គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប. បានប្រកាសថា ប្រជាពលរដ្ឋជាង ៨ម៉ឺននាក់ បានចុះឈ្មោះក្នុងបញ្ជីបោះឆ្នោតនៅក្នុងរយៈពេល៦ថ្ងៃកន្លងមកនេះ។
ក្នុងសេចក្ដីប្រកាសព័ត៌មាននៅថ្ងៃនេះ គ.ជ.ប. បានប្រកាសថា ប្រជាពលរដ្ឋគ្រប់អាយុបោះឆ្នោតថ្មីចំនួន១៨ ៣៥៥នាក់ បានចុះឈ្មោះបោះឆ្នោតនៅថ្ងៃម្សិលមិញនេះ ខណៈដែលឈ្មោះពលរដ្ឋដល់ទៅ២៨ ៧៣៥នាក់ ត្រូវបានលុបចេញពីបញ្ជីបោះឆ្នោត។
គ.ជ.ប. ក៏បានប្រកាសផងដែរថា ប្រជាពលរដ្ឋ២៤ ៧១១នាក់ បានកែប្រែទិន្នន័យរបស់ពួកគេនៅក្នុងបញ្ជីបោះឆ្នោត ហើយពលរដ្ឋ២៤ ៤១៦នាក់ទៀត បានផ្ទេរឈ្មោះរបស់ពួកគេទៅកាន់ឃុំឬសង្កាត់ថ្មីកាលពីថ្ងៃម្សិលមិញនេះដែរ។
គ.ជ.ប បានចាប់ផ្ដើមពិនិត្យនិងចុះឈ្មោះបោះឆ្នោតថ្មីចាប់ពីថ្ងៃទី១ ដល់ថ្ងៃទី១៩ ខែតុលានេះ។តួលេខចេញដោយ គ.ជ.ប បង្ហាញថា ពលរដ្ឋដល់ទៅជាង៣សែននាក់ ត្រូវគ្រប់អាយុ១៨ឆ្នាំ និងត្រូវចុះឈ្មោះបោះឆ្នោតនៅក្នុងឆ្នាំ២០២០នេះ។
ក្នុងរយៈពេល ៦ថ្ងៃកន្លងមកនេះ គ.ជ.ប. បានប្រកាសថា បានចុះឈ្មោះពលរដ្ឋទើបគ្រប់អាយុបោះឆ្នោតចំនួន ៨៦,៩៤៦នាក់នៅក្នុងបញ្ជីបោះឆ្នោត។
ប្រជាពលរដ្ឋជាង៨លាន៦២ម៉ឺននាក់ ត្រូវបានចុះឈ្មោះក្នុងបញ្ជីបោះឆ្នោតកាលពីឆ្នាំ២០១៩កន្លងមក ខណៈពលរដ្ឋកម្ពុជាអាយុចាប់ពី១៨ឆ្នាំឡើង មានចំនួនជាង១០លាន៣៨ម៉ឺននាក់នៅទូទាំងប្រទេស៕
សេចក្ដីកែតម្រូវ៖ សារព័ត៌មានវីអូឌីសូមកែតម្រូវខ្លឹមសារក្នុងអត្ថបទនេះ ដែលបានចុះផ្សាយថា គ.ជ.ប. បានចុះឈ្មោះពលរដ្ឋថ្មីជិត ២ម៉ឺននាក់ក្នុងបញ្ជីបោះឆ្នោតរយៈពេល ៦ថ្ងៃកន្លងមកនេះ។ មន្ត្រី គ.ជ.ប. បានបញ្ជាក់ថា រយៈពេល ៦ថ្ងៃកន្លងមកនេះ គ.ជ.ប. បានចុះឈ្មោះពលរដ្ឋថ្មីជាង ៨ម៉ឺននាក់នៅក្នុងបញ្ជីបោះឆ្នោត។
