អាជ្ញាធររាជធានីភ្នំពេញ បានជំរុញទៅក្រុមហ៊ុនអភិវឌ្ឍន៍លំនៅឋានទាំងអស់នៅរាជធានីភ្នំពេញ ឱ្យបំពាក់កាមេរ៉ាសុវត្ថិភាពនិងត្រៀមរថយន្តពន្លត់អគ្គិភ័យ ដោយថា ដើម្បីការពារសុវត្ថិភាពរបស់ប្រជាពលរដ្ឋរស់នៅក្នុងតំបន់អភិវឌ្ឍន៍របស់ពួកគេ។
អ្នកនាំពាក្យសាលារាជធានីភ្នំពេញ លោក ម៉េត មាសភក្តី ប្រាប់វីអូឌីនៅថ្ងៃនេះថា អគ្គស្នងការនគរបាលជាតិ លោក នេត សាវឿន និងលោក ឃួង ស្រេង អភិបាលរាជធានីភ្នំពេញ បានអំពាវនាវរួមគ្នាឱ្យម្ចាស់បុរីនិងខុនដូទាំងអស់ក្នុងរាជធានីភ្នំពេញ បំពាក់កាមេរ៉ាសុវត្ថិភាព និងត្រៀមបង្ការពន្លត់អគ្គិភ័យឬរថយន្តពន្លត់អគ្គិភ័យ មានប្រព័ន្ធទូរសព្ទទាន់ហេតុការណ៍២៤ម៉ោងលើ២៤ម៉ោង មានច្រកចេញចូលត្រឹមត្រូវ ដើម្បីងាយស្រួលគ្រប់គ្រងស្ថិតិប្រជាពលរដ្ឋនិងសុវត្ថិភាពសន្តិសុខយាមកាមជាដើម។
លោកបន្តថា បច្ចុប្បន្ននេះមានម្ចាស់បុរីនិងខុនដូមួយចំនួន បានបំពាក់កាមេរ៉ាសុវត្ថិភាពនិងរថយន្តអគ្គិភ័យ ដើម្បីបង្កលក្ខណៈងាយស្រួលក្នុងការកំណត់មុខសញ្ញា និងឈានដល់ការបង្ក្រាបបទល្មើសដែលកើតឡើងជាយថាហេតុណាមួយក្នុងបុរីទាំងនោះ។
អ្នកនាំពាក្យសាលារាជធានីភ្នំពេញរូបនេះ បញ្ជាក់ថា អាជ្ញាធរមិនចាប់បង្ខំឱ្យម្ចាស់បុរីនិងខុនដូទាំងនោះអនុវត្តតាមទាំងស្រុងនោះទេ ប៉ុន្តែលោកថា បើម្ចាស់ទាំងនោះធ្វើបាន អ្នកដែលទទួលបានប្រយោជន៍ គឺក្រុមហ៊ុននិងប្រជាពលរដ្ឋរស់នៅក្នុងទីតាំងនោះ។
លោក ម៉េត មាសភក្ដី ប្រាប់៖ «បើសិនជាវា [ម្ចាស់បុរី] មានសម្ភារបង្ការទប់ស្កាត់បានល្អប្រសើរ ធ្វើឱ្យអតិថិជននៅក្នុងបុរីខ្លួនឯងបង្កើននូវទំនុកចិត្ត បង្កើននូវភាពពេញចិត្តជាមួយបុរីរបស់ខ្លួនដែរ ក៏ប៉ុន្តែ ក៏បានផ្សារភ្ជាប់ជាមួយនឹងសង្គមឬជាមួយអាជ្ញាធររបស់យើង ដែលពាក់ព័ន្ធជាមួយវិស័យបង្ការឬទប់ស្កាត់បញ្ហាអគ្គិភ័យដែរ»។
ប្រធានផ្នែកគ្រប់គ្រងបុរី ប៉េងហួត នៅទូទាំងរាជធានីភ្នំពេញ អ្នកនាង ជាវ សម្បត្តិ ប្រាប់ថា កាមេរ៉ាសុវត្ថិភាពត្រូវបានក្រុមហ៊ុនបំពាក់នៅតាមច្រកចេញចូលនិងសួនកម្សាន្ត ស្ថិតនៅក្នុងបរិវេណបុរីរបស់ក្រុមហ៊ុន។ តំណាងក្រុមហ៊ុនមួយនេះ ឱ្យដឹងទៀតថា ក្រុមហ៊ុនក៏បានត្រៀមរថយន្តពន្លត់អគ្គិភ័យចំនួន៣គ្រឿងនិងរថយន្តដឹកទឹកចំនួន១២គ្រឿង សម្រាប់ជួយពន្លត់អគ្គិភ័យនៅក្នុងបុរីនានារបស់ក្រុមហ៊ុន។
អ្នកគ្រប់គ្រងបុរីរូបនោះ បញ្ជាក់ថា កន្លងមក បទល្មើសចាប់ជំរិត លួច និងអគ្គិភ័យឆាបចេះតាមរយៈភ្លើងទាននៅក្នុងបុរី មានតិចតួចតែប៉ុណ្ណោះ ហើយបុរីមានការសហការជាមួយសមត្ថកិច្ចបង្ក្រាបទាន់ពេលនិងមានប្រសិទ្ធភាពទៀតផង។
អ្នកនាងនិយាយថា៖ «បើនិយាយសុវត្ថិភាពមួយរយភាគរយ មិនអាចទេ កន្លែងណាក៏មានដែរ ប៉ុន្តែគ្រាន់តែថា បញ្ហាកើតមានហើយ យើងក្តាប់បាន ដោះស្រាយបាន ហើយយើងសហការជាមួយសមត្ថកិច្ច មានន័យថា យើងផ្តល់សន្តិសុខសុវត្ថិភាពជូនអតិថិជនរបស់យើង»។
បើតាមគេហទំព័ររបស់ក្រសួងព័ត៌មានចុះថ្ងៃ៩ ខែតុលានេះ បានបញ្ជាក់ថា បច្ចុប្បន្ននេះ នៅរាជធានីភ្នំពេញ មានបុរីចំនួន១៤៩ទីតាំង និងខុនដូចំនួន១៣៧ទីតាំង៕
