ្យបានទាន់ពេលវេលា។
ក្នុងគេហទំព័ររបស់អគ្គស្នងការនគរបាលជាតិ បានឲ្យដឹងនៅថ្ងៃសៅរិ៍ម្សិលមិញថា ក្មេងប្រុសម្នាក់ឈ្មោះ គួយ រក្ស រស់នៅជាមួយឪពុកម្តាយនៅភូមិសន្តិភាព ឃុំទួលពង្រ ស្រុកម៉ាឡៃ។ ក្មេងប្រុសរូបនោះ ត្រូវបានឆ្កែខាំរយៈពេល ប្រហែល២០ថ្ងៃកន្លងមក ទើបសាច់ញាតិបញ្ជូនទៅមន្ទីរពេទ្យខេត្តមិត្តភាពកម្ពុជា-ជប៉ុន មង្គលបូរី ដើម្បីពិនិត្យសុខភាព។ ក្រោយមកក្រុមគ្រូពេទ្យបានពិនិត្យឃើញមានរោគសញ្ញាជំងឺឆ្កែឆ្កួតកម្រិតធ្ងន់ធ្ងរ។
ចំណែក មនុស្ស៦នាក់ផ្សេងទៀត ដែលជាសមាជិកគ្រួសាររបស់ក្មេងប្រុសនោះ និងធ្លាប់ប៉ះពាល់ជាមួយសត្វឆ្កែនោះ ត្រូវបានគ្រូពេទ្យបញ្ជូនទៅចាក់វ៉ាក់សំាំងការពារជំងឺឆ្កែឆ្កួត នៅវិទ្យាស្ថានប៉ាស្ទ័រសាខាបាត់ដំបងផងដែរ ។
គេហទំព័រដដែលបញ្ជាក់ថា មន្ទីរសុខាភិបាលខេត្តបន្ទាយមានជ័យ បានអំពាវដល់ប្រជាពលរដ្ឋ ដែលមានសត្វឆ្កែចិញ្ចឹម ត្រូវយកទៅចាក់វ៉ាក់សាំងសត្វ ហើយចងខ្សែចិញ្ចឹម ឲ្យបានត្រឹមត្រូវ ។ ម្យ៉ាងទៀត បើសិនជាមាន ឆ្កែ ឆ្មាខាំ ត្រូវទៅទទួលការពិគ្រោះ ឬ ចាក់វ៉ាក់សាំងឲ្យបានទាន់ពេលវេលានៅមន្ទីរពេទ្យ តាមការណែនាំរបស់គ្រូពេទ្យ ៕
