ក្រសួងសុខាភិបាលរកឃើញករណីឆ្លងជំងឺកូវីដ១៩ថ្មីចំនួន១ករណីទៀត ទៅលើបុរសជនជាតិខ្មែរដែលធ្វើដំណើរមកពីប្រទេសកូរ៉េខាងត្បូង និងមានករណីស្រ្តីជនជាតិខ្មែរម្នាក់បានជាសះស្បើយពីជំងឺនេះ។
ក្នុងសេចក្ដីប្រកាសព័ត៌មានរបស់ក្រសួងសុខាភិបាល នៅថ្ងៃសុក្រនេះ បានឱ្យដឹងថា បុរសដែលបានធ្វើតេស្តវិជ្ជមានវីរុសកូវីដ-១៩នេះ មានអាយុ២៩ឆ្នាំ ស្នាក់នៅរាជធានីភ្នំពេញ ដោយលោកបានធ្វើដំណើរពីប្រទេសកូរ៉េខាងត្បូងតាមជើងហោះហើរមកដល់ប្រទេសកម្ពុជា កាលពីថ្ងៃទី០៧ ខែតុលា។
ក្រសួងបន្តថា បច្ចុប្បន្ន អ្នកជំងឺថ្មីម្នាក់នេះបានកំពុងសម្រាកព្យាបាលនៅមន្ទីរពេទ្យខ្មែរ-សូវៀត រាជធានីភ្នំពេញ។ រីឯមនុស្សចំនួន១២៧ផ្សេងទៀតដែលបានរួមដំណើរជាមួយបុរសម្នាក់នេះ មានលទ្ធផលតេស្តអវិជ្ជមានវីរុសកូវីដ១៩ ហើយក្រសួងបានដាក់ឱ្យពួកគេធ្វើចត្តាឡីស័កចំនួន១៤ថ្ងៃ នៅទីតាំង៤កន្លែងផ្សេងៗគ្នាក្នុងរាជធានីភ្នំពេញ។
ក្រសួងក៏បានឱ្យដឹងទៀតថា មានករណីស្រ្តីម្នាក់ អាយុ៣៣ឆ្នាំ ដែលជាអ្នកធ្វើដំណើរមកពីសហរដ្ឋអាមេរិក ដោយបានបន្តជើងហោះហើរពីប្រទេសចិនមកកម្ពុជា បានជាសះស្បើយ បន្ទាប់ពីបានសម្រាកព្យាបាលនៅមន្ទីរពេទ្យបង្អែកខេត្តបាត់ដំបង។
បើតាមក្រសួងសុខាភិបាល គិតត្រឹមម៉ោង៧ព្រឹក ថ្ងៃទី០៩ ខែតុលា ឆ្នាំ២០២០នេះ កម្ពុជាបានរកឃើញករណីឆ្លងជំងឺកូវីដ១៩ សរុបចំនួន២៨២នាក់ ក្នុងនោះបានព្យាបាលជាសះស្បើយ ចំនួន២៧៧នាក់ និងអ្នកកំពុងសម្រាកព្យាបាលនៅមន្ទីរពេទ្យចំនួន០៥នាក់៕