អាជ្ញាធរឧតុនិយមកម្ពុជា បានក្រើនរំឭកពលរដ្ឋឱ្យប្រុងប្រយ័ត្នចំពោះគ្រោះថ្នាក់បណ្ដាលមកពីភ្លៀងធ្លាក់និងខ្យល់បក់បោកខ្លាំងនៅដើមសប្ដាហ៍នេះ។
ក្នុងសេចក្ដីប្រកាសព័ត៌មាននៅថ្ងៃនេះ ក្រសួងធនធានទឹក និងឧតុនិយម បានប្រកាសថា ផ្ទៃប្រទេសកម្ពុជាស្ទើរតែទាំងមូល នឹងទទួលរងភ្លៀងធ្លាក់លាយឡំនឹងខ្យល់បក់បោកខ្លាំងចន្លោះពីថ្ងៃពុធរហូតដល់ថ្ងៃសុក្រសប្ដាហ៍នេះ។
ក្រសួងបញ្ជាក់ថា កម្ពុជានឹងទទួលរងស្ថានភាពអាកាសធាតុបែបនេះ ក្រោយពីពិនិត្យឃើញប្រព័ន្ធសម្ពាធទាបមួយកំពុងធ្វើដំណើរគ្របដណ្ដប់លើភាគខាងត្បូងប្រទេសវៀតណាមចាប់ថ្ងៃពុធខានស្អែកនេះ។
ក្រសួងធនធានទឹក និងឧតុនិយម បញ្ជាក់បន្ថែមថា បណ្ដាខេត្តជាប់ភាគខាងត្បូងប្រទេសវៀតណាមនិងបណ្ដាខេត្តនៅជាប់មាត់សមុទ្រ នឹងទទួលបានទឹកភ្លៀងធ្លាក់ច្រើន ព្រមជាមួយខ្យល់បក់បោកខ្លាំងផងដែរ។
ជាមួយស្ថានភាពអាកាសធាតុបែបនេះ ក្រសួងបានក្រើនរំឭកដល់ពលរដ្ឋនៅតាមតំបន់មាត់សមុទ្រនិងប្រជានេសាទ ឱ្យប្រុងប្រយ័ត្នខ្ពស់ ដើម្បីបញ្ចៀសគ្រោះថ្នាក់ផ្សេងៗ៕
