គ្រូបង្រៀននិងជំនួយការគ្រូចំនួន១៣នាក់នៅសាលារៀនឯកជនមួយនៅក្នុងប្រទេសថៃ ប្រឈមជាប់ទោស ដោយរងការចោទប្រកាន់ថា បានប្រើហិង្សានិងបំពានសិទ្ធិកុមារ។
លោកឧត្តមសេនីយ៍ទោ អាំភុល បួរ៉ាផន ទទួលបន្ទុកលើករណីនេះ បាននិយាយថា សាលារៀនឯកជនដែលបង្រៀនកុមារពីថ្នាក់មត្តេយ្យដល់ថ្នាក់ទី៦ឈ្មោះ សារ៉ា ចំនួន១០ទីតាំង បានជាប់ពាក់ព័ន្ធពីការចោទប្រកាន់ថា បានប្រើអំពើហិង្សាដោយផ្ទាល់និងប្រយោលដល់កុមារចំនួន៨៤នាក់។
កាលពីថ្ងៃទី០៦ ខែតុលា គ្រូបង្រៀននិងជំនួយការចំនួន១៣នាក់ ត្រូវបានសមត្ថកិច្ចកោះហៅយកទៅសាកសួរ ហើយក្រោយមកត្រូវបានដោះលែងដោយតុលាការខេត្តណុនថាបូរី បន្ទាប់ពីមានការបង់ប្រាក់ធានាចំនួន៨០០០បាត ស្មើ២៥០ដុល្លារ។
យោងតាមប្រភពសារព័ត៌មានបាងកកប៉ុស្តិ៍ បានឱ្យដឹងថា លោកឧត្តមសេនីយ៍ទោ អាំភុល ថ្លែងថា លោកកំពុងសហការជាមួយមន្ត្រីជំនាញបន្តការស្រាវជ្រាវលើករណីនេះ ដើម្បីធានាថា គ្រប់ភាគីពាក់ព័ន្ធទាំងអស់ត្រូវតែទទួលបានយុត្តិធម៌។
សាធារណជន មាតាបិតា និងអាណាព្យាបាលសិស្ស បានខឹងសម្បាចំពោះករណីនេះ ហើយពួកគេទាមទារឱ្យបិទសាលា ចំពោះការប្រើហិង្សាលើសិស្សនិងការបណ្តោយឱ្យអ្នកមិនមានការបណ្តុះបណ្តាលត្រឹមត្រូវបង្រៀនសិស្ស។
ឪពុកម្តាយរបស់សិស្សម្នាក់ដែលរាយការណ៍ករណីនេះទៅសមត្ថកិច្ច ធ្លាប់រងការព្រមានពីគ្រូបង្រៀនថា អាចនឹងប្តឹងទៅតុលាការទាមទារលុយពីឪពុកម្តាយសិស្សនោះចំនួន៥លានបាតដែលស្មើនឹង១ម៉ឺន៦ពាន់ដុល្លារ។
ក្រុមប្រឹក្សាគ្រូបង្រៀនថៃ បានដាក់ពាក្យប្តឹងករណីនេះទៅតុលាការរួចហើយ ពាក់ព័ន្ធករណីអនុញ្ញាតឱ្យអ្នកដែលមិនមានវិជ្ជាជីវៈត្រឹមត្រូវបង្រៀនសិស្ស។
ករណីប្រើហិង្សានិងបំពានលើសិទ្ធិកុមារ ត្រូវបានសាធារណជននិងស្ថាប័នពាក់ព័ន្ធជាច្រើន ពិភាក្សាគ្នាលើបញ្ហានេះ។ នៅថ្ងៃទី២១ ខែតុលាខាងមុខ នឹងមានការជួបប្រជុំគ្នារវាងតំណាង ក្រសួងអប់រំ ក្រសួងសុខភាពសាធារណៈ ក្រសួងសុវត្ថិភាពមនុស្សនិងអភិវឌ្ឍន៍សង្គម ដើម្បីជជែកគ្នាពីបញ្ហានៅសាលា សារ៉ា នេះ។
សារ៉ា ជាសាលាឯកជនសហការអប់រំជាលក្ខណៈគ្រិស្ត បង្កើតឡើងកាលពីឆ្នាំ២០០៩ មានការិយាល័យកណ្តាលនៅទីក្រុងបាងកក និងមានសាខានៅតាមខេត្តផ្សេងៗទៀត។ សាលានេះបង្រៀនផ្តោតលើភាសាថៃនិងភាសាអង់គ្លេស មានសិស្សប្រមាណ២ ៩០០នាក់ ដែលមានអាយុចន្លោះពី៣ឆ្នាំទៅ១៧ឆ្នាំ៕
