ក្រសួងសុខាភិបាលបានអនុញ្ញាតឱ្យដំណើរការឡើងវិញនូវការរៀបចំពិធីបុណ្យសពនិងការថ្វាយបង្គំសពនៅតាមវិហារ ស៊ូរ៉ាវ និងរាល់ពិធីបុណ្យសាសនានានាជាដំណាក់កាលៗនៅទូទាំងប្រទេស។
ក្រសួងសុខាភិបាលបានសម្រេចបែបនេះនៅក្នុងសេចក្តីប្រកាសព័ត៌មានដែលចេញកាលពីថ្ងៃម្សិលមិញ បន្ទាប់ពីមានការអនុញ្ញាតពីសំណាក់លោកនាយករដ្ឋមន្ត្រី ហ៊ុន សែន។
ក្រសួងបញ្ជាក់ថា សេចក្ដីសម្រេចនេះ សម្រាប់តែការរៀបចំពិធីបុណ្យសពនិងការថ្វាយបង្គំសពនៅតាមវិហារ ស៊ូរ៉ាវ ប៉ុណ្ណោះ ប៉ុន្តែមិនអនុញ្ញាតចំពោះការជួបជុំគ្នាដើរធ្វើធម្មយាត្រាជាក្រុមតូចធំនិងការជួបជុំឃោសនាឆ្លងខេត្តឡើយ។
ក្រសួងសុខាភិបាលស្នើឱ្យសាសនិកឥស្លាម ត្រូវបន្តគោរពតាមវិធានសុវត្ថិភាពរបស់ខ្លួន ដូចជា រក្សាអនាម័យជាប្រចាំដោយលាងសម្អាតដៃនឹងសាប៊ូ ទឹកអាល់កុល ជែលសម្លាប់មេរោគ ពាក់ម៉ាស់ វាស់កម្ដៅ និងរក្សាគម្លាតសុវត្ថិភាព៕
