វៀតណាមបានក្លាយជាប្រទេសដែលមានអត្រាកំណើនសេដ្ឋកិច្ចខ្ពស់ជាងនៅតំបន់អាស៊ាននៅឆ្នាំ២០២០ ហើយក្លាយជាប្រទេសមានអត្រាកំណើនខ្ពស់ជាងគេនៅតំបន់អាស៊ីនៅឆ្នាំ២០២១។
ធនាគារសាជីវកម្មហុងកុង-សៀងហៃ (HSBC) បានចេញរបាយការណ៍ថ្មីៗនេះ បង្ហាញថា បើទោះជាស្ថិតនៅក្នុងស្ថានភាពដែលប្រឈមដោយសារមេរោគកូវីដ១៩ តែនៅពាក់កណ្តាលឆ្នាំ២០២០នេះ សេដ្ឋកិច្ចវៀតណាមនៅតែរក្សាអត្រាកំណើនបានចំនួន១,៨ភាគរយ។ បើគិតលទ្ធផលជារួមនៅឆ្នាំ២០២០ វៀតណាមនឹងមានអត្រាកំណើតសេដ្ឋកិច្ចដល់២,៦ភាគរយ ដែលចំនួននេះខ្ពស់ជាងគេនៅតំបន់អាស៊ាន។
របាយការណ៍ដដែលបញ្ជាក់ថា នៅឆ្នាំ២០២១ វៀតណាមនឹងទទួលបានអត្រាកំណើនសេដ្ឋកិច្ច ចំនួន៨,១ភាគរយ ដែលចំនួននេះខ្ពស់ជាងគេបើប្រៀបធៀបជាមួយអត្រាកំណើនសេដ្ឋកិច្ចរបស់ប្រទេសផ្សេងៗទៀតនៅតំបន់អាស៊ី។
រដ្ឋាភិបាលរបស់ប្រទេសវៀតណាមក៏បានខិតខំក្នុងការទប់ស្កាត់នូវការឆ្លងរីករាលដាលនៃជំងឺកូវីដ១៩ ដើម្បីជាចំណែកដ៏សំខាន់មួយក្នុងការចូលរួមធ្វើឱ្យប្រទេសនេះមានកំណើនសេដ្ឋកិច្ចកាន់តែខ្លាំង។
ធនាគារ HSBC បានបន្ថែមថា ដោយមានភាពជោគជ័យក្នុងការទប់ស្កាត់បាននៃជំងឺកូវីដ១៩ ប្រទេសវៀតណាមត្រូវបានចាត់ទុកថា ជាប្រទេសមួយក្នុងចំណោមប្រទេសអាស៊ានទាំងអស់ ដែលមានសក្ដានុពលនៃកំណើនសេដ្ឋកិច្ចខ្ពស់ជាងគេនៅក្នុងឆ្នាំ២០២០។
ធនាគារ HSBC ជឿជាក់ថា ប្រទេសវៀតណាមនឹងទទួលបានអត្ថប្រយោជន៍ច្រើនពីការស្ទុះងើបឡើងវិញនៃបច្ចេកវិទ្យា និងមានស្ថិរភាពលើការវិនិយោគដោយផ្ទាល់ពីបរទេស (FDI) នៅក្នុងឆ្នាំខាងមុខ។
ធនាគារ HBSC បានបន្ថែមថា៖ «អត្រាកំណើនសេដ្ឋកិច្ចរបស់ប្រទេសវៀតណាមឆ្នាំនេះ នៅតែកំពុងរីកចម្រើនយ៉ាងខ្លាំង ហើយនឹងក្លាយជាប្រទេសដែលមានកំណើនសេដ្ឋកិច្ចលឿនបំផុតក្នុងតំបន់នៅឆ្នាំ២០២១»។
បច្ចុប្បន្ន វៀតណាមកំពុងចាប់ដៃគូវិនិយោគចម្រុះគ្នា រួមទាំងបណ្តុំប្រទេសសេរី ដូចជា សហភាពអឺរ៉ុប អាមេរិក អង់គ្លេស និងកូរ៉េខាងត្បូង ជាដើម៕