កម្ពុជាបានខ្ចីប្រាក់ពីដៃគូអភិវឌ្ឍន៍នានាសរុបជិត៤៨០លានដុល្លារនៅក្នុងឆមាសទី១ក្នុងឆ្នាំនេះ ឬស្មើនឹង២៥ភាគរយនៃគម្រោងកម្ចីទំហំ១ ៤០០លានដុល្លារដែលរដ្ឋាភិបាលបានគ្រោងឡើងសម្រាប់ឆ្នាំ២០២០នេះ។ នេះបើតាមតួលេខចេញដោយក្រសួងសេដ្ឋកិច្ច និងហិរញ្ញវត្ថុនៅដើមខែតុលានេះ។
អ្នកនាំពាក្យក្រសួងសេដ្ឋកិច្ច និងហិរញ្ញវត្ថុ លោក មាស សុខសេនសាន មានប្រសាសន៍ថា ទំហំកម្ចីដែលរដ្ឋាភិបាលខ្ចីពីដៃគូអភិវឌ្ឍន៍នេះ ធ្វើឡើងតាមតម្រូវការជាក់ស្ដែងនិងតាមគោលការណ៍ដែលបានកំណត់។
លោក មាស សុខសេនសាន ប្រាប់ថា៖ «យើងគិតថា ឆ្នាំនីមួយៗមានតម្រូវការប៉ុណ្ណឹង។ ជាក់ស្ដែងទៅលើការអនុវត្ត បត់បែនទៅលើស្ថានភាពជាក់ស្ដែងដែលត្រូវធ្វើ។ ដូចបញ្ហាសេដ្ឋកិច្ចឬបញ្ហាកូវីដអ៊ីចឹង យើងអាចត្រូវគិតគូរឡើងវិញថា តើយើងត្រូវវិនិយោគនៅផ្នែកណា ដើម្បីជួយអ្វីដែលសំខាន់ ធ្វើម៉េចឱ្យកំណើនកម្លាំងពលកម្មនៅរក្សាឬបង្កើនការងារថ្មីៗទៀតឱ្យបងប្អូនកម្មករយើងធ្វើ»។
លោកបន្តថា កម្ពុជាមានជំហរខ្ចីប្រាក់ពីគ្រប់ដៃគូទាំងអស់ បើសិនណាជាកម្ចីនេះស្របតាមលក្ខខណ្ឌគន្លឹះទាំងប្រាំដែលបានដាក់ចេញ រួមមាន ឥណទានទំហំសមស្របតាមស្ថានភាពថវិកាជាតិ ឥណទានសម្បទានឬអនុគ្រោះខ្ពស់ ខ្ចីសម្រាប់តែវិស័យអាទិភាពចីរភាពនៃកំណើនសេដ្ឋកិច្ច ប្រើប្រាស់ឥណទានដោយតម្លាភាពគណនេយ្យភាព និងប្រើប្រាស់ឥណទានសម្បទានសម្រាប់វិនិយោគលើហេដ្ឋារចនាសម្ព័ន្ធសាធារណៈ។ ប៉ុន្តែអ្នកនាំពាក្យរូបនេះមិនប្រាប់ទេថា ប្រាក់កម្ចីជិត៤៨០លានដុល្លារអាមេរិកនេះ ត្រូវបានខ្ចីពីប្រភពណានោះឡើយ។
ធនាគារពិភពលោក បានប្រកាសកាលពីខែកក្កដាកន្លងមកនេះថា ស្ថាប័នផ្ដល់កម្ចីអន្តរជាតិមួយនេះ បានអនុម័តកម្ចីទំហំ១០០លានដុល្លារដល់កម្ពុជា ដើម្បីជួយគម្រោងអភិវឌ្ឍន៍ផ្លូវលំជនបទ។ នៅក្នុងខែកក្កដាដដែល ធនាគារអភិវឌ្ឍន៍អាស៊ី ហៅកាត់ថា ADB ក៏បានផ្ដល់ប្រាក់ឱ្យកម្ពុជាខ្ចីចំនួន២៥០លានដុល្លារ ដើម្បីឆ្លើយតបនឹងវិបត្តិកូវីដ១៩ដែរ។
ព្រឹត្តិបត្រស្ថិតិបំណុលសាធារណៈកម្ពុជាចេញដោយក្រសួងសេដ្ឋកិច្ច និងហិរញ្ញវត្ថុ បង្ហាញថា កម្ពុជាជំពាក់បំណុលបរទេសនិងដៃគូអភិវឌ្ឍន៍នានាសរុប៧,៩ពាន់លានដុល្លារអាមេរិកគិតត្រឹមដំណាច់ខែមិថុនា ឆ្នាំ២០២០នេះ។
តួលេខដដែលនេះ បង្ហាញថា ប្រទេសចិនជាម្ចាស់បំណុលធំបំផុតរបស់កម្ពុជា ដោយកម្ពុជាជំពាក់ចិនដល់ទៅជាង៣ ៧០០ (៣ ៧០២)លានដុល្លារ ឬស្មើនឹងជិត៤៧ភាគរយនៃទំហំបំណុលសរុបដែលកម្ពុជាជំពាក់បរទេស។ ក្រៅពីចិន កម្ពុជាជំពាក់ជប៉ុនជាង៤៩០លានដុល្លារ ជំពាក់កូរ៉េខាងត្បូងជិត៣៨០លានដុល្លារ ជំពាក់បារាំងជិត៣៥៧លានដុល្លារ ជំពាក់ឥណ្ឌាជាង២៦លានដុល្លារ ជំពាក់ថៃជាង៥២លានដុល្លារ និងជំពាក់វៀតណាមជាង១៦លានដុល្លារ។ កម្ពុជាក៏ជំពាក់បំណុលដៃគូអភិវឌ្ឍន៍អន្តរជាតិសរុបជាង២ ២៤៧លានដុល្លារផងដែរ និងមរតកបំណុលនៃរបបចាស់ជាង៦២០លានដុល្លារ។
ចំពោះការទូទាត់សងបំណុលវិញ នៅក្នុងឆមាសទី១ ឆ្នាំ២០២០នេះ កម្ពុជាបានទូទាត់សងបំណុលជូនដៃគូអភិវឌ្ឍន៍សរុបជាង១៥២លានដុល្លារ ក្នុងនោះដែរ បំណុលសាធារណៈក្រៅប្រទេសមានចំនួន៩៩ភាគរយ ត្រូវនឹងជាង១៥០លានដុល្លារ។ កម្ពុជាសងប្រាក់ដើមចំនួន១០៩,៩៦លានដុល្លារ ការប្រាក់និងកម្រៃផ្សេងៗចំនួន៤០,៧៩លានដុល្លារ។
ព្រឹត្តិបត្រស្ថិតិបំណុលសាធារណៈកម្ពុជា បញ្ជាក់ថា គិតចាប់ពីឆ្នាំ១៩៩៣ មកដល់ដំណាច់ឆមាសទី១ ឆ្នាំ២០២០ កម្ពុជាបានចុះកិច្ចព្រមព្រៀងខ្ចីលុយដៃគូអភិវឌ្ឍន៍នានាសរុបចំនួនជាង១ម៉ឺន ៣ពាន់លានដុល្លារអាមេរិក សម្រាប់ប្រើប្រាស់លើវិស័យហេដ្ឋារចនាសម្ព័ន្ធរូបវន្ដគ្របដណ្ដប់ប្រមាណ៨៧ភាគរយ និងវិស័យផ្សេងទៀតប្រមាណ១៣ភាគរយ។
ទន្ទឹមគ្នានោះ រដ្ឋាភិបាលក៏បានដកសាច់ប្រាក់ពីដៃគូអភិវឌ្ឍន៍មកប្រើប្រាស់ជាក់ស្ដែងប្រមាណ៨,៥ពាន់លានដុល្លារអាមេរិក ឬស្មើនឹងប្រមាណ៦៥ភាគរយនៃទំហំបំណុលសរុបជាង១៣ពាន់លានដុល្លារ។
