ក្រសួងសុខាភិបាលបានអំពាវនាវទៅដល់ពលរដ្ឋទូទៅនិងអាជ្ញាធរពាក់ព័ន្ធ ឱ្យពង្រឹងការធ្វើចត្តាឡីស័កឬការរក្សាខ្លួននៅដាច់ដោយឡែកតាមផ្ទះសម្បែងនិងតាមមណ្ឌលចត្តាឡីស័កនានា ដោយថា ដើម្បីទប់ស្កាត់ការចម្លងវីរុសកូរ៉ូណាទៅក្នុងសហគមន៍។
ក្នុងសេចក្ដីប្រកាសព័ត៌មាននៅថ្ងៃនេះ ក្រសួងសុខាភិបាលបានលើកឡើងថា កម្ពុជានៅតែប្រឈមមុខនឹងការចម្លងវីរុសកូវីដ១៩គ្រប់ពេលវេលានៅឡើយ។
ក្រសួងបញ្ជាក់ថា ស្ថានភាពបែបនេះ តម្រូវឱ្យពលរដ្ឋអនុវត្តតាមវិធានការចត្តាឡីស័ករយៈពេល១៤ថ្ងៃឱ្យបានត្រឹមត្រូវ ហើយអាជ្ញាធរត្រូវចូលរួមគ្រប់គ្រងឱ្យបានម៉ឺងម៉ាត់។
ក្រសួងសុខាភិបាលបានអំពាវនាវឱ្យពង្រឹងការអនុវត្តវិធានការចត្តាឡីស័កបែបនេះ បន្ទាប់ពីមនុស្សមួយចំនួនបានគេចចេញពីកន្លែងស្នាក់នៅដាច់ដោយឡែកជាបន្តបន្ទាប់អំឡុងពេលពួកគេធ្វើចត្តាឡីស័ក។
ស្ត្រីសញ្ជាតិអាមេរិកដើមកំណើតខ្មែរ អាយុ៣៦ឆ្នាំ បានរត់គេចចេញពីមណ្ឌលចត្តាឡីស័កនៅរាជធានីភ្នំពេញកាលពីយប់ថ្ងៃទី១៧ ខែកក្កដា មុននឹងត្រូវបានរកឃើញនៅខេត្តកំពង់ចាមនៅថ្ងៃបន្ទាប់។
១៦ថ្ងៃបន្ទាប់មកទៀត បុរសកម្ពុជា២នាក់ដែលទើបត្រឡប់មកពីប្រទេសម៉ាឡេស៊ី បានរត់គេចចេញពីមណ្ឌលចត្តាឡីស័កស្ថិតនៅក្នុងខេត្តព្រៃវែង ហើយត្រូវបានរកឃើញវិញនៅមួយថ្ងៃបន្ទាប់។
១៣ថ្ងៃបន្ទាប់មកទៀត ស្ត្រីជនជាតិវៀតណាម អាយុ៣៧ឆ្នាំ និងកូនប្រុសអាយុ១៣ឆ្នាំ ដែលទើបវិលត្រឡប់ពីប្រទេសវៀតណាមចូលមកកម្ពុជាវិញនោះ បានរត់គេចចេញពីមណ្ឌលចត្តាឡីស័ក ស្ថិតក្នុងស្រុកព្រះស្ដេច ខេត្តព្រៃវែង ហើយត្រូវបានរកឃើញឡើងវិញនៅឯផ្ទះរបស់ពួកគេ ស្ថិតនៅភូមិប្រាសាទ ឃុំសែប ស្ថិតក្នុងស្រុកកំពង់ត្រឡាច ខេត្តកំពង់ឆ្នាំង។
កាលពីថ្ងៃទី៩ ខែកញ្ញាកន្លងមកនេះ បុរសជនជាតិចិន២នាក់ក៏បានរត់ចេញពីមណ្ឌលចត្តាឡីស័កផងដែរ ក្រោយពីពួកគេមានទំនាស់ជាមួយក្រុមជនជាតិចិនដូចគ្នាអំឡុងពេលរង់ចាំលទ្ធផលតេស្តសំណាកនៅឯសណ្ឋាគារមួយក្នុងរាជធានីភ្នំពេញ។
បុរសជនជាតិហុងគ្រី អាយុ៧០ឆ្នាំ បានរត់គេចពីមណ្ឌលចត្តាឡីស័កនៅខេត្តសៀមរាបកាលពីថ្ងៃទី២៥ ខែកញ្ញាកន្លងមកនេះ ហើយត្រូវបានរកឃើញនៅថ្ងៃបន្ទាប់។
គិតត្រឹមថ្ងៃនេះ មនុស្ស២៨០នាក់ហើយត្រូវបានរកឃើញឆ្លងវីរុសកូរ៉ូណានៅក្នុងប្រទេសកម្ពុជាចាប់តាំងពីចុងខែមករាមក ប៉ុន្តែក្រសួងសុខាភិបាលបានប្រកាសថា អ្នកជំងឺ២៨៦នាក់ហើយត្រូវបានព្យាបាលជាសះស្បើយ ខណៈមនុស្ស៤នាក់ទៀតកំពុងស្ថិតនៅក្រោមការព្យាបាល៕
