តំណាងកម្មករប្រមូលសំរាម បានឱ្យដឹងថា សំរាមដល់ទៅជាង១ម៉ឺនតោន មិនត្រូវបានប្រមូលយកពីតាមគេហដ្ឋាននោះឡើយ បន្ទាប់ពីក្រុមកម្មករផ្ទុះការតវ៉ាចាប់តាំងពីថ្ងៃសៅរ៍សប្ដាហ៍មុន។
ប្រធានសហជីពកម្មករវិស័យទេសចរណ៍ប្រចាំនៅក្រុមហ៊ុនស៊ិនទ្រី លោក កៅ សុខវ៉ាត បានឱ្យដឹងថា ក្រុមកម្មករប្រមូលសំរាមជាង១ពាន់នាក់ បានបន្តការតវ៉ារបស់ពួកគេរយៈពេល៣ថ្ងៃជាប់ៗគ្នា ដើម្បីទាមទារទៅក្រុមហ៊ុនប្រមូលសំរាមមួយនេះ ឱ្យបញ្ចប់កិច្ចសន្យាការងារនិងទូទាត់ប្រាក់អត្ថប្រយោជន៍ផ្សេងទៅតាមច្បាប់ការងារ។
មេដឹកនាំសហជីពរូបនេះ បញ្ជាក់ថា ក្រុមកម្មករបានទាមទារបែបនេះ ដោយពួកគេព្រួយបារម្ភបាត់បង់ប្រាក់អត្ថប្រយោជន៍អតីតភាពការងាររបស់ពួកគេ បន្ទាប់ពីការដេញថ្លៃការគ្រប់គ្រងនិងប្រមូលសំរាម ដែលគ្រោងធ្វើនៅពាក់កណ្ដាលខែនេះ។
លោក កៅ សុខវ៉ាត ប្រាប់ថា៖ «ដោយសាររយៈពេលខ្លីខាងមុខហ្នឹង ក្រុមហ៊ុននឹងមានការដេញថ្លៃ។ អ៊ីចឹង មិនប្រាកដថាបានទៅក្រុមហ៊ុនណា យើងអត់ដឹងច្បាស់ទេ។ អ៊ីចឹង ក្ដីព្រួយបារម្ភរបស់គាត់ហ្នឹង គឺខ្លាចជាប់ពីរបីក្រុមហ៊ុនទៅ ពួកគាត់ហ្នឹងមិនដឹងទៅទារអតីតភាពការងាររបស់គាត់នៅក្រុមហ៊ុនណា»។
បើតាមលោក សុខវ៉ាត ប្រាក់អតីតភាពរបស់កម្មករបម្រើការងារនៅក្រុមហ៊ុនស៊ិនទ្រីមានយ៉ាងហោចណាស់១ពាន់ដុល្លារសម្រាប់កម្មករម្នាក់ ដោយអាស្រ័យទៅលើអតីតភាពការងាររបស់ពួកគេ។
តំណាងកម្មកររូបនេះ បានឱ្យដឹងទៀតថា សំរាមដល់ទៅជាង១ម៉ឺនតោនហើយ មិនត្រូវបានប្រមូលចេញពីលំនៅឋានពលរដ្ឋក្នុងរាជធានីភ្នំពេញនោះឡើយ បន្ទាប់ពីកម្មករធ្វើកូដកម្មចាប់តាំងពីថ្ងៃសៅរ៍សប្ដាហ៍មុនមក៕
