ប្រមុខរដ្ឋាភិបាលគ្រោងនឹងបើកការដ្ឋានសាងសង់ស្ពានបេតុងខ្សែកាបមួយខ្សែ ដែលតភ្ជាប់ពីមជ្ឈមណ្ឌលកោះពេជ្រទៅគម្រោងអភិវឌ្ឍន៍កោះនរា ខណ្ឌច្បារអំពៅ រាជធានីភ្នំពេញ នៅចុងខែនេះ ខណៈស្ពានថ្មីនេះ នឹងជួយកាត់បន្ថយការកកស្ទះចរាចរណ៍នៅលើស្ពានព្រះមុនីវង្ស។
លោកនាយករដ្ឋមន្ត្រី ហ៊ុន សែន បានថ្លែងក្នុងពិធីសម្ពោធមជ្ឈមណ្ឌលកម្សាន្តខ្នាតយក្ស ព្រីនស៍ ម៉ាណ័រ កាលពីថ្ងៃម្សិលមិញថា កម្ពុជានៅតែអភិវឌ្ឍទៅមុខ បើទោះបីជាមានឧបសគ្គខ្លះក៏ដោយ។
លោកបន្តថា៖ «ថ្ងៃទី២៦ [ខែតុលា] នេះ ខ្ញុំទៅបើកការដ្ឋានទៀត បើកការដ្ឋានកសាងស្ពាន តភ្ជាប់កោះពេជ្រជាមួយកោះនរា»។
យោងតាមរបាយការណ៍របស់ក្រុមហ៊ុន OCIC ដែលផ្សព្វផ្សាយដោយគេហទំព័ររបស់គណបក្សប្រជាជនកម្ពុជា បានឱ្យដឹងថា ស្ពានបេតុងខ្សែកាបឆ្លងកាត់ទន្លេបាសាក់ ដែលតភ្ជាប់ពីកោះពេជ្រ ទៅគម្រោងអភិវឌ្ឍន៍កោះនរានេះ មានប្រវែងសរុប៨២៤ម៉ែត្រនិងទទឹងទំហំ២៤,៥ម៉ែត្រ។
របាយការណ៍នោះបន្តថា គម្រោងសាងសង់ស្ពានបេតុងខ្សែកាបនេះ ស្ថិតនៅសង្កាត់និរោធ ខណ្ឌច្បារអំពៅ រាជធានីភ្នំពេញ ជាគម្រោងរបស់រាជរដ្ឋាភិបាល តាមរយៈរដ្ឋបាលរាជធានីភ្នំពេញ និងសាងសង់ដោយក្រុមហ៊ុនវិនិយោគទុនអណិកជនកម្ពុជា (OCIC) ដោយគ្រោងប្រើប្រាស់ថវិកាប្រមាណ៣៨លានដុល្លារអាមេរិក និងប្រើពេលសាងសង់រយៈពេល៣៥ខែ។
ប្រភពដដែលបានបន្តថា ក្រៅពីការសាងសង់ស្ពានភ្ជាប់ពីកោះពេជ្រទៅកោះនរានេះ ក្រុមហ៊ុន OCIC ក៏គ្រោងសាងសង់ស្ពានបេតុងភ្ជាប់ពីគម្រោងកោះនរាទៅកាន់ផ្លូវជាតិលេខ១ផងដែរ ដែលគម្រោងនេះគ្រោងចំណាយថវិកាប្រមាណជាង១,៦លានដុល្លារ៕