មនុស្សរាប់សិបនាក់នៅខេត្តសៀមរាប កំពុងធ្វើតេស្តរកកូវីដ១៩ បន្ទាប់ពីបុរសជនជាតិបារាំងម្នាក់ បានចូលទៅបារនិងចូលរួមកម្មវិធីជប់លៀងមួយអំឡុងពេលត្រូវរក្សាខ្លួនឯងឱ្យនៅដាច់ដោយឡែក មុននឹងបុរសនោះត្រូវបានធ្វើតេស្តរកឃើញឆ្លងវីរុសកាលពីចុងសប្ដាហ៍កន្លងមកនេះ នៅចំថ្ងៃទី១៣នៃការរក្សាខ្លួនដាច់ដោយឡែករបស់គាត់។
បុរសជនជាតិបារាំងវ័យ២៧ឆ្នាំម្នាក់ ត្រូវបានធ្វើតេស្តរកមិនឃើញផ្ទុកជំងឺកូវីដ១៩នោះឡើយ ក្រោយពេលធ្វើដំណើរពីប្រទេសបារាំងឆ្លងកាត់សិង្ហបុរីមុនមកដល់ភ្នំពេញកាលពីថ្ងៃទី២០ ខែកញ្ញា ប៉ុន្តែត្រូវបានធ្វើតេស្តរកឃើញផ្ទុកវីរុសនេះនៅថ្ងៃសៅរ៍សប្ដាហ៍មុន។
សាលាបារាំងខេត្តសៀមរាប និយាយថា គ្រូបង្រៀនម្នាក់ក្នុងចំណោមគ្រូបង្រៀនរបស់ខ្លួន ធ្លាប់បានទៅហាងបារ Laundry កាលពីសប្តាហ៍មុន ក្នុងពេលតែមួយជាមួយបុរសនោះដែរ។
សាលារៀនបរទេសនេះ និយាយបន្តទៀតថា គ្រូបង្រៀនម្នាក់នោះ មិនបានប្រាស្រ័យទាក់ទងនិងនិយាយផ្ទាល់ជាមួយគាត់ទេ ប៉ុន្តែគាត់កំពុងរក្សាគម្លាតពីសាលាក្នុងរយៈពេលពីរសប្តាហ៍ ទុកជាការប្រុងប្រយ័ត្ន។ គាត់បានបន្ថែមថា បច្ចុប្បន្ន គាត់បានធ្វើតេស្តអវិជ្ជមាន។
ឪពុកម្តាយរបស់សិស្សានុសិស្ស ក៏ត្រូវបានស្នើសុំឱ្យមានការប្រុងប្រយ័ត្នផងដែរ ប្រសិនបើពួកគេគិតថា ពួកគេបានទាក់ទងជាមួយបុរសនោះ។
សាលារៀនដដែលនេះ និយាយថា៖ «ខ្ញុំគិតថា ពួកគេយល់ពីស្ថានភាពនេះ។ យើងកំពុងតាមដានយ៉ាងដិតដល់»។
សាលារៀនបាននិយាយថា សាលាបានទទួលការអនុញ្ញាតឱ្យបើកជាថ្មីនៅថ្ងៃទី២ ខែកញ្ញា ដោយធ្វើតាមគោលការណ៍សុខភាពយ៉ាងតឹងរ៉ឹង ហើយនិងមិនចង់បិទម្តងទៀតនោះទេ។
ម្ចាស់ហាង Laundry Bar លោក Sylvan Pichard បាននិយាយថា លោកដឹងមិនច្បាស់ថា តើបុរសនោះបានចូលបាររបស់គាត់ឬយ៉ាងណានោះទេ ប៉ុន្តែលោកនិយាយថា គាត់មិនមានការព្រួយបារម្ភអំពីបញ្ហានេះទេ។
លោក Pichard បាននិយាយថា៖ «សម្រាប់ខ្ញុំ រឿងនេះមិនមែនជារឿងដែលត្រូវភ័យខ្លាចនោះទេ។ ខ្ញុំមិនគិតថា វាជាបញ្ហានោះឡើយ»។
គាត់និយាយថា៖ «គាត់គួរតែស្នាក់នៅក្នុងផ្ទះ ប៉ុន្តែប្រសិនបើគាត់ចេញទៅក្រៅមែន គាត់បានចេញហើយ វាយឺតពេលហើយ។ លោកបន្ថែមទៀតថា គ្មានអ្នកណាម្នាក់ស្លាប់នៅក្នុងខេត្តសៀមរាបទេ»។
បុរសជនជាតិបារាំងដែលបានធ្វើតេស្តវិជ្ជមាននោះ ក៏ធ្លាប់បានចូលរួមក្នុងពិធីជប់លៀងនៅក្នុងហាង Navutu Dreams Resort និងហាង Wellness Retreat ដែរ កាលពីថ្ងៃទី២៦ ខែកញ្ញា។ នេះបើយោងតាមអ្នកចាត់ការទូទៅហាង លោក Jeremie Clement បាននិយាយប្រាប់។
លោក Clement បានប្រាប់វីអូឌីថា៖ «រឿងនេះឆ្កួតឡប់បន្តិចដែរ។ គេដើរលេងគ្រប់កន្លែងនៅទីក្រុង។ គ្រប់គ្នាសុទ្ធតែបានដឹង»។
នៅលើបណ្តាញសង្គម មនុស្សមួយចំនួនបង្ហាញអារម្មណ៍តានតឹងនិងបញ្ចេញមតិធ្ងន់ៗ ដោយអំពាវនាវឱ្យដាក់ទោសបុរសដែលត្រូវបានគេធ្វើតេស្តវិជ្ជមាន។ ក្រៅពីនេះ បុរសជនជាតិបារាំងរូបនោះ បានមកចូលរួមក្នុងពិធីជប់លៀងមួយនៅខាងក្រៅជាមួយមនុស្សប្រហែល២០នាក់ផ្សេងទៀត នៅម៉ោងប្រមាណ១០យប់ តែគាត់ចូលរួមក្នុងរយៈពេលខ្លីប៉ុណ្ណោះ។ លោក Clement បានសង្កត់ធ្ងន់ថា នៅពេលនោះ គ្មាននរណាម្នាក់ដឹងថា បុរសនោះមានកូវីដ១៩នោះទេ។
លោក Clement បាននិយាយថា បុគ្គលិកប្រហែល១០នាក់នៅហាង Navutu Dreams Resort និង Wellness Retreat រួមទាំងខ្លួនលោកផ្ទាល់ ក៏ត្រូវបានធ្វើតេស្តកាលពីថ្ងៃអង្គារកន្លងទៅ ហើយមនុស្សគ្រប់គ្នាសុទ្ធតែចេញលទ្ធផលអវិជ្ជមាន។
លោកបានបន្ថែមថា យ៉ាងហោចណាស់មានមនុស្ស៣០នាក់ផ្សេងទៀត កំពុងស្ថិតនៅមណ្ឌលរង់ចាំធ្វើតេស្តកូវីដ១៩ ដោយឥតគិតថ្លៃនិងរយៈលឿនបំផុត។
លោក Clement បាននិយាយថា បញ្ហានេះបានធ្វើឱ្យឧស្សាហកម្មទេសចរណ៍ធ្លាក់ក្នុងស្ថានភាពដ៏លំបាកមួយ ក្រោយពីត្រូវបានខូចខាតរួចមកហើយនៅឆ្នាំនេះ។ ជំងឺរាតត្បាតកូវីដ១៩នេះ បានបង្ខំឱ្យជើងហោះហើរអន្តរជាតិជាច្រើនត្រូវបានបិទ។
គាត់និយាយថា៖ «និយាយដោយស្មោះ យើងមិនចង់ឱ្យមានការផ្សព្វផ្សាយមិនល្អទេ។ យើងមិនអាចគ្រប់គ្រងលើបញ្ហានេះទេ។ នរណាធ្វើដំណើរជុំវិញនោះ ហើយដែលយើងមិនអាចគ្រប់គ្រងបាន ហើយសៀមរាបស្ថិតក្នុងស្ថានភាពតឹងតែង។ គ្រប់គ្នាបិទទ្វារអស់ហើយ»។
យោងតាមប្រភពដែលធ្វើការដោយផ្ទាល់ជាមួយក្រសួងសុខាភិបាល បានចាត់ទុកយន្តការរក្សាខ្លួនដាច់ដោយឡែកនេះថា ជាចំណុចខ្សោយបំផុតនៃការឆ្លើយតបរបស់ប្រទេសកម្ពុជាចំពោះបញ្ហាកូវីដ១៩។
តាមប្រភពដដែលនេះ បានប្រាប់វីអូឌីក្នុងលក្ខខណ្ឌអនាមិកថា មន្ត្រីដែលគេគិតថាមានតួនាទីតាមដានការមកដល់ថ្មីនិងការដាក់ឱ្យនៅដាច់ដោយឡែកនៃជនបរទេសដែលមកប្រទេសកម្ពុជានោះ បាននិយាយថា វាជាបញ្ហាប្រឈមសម្រាប់ក្រុមខេត្ត។
ប្រភពដដែលបាននិយាយថា៖ «វាអាស្រ័យលើអាជ្ញាធរមូលដ្ឋានក្នុងការត្រួតពិនិត្យភាពដាច់ដោយឡែកនៅផ្ទះ ហើយនេះអាចជាកន្លែងដែលការអនុវត្តអាចមិនស្មើគ្នា អាស្រ័យលើខេត្ត»។
ពួកគេបាននិយាយថា ការមកដល់របស់ជនបរទេសពិបាកគ្រប់គ្រង ពីព្រោះពួកគេមានអាសយដ្ឋានមិនទៀងទាត់ ហើយជារឿយៗមានឧបសគ្គផ្នែកភាសា។
ពួកគេនិយាយបន្តថា អ្នកដែលតេស្តវិជ្ជមាន ជាទូទៅប្រឈមមុខនឹងមនុស្សដែលពួកគេប្រាស្រ័យទាក់ទង ដោយចំនួនមនុស្សទាក់ទងផ្ទាល់និងដោយប្រយោលស្ថិតក្នុងចន្លោះពីពីរបីនាក់ទៅដល់ជាង១០០នាក់។
ប្រភពដដែលប្រាប់ថា អ្នកស្វែងរកមនុស្សធ្លាប់ប្រាស្រ័យទាក់ទង បានកែលម្អសមត្ថភាពរបស់ពួកគេយ៉ាងលឿន ដើម្បីកំណត់ថា ពេលណាមនុស្សណាម្នាក់កំពុងនិយាយមិនស្មោះត្រង់ តាមរយៈការសួរសំណួរម្ដងហើយម្ដងទៀត ឬក៏មន្ត្រីថ្នាក់ខ្ពស់សួរទៅកាន់អ្នកជំងឺ។
ប្រភពអនាមិក និយាយថា៖ «យើងមិនមែនជាប៉ូលិសទេ អ៊ីចឹង យើងត្រូវពឹងផ្អែកលើឆន្ទៈនិងជំនឿចិត្តរបស់មនុស្ស ហើយត្រូវប្រាកដថា អ្នកជំងឺកូវីដ១៩មានអារម្មណ៍ថា ត្រូវបានពង្រឹងភាពអង់អាចជាមួយអ្វីដែលពួកគេអាចធ្វើបាន»។
ប្រភពនេះបន្ថែមថា ការអនុវត្តច្បាប់អាចកើតមាន ដើម្បីទទួលបានព័ត៌មានបន្ថែមជុំវិញករណីពាក់ព័ន្ធ។
ក្រុមមន្ត្រីបានស្វែងរកទិន្នន័យសុខាភិបាល ក្នុងនោះមានប្រព័ន្ធតាមដានជំងឺផ្លូវដង្ហើមចាប់ពីចុងខែកញ្ញារហូតដល់បច្ចុប្បន្ន ហើយបានរកឃើញថា គ្មានការចម្លងចូលសហគមន៍នៅកម្ពុជានោះឡើយ។
ប្រភពអនាមិក ប្រាប់ថា៖ «កូវីដ១៩ មិនមែនជាប្រភេទជំងឺលាក់មុខយូរទេ អ៊ីចឹង បើសិនយើងមានការចម្លងក្នុងសហគមន៍ យើងនឹងរំពឹងថារកឃើញ»។
ក្រសួងសុខាភិបាលបាននិយាយនៅដើមសប្ដាហ៍នេះថា បុរសបារាំងដែលត្រូវបានគេធ្វើតេស្តវិជ្ជមាននោះ កំពុងស្ថិតក្រោមការព្យាបាលនៅឯមន្ទីរពេទ្យបង្អែកខេត្តសៀមរាប។
កាលពីថ្ងៃពុធម្សិលមិញ ក្រសួងបានចេញសេចក្ដីប្រកាសព័ត៌មានមួយ ដោយស្នើក្រុមគ្រួសារនិងសាច់ញាតិ ឱ្យជូនដំណឹងដល់អាជ្ញាធរ ប្រសិនបើបងប្អូនឬសាច់ញាតិរបស់ពួកគេដែលទើបតែវិលត្រឡប់មកប្រទេសកម្ពុជាវិញនោះ មិនបានរក្សាខ្លួនឯងនៅដាច់ដោយឡែក។
ក្រសួងនិយាយថា ការអំពាវនាវនេះ គឺសំដៅ «ពង្រឹងការធ្វើចត្តាឡីស័កនៅផ្ទះ» និង «ការបង្ការការចម្លងជំងឺកូវីដ១៩ទៅក្នុងសហគមន៍»។
ក្រសួងនិយាយថា អ្នកដែលធ្វើចត្តាឡីស័កដោយខ្លួនឯង ត្រូវបានស្នើឱ្យស្នាក់នៅក្នុងបន្ទប់ដាច់ដោយឡែក មានខ្យល់អាកាសល្អរយៈពេល១៤ថ្ងៃ ពាក់ម៉ាស់ និងរក្សាគម្លាត១ម៉ែត្រកន្លះពីសមាជិកក្រុមគ្រួសារនិងមនុស្សដទៃទៀត។
ក្រសួងណែនាំឱ្យពួកគេត្រួតពិនិត្យកម្ដៅ២ដងក្នុងមួយថ្ងៃ និងរកមើលរោគសញ្ញាដូចជា ហៀរសំបោរ ពិបាកដកដង្ហើម ឈឺក្បាល និងរាករូស។
អ្នកនាំពាក្យក្រសួងសុខាភិបាល លោកស្រី ឱ វណ្ណឌីន បាននិយាយថា អ្នកដែលត្រូវធ្វើចត្តាឡីស័ក ហើយរំលោភលើលក្ខខណ្ឌចត្តាឡីស័កនេះ អាចត្រូវផ្តន្ទាទោសតាមច្បាប់ជាមួយការផាកពិន័យជាលុយចន្លោះពី២០ម៉ឺនទៅ១លានរៀលឬចោទប្រកាន់ពីបទព្រហ្មទណ្ឌ ប្រសិនបើជនដែលបានរត់គេចនោះ បានធ្វើតេស្តវិជ្ជមានកូវីដ១៩។
ស្ថានទូតបារាំងប្រចាំនៅកម្ពុជា ក៏បានបញ្ជូនអ្នកយកព័ត៌មានឱ្យផ្សព្វផ្សាយនៅក្នុងគេហទំព័ររបស់ខ្លួនថា ប្រជាជនទាំងអស់ដែលមកដល់ប្រទេសកម្ពុជា ចាំបាច់ត្រូវគោរពនូវការដាក់ឱ្យនៅដាច់ពីគ្នារយៈពេលពីរសប្តាហ៍។
អ្នកនាំពាក្យស្ថានទូត លោក Hugo Wavrin បាននិយាយថា៖ «តម្រូវការចាំបាច់» និង «មិនមែនស្ម័គ្រចិត្តទេ»។
ចាប់តាំងពីខែមករាមក កម្ពុជារកឃើញអ្នកឆ្លងជំងឺកូវីដ១៩ ចំនួន២៨០ករណី ក្នុងនោះអ្នកជាសះស្បើយមានចំនួន២៧៦ករណី និង ៤ករណីផ្សេងទៀត កំពុងស្ថិតក្រោមការព្យាបាលបន្តនៅឡើយ៕
បកប្រែនិងកែសម្រួលដោយ រស់ ពុទ្ធិណារោត្ត ពីអត្ថបទដើមជាភាសាអង់គ្លេស
