រដ្ឋាភិបាលបានកាត់ដីចេញពីតំបន់ការពារទំហំ៦០០ហិកតា ស្ថិតនៅស្រុកព្រៃនប់ ខេត្តព្រះសីហនុ ឱ្យបុគ្គលពីររូបដែលមានងារជាឧកញ៉ាធ្វើជាកម្មសិទ្ធិ។
ក្នុងអនុក្រឹត្យចុះថ្ងៃទី៩ ខែមិថុនា ឆ្នាំ២០២០ ដែលវីអូឌីទើបទទួលបាននៅថ្ងៃពុធនេះ រដ្ឋាភិបាលសម្រេចកាត់ដីទំហំ៦០០ហិកតាពីដែនព្រៃលិចទឹកនិងគម្របព្រៃឈើឆ្នាំ២០០២ ស្ថិតក្នុងឃុំរាម និងឃុំបិតត្រាំង មកធ្វើអនុប្រយោគជាដីឯកជនរបស់រដ្ឋ។ បុគ្គលពីររូបមានងារជាឧកញ៉ានោះគឺលោក សេង ញ៉ក់ និងលោកស្រី លី អាផណ។
វីអូឌីមិនអាចសុំការបញ្ជាក់បន្ថែមពីអគ្គនាយកក្រុមហ៊ុន ដឺ ព្រេមៀ លែន លោក សេង ញ៉ក់ បានទេពាក់ព័ន្ធករណីនេះ។
អ្នកនាំពាក្យសាលាខេត្តព្រះសីហនុ លោក ឃាង ភារម្យ មានប្រសាសន៍ថា ការសម្រេចកាត់ដីតំបន់ការពារទំហំ៦០០ហិកតាទៅឱ្យលោកឧកញ៉ា សេង ញ៉ក់ និងលោកស្រី លី អាផណ ជាសមត្ថកិច្ចរបស់រដ្ឋាភិបាលដែលធ្វើឡើងទៅតាមការស្នើសុំរបស់រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ។
លោកបន្ថែមថា៖ «មិនមែនជាដីសម្បទានសេដ្ឋកិច្ចទេ។ នេះបើមើលទៅលើខ្លឹមសារអនុក្រឹត្យ។ ហើយខ្ញុំអត់បកស្រាយទៅលើអនុក្រឹត្យដែរ ព្រោះជាសមត្ថកិច្ចរបស់រាជរដ្ឋាភិបាល។ ហើយអនុក្រឹត្យនេះ យោងទៅតាមសំណើរបស់រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ»។
រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន មានប្រសាសន៍ថា រដ្ឋាភិបាលកាត់ដីទំហំ៦០០ហិកតាឱ្យឧកញ៉្ញា សេង ញ៉ក់ និងលោកជំទាវ លី អាផណ ធ្វើជាកម្មសិទ្ធ។ ប៉ុន្តែពេលសួរថា ហេតុអ្វីបានជារដ្ឋផ្តល់ដីកម្មសិទ្ធិក្នុងចំនួនច្រើនដល់ឧកញ៉ាទាំងនោះ លោក វេង សាខុន បានបង្វែរឱ្យទៅសួរលោក អ៊ុង សំអាត រដ្ឋលេខាធិការទទួលបន្ទុករដ្ឋបាលព្រៃឈើវិញ ប៉ុន្តែលោក អ៊ុង សំអាត ប្រាប់ថា រវល់ប្រជុំនៅខេត្តមិនអាចនិយាយបាន។
តំណាងសហគមន៍ដីធ្លីប្រចាំខេត្តព្រះសីហនុរបស់សមាគមសម្ព័ន្ធសហគមន៍កសិករកម្ពុជា(CCFC) លោក ស៊ុន សុផាត មានប្រសាសន៍ថា ករណីរដ្ឋាភិបាលកាត់ដីតំបន់ការពារឱ្យឧកញ៉ាធ្វើជាកម្មសិទ្ធិនេះ គឺពុំមានតម្លាភាពរវាងពលរដ្ឋក្រីក្រនិងអ្នកមានលុយមានអំណាចនោះទេ។
លោក ស៊ុន សុផាត ឱ្យដឹងថា កន្លងមក មានពលរដ្ឋជាច្រើនគ្រួសារនៅឃុំរាមនិងឃុំបិតត្រាំង ត្រូវបានអាជ្ញាធរបង្ក្រាប គំរាមកំហែង និងចោទប្រកាន់ថា រំលោភយកដីគម្របព្រៃឈើ ខណៈពួកឧកញ៉ានិងអ្នកមានលុយមានអំណាច មិនត្រូវបានចាត់វិធានការឡើយ។
លោកបន្ថែមថា៖ «ភាគច្រើនយើងឃើញតែឧកញ៉ានិងអ្នកធំមួយចំនួនដែលបានចូលកាន់កាប់ដីរដ្ឋហ្នឹង ទទួលបានការដោះស្រាយនិងសម្បទានពីរដ្ឋ ប៉ុន្តែភាគច្រើនពលរដ្ឋក្រីក្រ គឺពួកគាត់មិនទទួលបានដីសម្បទានដីពីរដ្ឋទេ»។
កាលពីថ្ងៃទី២៤ ខែកក្កដា ឆ្នាំ២០២០ អាជ្ញាធរបានចាប់ខ្លួនពលរដ្ឋ២នាក់ ក្រោមការចោទប្រកាន់ថា ពួកគេបានចូលទន្រ្ទានកាន់កាប់ដីរដ្ឋនៅតំបន់ការពារខាងឡើងនេះ។ អាជ្ញាធរដែនដីក៏បានព្រមានចាត់វិធានការតឹងរឹងលើអ្នកដែលទន្ទ្រានយកដីរដ្ឋនៅតំបន់នោះទៀត៕
