ក្រសួងសុខាភិបាលបានឲ្យដឹងថា គ្រូពេទ្យបានយកវត្ថុសំណាកមនុស្សម្នាក់ បញ្ជូនពីមន្ទីរពិសោធន៌នៃមន្ទីរពេទ្យខេត្តសៀមរាប ពាក់កណ្តាលយប់មិញ មកធ្វើការបញ្ជាក់នូវភាពអាចវិជ្ជមាន វីរុសកូវីដ-១៩ នៅវិទ្យាស្ថានប៉ាស្ទ័រកម្ពុជា រាជធានីភ្នំពេញ។
សេចក្តីជូនព័ត៌មានរបស់ក្រសួងសុខាភិបាល បានលើកឡើងនៅថ្ងៃនេះថា កាលពីថ្ងៃទី០៣ ខែតុលា ម្សិលមិញ មិនមានករណីវិជ្ជមានវីរុសកូវីដ-១៩ និងមិនមានអ្នកជាសះស្បើយនោះទេ។ ប៉ុន្តែ មានករណី ចំនួន០១នាក់ ដែលក្រុមគ្រួពេទ្យយកវត្ថុកំណាករបស់គាត់ បញ្ជូនពីមន្ទីរពិសោធន៌នៃមន្ទីរពេទ្យខេត្តសៀមរាប ពាក់កណ្តាលយប់មិញ មកធ្វើការបញ្ជាក់នូវភាពអាចវិជ្ជមាន វីរុសកូវីដ-១៩ នៅវិទ្យាស្ថានប៉ាស្ទ័រកម្ពុជា រាជធានីភ្នំពេញ ដែលក្រសួងសុខាភិបាល មិនទាន់អាចរាប់បញ្ចូលក្នុងចំនួនអ្នកមានវីរុសកូវីដ-១៩ នៅ ថ្ងៃទី០៣ ខែតុលា ឆ្នាំ២០២០ បាននៅឡើយ ដោយរងចាំលទ្ធផលនៃការបញ្ជាក់ភាពវិជ្ជមានវីរុសកូវីដ-១៩នៅថ្ងៃនេះសិន។
សេចក្តីប្រកាសដដែលបញ្ជាក់ថា ក្រសួងនឹងជូនព័ត៌មានដល់សាធារណជន នៅពេលបានទទួលលទ្ធផលច្បាស់លាស់។
បើតាមក្រសួងសុខាភិបាល គិតមកដល់ម៉ោង ៧ព្រឹក ថ្ងៃទី៤ ខែតុលា ឆ្នាំ២០២០នេះ កម្ពុជា បានរកឃើញអ្នកឆ្លងជំងឺកូវីដ១៩ សរុបចំនួន ២៧៨នាក់ ក្នុងនោះបានព្យាបាលជាសះស្បើយចំនួន ២៧៥នាក់ និងកំពុងសម្រាកព្យាបាលនៅមន្ទីរពេទ្យខេត្តសៀមរាប១នាក់ និងមន្ទីរពេទ្យបង្អែកខេត្តបាត់ដំបង់ចំនួន១នាក់៕
