អំពើហិង្សាលើស្ត្រីជាផ្នែកមួយដែលលោកនាយករដ្ឋមន្ត្រី ហ៊ុន សែន លើកយកមកពិភាក្សាក្នុងកិច្ចប្រជុំនៅទីស្តីការគណៈរដ្ឋមន្ត្រី នាថ្ងៃសុក្រនេះ ជាអ្វីដែលលោកថា ដើម្បីបង្កើត«ផែនការសកម្មភាពជាតិទប់ស្កាត់អំពើហិង្សាលើស្ត្រី ២០១៩-២០២៣»។
ប្រធានក្រុមអង្គភាពអ្នកនាំពាក្យរដ្ឋាភិបាល លោក ផៃ ស៊ីផាន បាននិយាយតាមរយៈហ្វេសប៊ុករបស់លោកនាព្រឹកនេះថា ផែនការយុទ្ធសាស្ត្រអភិវឌ្ឍន៍ជាតិ ឆ្នាំ២០១៩-២០២៣ នឹងពង្រឹងគោលដៅអភិវឌ្ឍន៍ប្រកបដោយចីរភាពរបស់កម្ពុជា ក្នុងគោលដៅទី៥ ស្តីពីការសម្រេចឱ្យបានសមភាពយេនឌ័រ និងពង្រឹងអំណាចស្ត្រីនិងកុមារគ្រប់រូប។
លោក ផៃ ស៊ីផាន បន្តថា សេចក្តីព្រាងផែនការនេះ បានដាក់ចេញនូវយុទ្ធសាស្ត្រចំនួន៤ ដូចជា ការបង្ការទប់ស្កាត់ កិច្ចការពារផ្លូវច្បាប់ សេវាពហុវិស័យ ច្បាប់និងគោលនយោបាយ និងការតាមដានត្រួតពិនិត្យនិងការវាយតម្លៃ។
ម្យ៉ាងទៀត ផែនការនេះក៏ដាក់បញ្ជូលផងដែរនូវផែនទីតម្រង់ទិសសម្រាប់ក្រសួង ស្ថាប័នពាក់ព័ន្ធទាំងថ្នាក់ជាតិនិងក្រោមជាតិ អង្គការសង្គមស៊ីវិល វិស័យឯកជន និងប្រព័ន្ធផ្សព្វផ្សាយ ក្នុងគោលបំណងឆ្ពោះទៅកាត់បន្ថយទម្រង់នៃអំពើហិង្សាលើស្ត្រីនិងក្មេងស្រីឱ្យកាន់តែមានប្រសិទ្ធភាព។
វិទ្យាស្ថានជាតិស្ថិតិនៃក្រសួងផែនការ និងក្រសួងកិច្ចការនារី នៅឆ្នាំ២០១៥ បានបង្ហាញថា ២០ភាគរយនៃស្ត្រីកម្ពុជាធ្លាប់ទទួលរងអំពើហិង្សាលើរូបរាងកាយនិងផ្លូវភេទពីដៃគូរបស់ពួកគេ ៩០ភាគរយនៃស្ត្រីទាំងនោះរងគ្រោះយ៉ាងធ្ងន់ធ្ងរដែលចាំបាច់ទាមទារឱ្យមានការថែទាំសុខភាព។
អង្គការអន្តរជាតិយូនីសែហ្វ រកឃើញដែរថា នៅឆ្នាំ២០១៧ កុមារជាង២០ភាគរយរស់នៅជាមួយម្តាយដែលជាជនរងគ្រោះដោយអំពើហិង្សាដោយផ្លូវកាយ ផ្លូវភេទ និងផ្លូវអារម្មណ៍ដោយប្តីឬដៃគូរបស់ពួកគេ៕