មន្ត្រីជាន់ខ្ពស់ក្រសួងបរិស្ថាន អំពាវនាវដល់ប្រជាពលរដ្ឋជួយរក្សាអនាម័យបរិស្ថាននៅតំបន់ការពារធម្មជាតិនិងតំបន់ទេសចរណ៍នានា ដើម្បីផ្តល់ឱកាសដល់ប្រជាសហគមន៍នៅមូលដ្ឋាន ទាញយកផលប្រយោជន៍ពីផ្នែកទេសចរណ៍ធម្មជាតិនេះ។
ការអំពាវនាវនេះបានធ្វើឡើងក្នុងអំឡុងពេលចុះទីវាលស្វែងយល់ពីការអនុវត្តគម្រោង រេដបូសីមា នៃដែនជម្រកសត្វព្រៃកែវសីមា ខេត្តមណ្ឌលគិរី ចាប់ពីថ្ងៃទី៣ ដល់ថ្ងៃទី៥ ខែតុលា ឆ្នាំ២០២០។
រដ្ឋលេខាធិការក្រសួងបរិស្ថាន លោក នេត្រ ភក្ត្រា បានថ្លែងនៅថ្ងៃទី៤ ខែតុលាថា ក្នុងតំបន់ការពារធម្មជាតិ តំបន់ដែនជម្រកសត្វព្រៃ មានបង្កប់នូវទេសភាពល្អស្អាត ដូចជា ព្រៃឈើ សត្វព្រៃ ជ្រលងភ្នំ និងទឹកធ្លាក់ជាដើម ដែលសម្បត្តិធម្មជាតិទាំងនេះបានទាក់ទាញនូវភ្ញៀវទេសចរជាតិនិងអន្តរជាតិទៅទស្សនា។
ជាមួយគ្នានេះដែរ លោកថា គោលនយោបាយរបស់រាជរដ្ឋាភិបាល ក៏ដូចជាក្រសួងបរិស្ថាន បានខិតខំក្នុងការការពារធនធានធម្មជាតិ ប្រែក្លាយតំបន់ដែលមានសក្តានុពលទេសចរណ៍ឱ្យទៅជាតំបន់ទេសចរណ៍ធម្មជាតិ និងជំរុញលើផ្នែកទេសចរណ៍ធម្មជាតិ ដើម្បីឱ្យភ្ញៀវទេសចរទៅទស្សនានិងកម្សាន្តតំបន់ទាំងនោះ ដែលជាផ្នែកមួយនៃការបង្កើនចំណូលជូនសហគមន៍និងបង្កើតសេដ្ឋកិច្ចនៅមូលដ្ឋាន។
ករណីនេះ លោកបានអំពាវនាវដល់ប្រជាពលរដ្ឋទាំងអស់ ចូលរួមការពារទេសភាពតំបន់ធម្មជាតិទាំងនោះឱ្យមានបរិស្ថានអនាម័យល្អ ដោយចៀសវាងចោលសំណល់ផ្សេងៗដែលនាំឱ្យប៉ះពាល់ដល់បរិស្ថាន។
លោក នេត្រ ភក្ត្រា បានគូសបញ្ជាក់ថា៖ «បើសិនជាបោះចោលនូវថង់ប្លាស្ទិក ដបទឹកសុទ្ធ ឬក៏សំណល់ម្ហូបអាហារ គឺវានឹងបំផ្លាញនូវទេសភាពដ៏ល្អស្អាតរបស់ [តំបន់ការពារធម្មជាតិ] យើង ធ្វើឱ្យអ្នកផ្សេងទៀតអត់ចង់មកទេ ព្រោះពួកគាត់អត់ចង់ថតរូបជាប់ជាមួយសំរាមទេ ប៉ុន្តែពួកគាត់ចង់ថតរូបជាប់ជាមួយស្មៅខៀវខ្ចីនិងព្រៃឈើ»។
លោកគូសបញ្ជាក់ថា៖ «សូមរក្សានូវអនាម័យ ហើយវេចខ្ចប់ឱ្យបានត្រឹមត្រូវនូវសំណល់ដែលខ្លួនយកមក»។
បើតាមលោករដ្ឋលេខាធិការ តំបន់ទេសចរណ៍ធម្មជាតិក្នុងខេត្តមណ្ឌលគិរី មានប្រមាណជា៣០កន្លែង៕
