អតីតអនុប្រធានាធិបតីប្រទេសម៉ាល់ឌីវ លោក Ahmed Adeeb កាលពីម្សិលមិញ ត្រូវបានតុលាការកាត់ទោសឱ្យជាប់ពន្ធនាគាររយៈពេល២០ឆ្នាំ និងពិន័យជាប្រាក់ចំនួន១២៩ ៨៩២ ដុល្លារ បន្ទាប់ពីលោកបានសារភាពកំហុសចំពោះការចោទប្រកាន់ពីអំពើពុករលួយ។
តាមប្រភពព័ត៌មាន Reuters នៅថ្ងៃទី៦ ខែកញ្ញានេះ បានឱ្យដឹងថា តុលាការព្រហ្មទណ្ឌប្រទេសម៉ាល់ឌីវ បានចោទប្រកាន់លោក Adeeb ពីបទកិបកេងប្រាក់ ការលាងលុយកខ្វក់ និងការប្រើប្រាស់អំណាចមិនត្រឹមត្រូវ រួមនឹងបទឧក្រិដ្ឋផ្សេងៗទៀត។ ប្រភពដដែលបានបង្ហាញថា ការចោទប្រកាន់នេះទាក់ទងទៅនឹងការជួលកោះនៅតំបន់ត្រូពិចក្នុងការអភិវឌ្ឍសណ្ឋាគារ។
យោងតាមគណៈកម្មការស្តារទ្រព្យសម្បត្តិ ដែលបង្កើតឡើងដោយរដ្ឋាភិបាលម៉ាល់ឌីវ កោះទាំងនោះត្រូវបានលក់ក្រោមតម្លៃទីផ្សារ ដែលជាលទ្ធផលរដ្ឋាភិបាលបានខាតបង់ជិត២៥៩លានដុល្លារ។
នៅក្នុងលិខិតសារភាពទៅកាន់តុលាការ លោក Ahmed Adeeb បានចរចាសុំអង្វរ ដោយនិយាយថា គាត់បានត្រៀមខ្លួនរួចជាស្រេចដើម្បីសហការរកប្រាក់ដែលបាត់ ក្រោយពីលោកបានសារភាពកំហុសកាលពីខែកញ្ញាកន្លងមក។
ការចាប់ខ្លួននេះកើតឡើងនៅពេលដែលអតីតអនុប្រធានាធិបតីរូបនេះ កំពុងស្វែងរកសិទ្ធិជ្រកកោននៅប្រទេសឥណ្ឌា ដើម្បីគេចខ្លួនពីការសាកសួរជុំវិញការកិបកេងប្រាក់របស់រដ្ឋ។ នេះបើយោងតាមសារព័ត៌មាន Aljazeera ។
ប្រភពដដែលឱ្យដឹងថា ប៉ូលិសម៉ាល់ឌីវបានចាប់អតីតអនុប្រធានាធិបតីរូបនេះហើយ ដោយបាននាំខ្លួនទៅឃុំក្នុងពន្ធនាគារនៅរដ្ឋធានី Male នៃប្រទេសម៉ាល់ឌីវ។
កាលពីថ្ងៃព្រហស្បតិ៍សបា្តហ៏មុន លោក Adeeb បានទៅដល់ទីក្រុងកំពង់ផែ Thoothukudi របស់ឥណ្ឌា ក្នុងរដ្ឋ Tamil Nadu ដោយជិះទូក ហើយគាត់បានស្វែងរកសិទ្ធិជ្រកកោននៅប្រទេសនោះ ក៏ប៉ុន្តែអាជ្ញាធរឥណ្ឌាមិនបានយល់ព្រមនោះឡើយ ដោយសារតែគាត់មិនមានឯកសារធ្វើដំណើរត្រឹមត្រូវ។
ប្រភពដដែលបានឱ្យដឹងថា អាជ្ញាធរម៉ាល់ឌីវបានចាត់វិធានការភ្លាមៗក្នុងរឿងនេះ ដើម្បីចាប់ខ្លួន លោក Adeeb ក្រោយពីមានការជំនុំជម្រះដំបូង ដោយចោទប្រកាន់លោក Adeeb ពីបទពុករលួយទាក់ទងនឹងការលួចលុយជិត៨០លានដុល្លារ។
លោក Adeeb ធ្លាប់បានជាប់ពន្ធនាគាររយៈពេល៣ឆ្នាំរួចមកហើយពីបទលាងលុយកខ្វក់ និងព្យាយាមសម្លាប់លោកប្រធានាធិបតី Abdulla Yameen ក្នុងឆ្នាំ២០១៥៕