នាយករដ្ឋមន្ត្រីកម្ពុជា បានលើកឡើងថា ការប្រែប្រួលអាកាសធាតុជាបញ្ហាប្រទាក់ក្រឡាគ្នា ដែលត្រូវដោះស្រាយតាមគោលនយោបាយគ្រប់ជ្រុងជ្រោយនិងមានតុល្យភាព ហើយកម្ពុជា ប្តេជ្ញាចូលរួមដោះស្រាយបញ្ហាប្រែប្រួលអាកាសធាតុដោយផ្អែកលើសមត្ថភាពនិងធនធានដែលមាន។
ការថ្លែងរបស់លោកនាយករដ្ឋមន្ត្រី ហ៊ុន សែន បែបនេះ បានធ្វើឡើងនៅក្នុងកិច្ចប្រជុំវេទិកាភាពងាយរងគ្រោះនៃអាកាសធាតុ តាមប្រព័ន្ធវីដេអូអនឡាញ កាលពីថ្ងៃទី៧ ខែតុលា ឆ្នាំ២០២០ នៅវិមានសន្តិភាព។
លោកនាយករដ្ឋមន្ត្រី ហ៊ុន សែន បានលើកឡើងតាមរយៈសុន្ទរកថារបស់លោកថា ដូចគ្នាទៅនឹងជំងឺកូវីដ១៩ ការប្រែប្រួលអាកាសធាតុជាបញ្ហាដ៏គួរឱ្យព្រួយបារម្ភមួយទៀត ដែលនឹងបង្កផលវិបាកនិងជះឥទ្ធិពលអវិជ្ជមានធ្ងន់ធ្ងរទៅលើសង្គម សេដ្ឋកិច្ច និងសន្តិសុខក្នុងតំបន់ និងពិភពលោក។
លោកបន្តថា ក្នុងបរិបទនេះ ទោះបីជាថ្នាក់ដឹកនាំប្រទេសនានាលើពិភពលោក មានការចាំបាច់ក្នុងការបង្វែរទិសដៅអាទិភាពនយោបាយនិងធនធាន ដើម្បីប្រយុទ្ធប្រឆាំងនឹងជំងឺកូវីដ១៩ ប៉ុន្តែគួរផ្តល់អាទិភាពនិងធានាឱ្យបាននូវនិរន្តរភាពនៃការអនវុត្តវិធានការដោះស្រាយនិងទប់ទល់នឹងការប្រែប្រួលអាកាសធាតុ ដែលជារបៀបវារៈស្នូលមួយសម្រាប់ការអភិវឌ្ឍសេដ្ឋកិច្ចសង្គម ប្រកបដោយចីរភាព។
លោកនាយករដ្ឋមន្ត្រី បានគូសបញ្ជាក់ថា៖ «នៅក្នុងកម្រិតសកល ខ្ញុំយល់ឃើញថា ការប្រែប្រួលអាកាសធាតុគឺជាបញ្ហាប្រទាក់ក្រឡាគ្នា ដែលត្រូវដោះស្រាយតាមគោលនយោបាយគ្រប់ជ្រុងជ្រោយនិងមានតុល្យភាព ទាំងទិដ្ឋភាពសង្គម សេដ្ឋកិច្ច និងបរិស្ថាន…ខ្ញុំយល់ថា យើងត្រូវបង្កើនធនធានហរិញ្ញវត្ថុ ជាពិសេស ហិរញ្ញប្បទានអាកាសធាតុសម្រាប់ការបន្សាំ ជាដុំកំភួន ដែលប្រទេសអភិវឌ្ឍន៍បានសន្យាកន្លងមក និងផ្ទេរបច្ចេកវិទ្យាជូនដល់ប្រទេសកំពុងអភិវឌ្ឍន៍ ដើម្បីឆ្លើយតបទៅនឹងការផ្លាស់ប្តូរអាកាសធាតុប្រកបដោយប្រសិទ្ធភាព»។
លោកនាយករដ្ឋមន្ត្រី ហ៊ុន សែន បានបន្ថែមថា ទោះបីជាប្រទេសកម្ពុជាបញ្ចេញឧស្ម័នផ្ទះកញ្ចក់តិចតួចក្ដី ប៉ុន្តែកម្ពុជាចង់បង្ហាញពីការប្ដេជ្ញាចិត្ត ដើម្បីដោះស្រាយបញ្ហាប្រែប្រួលអាកាសធាតុដោយផ្អែកលើសមត្ថភាពនិងធនធានដែលមាន៕