ក្រសួងសុខាភិបាលបានប្រកាសពីការរកឃើញអ្នកឆ្លងជំងឺកូវីដ១៩ថ្មីម្នាក់ទៀតនៅថ្ងៃនេះ ដែលនាំឱ្យចំនួនករណីឆ្លងសរុបកើនឡើងដល់២៨១ករណីនៅទូទាំងប្រទេស។
ក្នុងសេចក្ដីប្រកាសព័ត៌មាននៅព្រឹកនេះ ក្រសួងសុខាភិបាលបានបញ្ជាក់ថា បុរសឥណ្ឌូនេស៊ី វ័យ២៦ឆ្នាំ ដែលស្នាក់នៅក្នុងសណ្ឋាគារមួយនៅខេត្តព្រះសីហនុនោះ ត្រូវបានធ្វើតេស្តនិងរកឃើញផ្ទុកជំងឺកូវីដ១៩កាលពីថ្ងៃម្សិលមិញនេះ។
ក្រសួងបញ្ជាក់បន្ថែមថា បុរសឥណ្ឌូនេស៊ីរូបនេះបានធ្វើដំណើរទៅប្រទេសឥណ្ឌូនេស៊ីឆ្លងកាត់សិង្ហបុរីមុននឹងមកដល់កម្ពុជានៅថ្ងៃទី៦ ខែតុលា ហើយបច្ចុប្បន្នត្រូវបានដាក់ឱ្យស្ថិតក្រោមការព្យាបាលនៅមន្ទីរពេទ្យមិត្តភាពខ្មែរ-សូវៀត។
បើតាមក្រសួងសុខាភិបាល បុរសឥណ្ឌូនេស៊ីរូបនេះបានធ្វើដំណើរតាមជើងហោះហើរមួយជាមួយអ្នកដំណើរ១១២នាក់ផ្សេងទៀតដែលត្រូវបានធ្វើតេស្តផងដែរ ហើយរកមិនឃើញថាឆ្លងវីរុសកូវីដ១៩ទេ។
ក្រសួងនិយាយថា អ្នកដំណើរ១១២នាក់នោះត្រូវបានបែងចែកឱ្យស្នាក់នៅដាច់ដោយឡែក១៤ថ្ងៃនៅតាមមណ្ឌលចត្តាឡីស័កនានាក្នុងរាជធានីភ្នំពេញ ក្នុងនោះ ៤៩នាក់ស្នាក់នៅដាច់ដោយឡែកក្នុងមណ្ឌលវិទ្យាល័យបុរី១០០ខ្នង ហើយអ្នកដំណើរដទៃទៀតត្រូវបានដាក់ឱ្យស្នាក់នៅដាច់ដោយឡែកនៅតាមសណ្ឋាគារចំនួន៤ក្នុងរាជធានីភ្នំពេញ។
ចំណែកអ្នកដំណើរម្នាក់ទៀត ក្រសួងសុខាភិបាលបញ្ជាក់ថា ត្រូវបានដាក់ឱ្យស្ថិតនៅដាច់ដោយឡែកនៅក្នុងស្ថានទូតសិង្ហបុរី។
គិតត្រឹមថ្ងៃនេះ មនុស្ស២៨១នាក់ហើយត្រូវបានរកឃើញឆ្លងជំងឺកូវីដ១៩នៅទូទាំងប្រទេស ហើយក្រសួងសុខាភិបាលប្រកាសថា អ្នកជំងឺកូវីដ១៩ដល់ទៅ២៧៦នាក់ហើយត្រូវបានព្យាបាលជាសះស្បើយទាំងស្រុង៕