រដ្ឋាភិបាលបានជំរុញទៅសាធារណជននិងអាជ្ញាធរពាក់ព័ន្ធ ឱ្យពង្រឹងវិធានការបង្ការសុវត្ថិភាពសុខភាពអំឡុងពិធីបុណ្យអុំទូកនៅចុងខែនេះ ដោយថា ដើម្បីទប់ស្កាត់ហានិភ័យបណ្ដាលមកពីការឆ្លងរីករាលដាលនៃជំងឺកូវីដ១៩។
ពិធីបុណ្យអុំទូក បណ្ដែតប្រទីប អកអំបុក និងសំពះព្រះខែ ដែលគ្រោងរៀបចំធ្វើនៅថ្ងៃទី៣០ ខែតុលា ដល់ថ្ងៃទី១ ខែវិច្ឆិកាក្នុងឆ្នាំនេះ ត្រូវបានរដ្ឋាភិបាលសម្រេចផ្អាកទៅវិញ ដោយសារតែក្ដីបារម្ភជុំវិញការឆ្លងរីករាលដាលនៃវីរុសកូរ៉ូណាឬជំងឺកូវីដ១៩ ប៉ុន្តែពិធីបុណ្យប្រពៃណីជាតិមួយនេះ ត្រូវបានរដ្ឋាភិបាលអនុញ្ញាតឱ្យរៀបចំនៅតាមបណ្ដាខេត្តដដែល។
ក្នុងសេចក្ដីជូនដំណឹងកាលពីថ្ងៃម្សិលមិញនេះ ក្រសួងសុខាភិបាលបានក្រើនរំឭកទៅដល់មហាជននិងអាជ្ញាធរពាក់ព័ន្ធ ឱ្យពង្រឹងការទប់ស្កាត់ការឆ្លងរីករាលដាលនៃជំងឺផ្លូវដង្ហើមនេះ។
ក្រសួងសុខាភិបាលបានហាមឃាត់ការប្រមូលផ្ដុំមនុស្សធំៗ ដោយណែនាំឱ្យកំណត់ចំនួនកីឡាករអុំទូកមិនឱ្យលើសពី១០នាក់ អ្នកចូលរួមទស្សនាមិនឱ្យលើសពី៦០នាក់ ហើយចំនួនទូកចូលរួមប្រណាំងមិនឱ្យលើសពី៦ទូកនោះឡើយ។
ក្រសួងក៏បានជំរុញទៅស្ថាប័នពាក់ព័ន្ធឱ្យបន្តអនុវត្តវិធានការអនាម័យនិងសុវត្ថិភាពចាំបាច់មួយចំនួន ព្រមទាំងផ្សព្វផ្សាយឱ្យបានទូលំទូលាយដល់ប្រជាពលរដ្ឋពីវិធីបង្ការទប់ស្កាត់ការរីករាលដាលជំងឺកូវីដ១៩។
ក្រសួងសុខាភិបាលបញ្ជាក់ថា វិធានការក្នុងការទប់ស្កាត់ រួមមាន ការរៀបចំសណ្តាប់ធ្នាប់ បរិស្ថាន សន្តិសុខ និងសុវត្ថិភាពនៅវត្តអារាម និងទីលានប្រណាំងទូក រួមជាមួយការផ្សព្វផ្សាយដល់សាធារណជនឱ្យបង្កើនការប្រុងប្រយ័ត្នខ្ពស់ពីវិធានសុខាភិបាលក្នុងការបង្ការជំងឺកូវីដ១៩ និងរៀបចំឱ្យមានកន្លែងពិនិត្យសុខភាព វាស់កម្តៅ មុនពេលចូលក្នុងទីធ្លាវត្តអារាមឬទីលានប្រណាំងទូក និងត្រូវមានអាល់កុលឬជែលលាងដៃជាប្រចាំ។
គិតត្រឹមថ្ងៃនេះ កម្ពុជារកឃើញមនុស្ស២៨២នាក់ឆ្លងវីរុសកូរ៉ូណានៅទូទាំងប្រទេស ក្នុងនោះអ្នកជំងឺ២៧៧នាក់ ត្រូវបានព្យាបាលជាសះស្បើយហើយ ខណៈអ្នកជំងឺ៥នាក់ទៀត កំពុងស្ថិតក្រោមការព្យាបាលបន្ត៕
