ក្រុមមន្ត្រីបានឱ្យដឹងថា ខេត្តចំនួន៣នៅភាគពាយព្យរបស់ប្រទេសកម្ពុជា កំពុងរងទឹកជំនន់ដែលបណ្ដាលមកពីភ្លៀងធ្លាក់ជាប់ៗគ្នារយៈពេលពីរបីថ្ងៃចុងក្រោយមកនេះ ហើយកម្រិតទឹកនៅទំនប់ទឹកប្រាំពីរមករា រាជធានីភ្នំពេញ ក៏កំពុងស្ថិតក្នុងភាពប្រកាសអាសន្នផងដែរ។
អ្នកនាំពាក្យក្រសួងធនធានទឹក និងឧតុនិយម លោក ចាន់ យុត្ថា ប្រាប់វីអូឌីនៅថ្ងៃសុក្រនេះថា ខេត្តពោធិ៍សាត់ បាត់ដំបង និងខេត្តបន្ទាយមានជ័យ រងទឹកជំនន់ដោយទឹកភ្លៀងខ្លាំងជាងគេ ខណៈទឹកជំនន់នៅខេត្តបាត់ដំបងជិតស្រកចុះវិញហើយ។
លោក ចាន់ យុត្ថា ប្រាប់ថា៖ «នៅបន្ទាយមានជ័យ ដោយសារតែទឹកវាហៀរមកពីថៃ។ អ៊ីចឹងទេអាចថា នៅខាងអូរបីជាន់ អីតិចតួច ប៉ុន្តែអាជ្ញាធរខេត្តបន្ទាយមានជ័យ គេបានចាត់វិធានការណ៍រួចរាល់អស់ហើយ»។
ប្រធានមន្ទីរធនធានទឹក និងឧតុនិយមខេត្តបាត់ដំបង លោក ឡុង ផល្គុន បានឱ្យដឹងថា កម្រិតទឹកស្ទឹងមោង បានហក់ឡើងដល់កម្រិតដែលត្រូវប្រកាសអាសន្នហើយ ហើយលោកថា អាជ្ញាធរកំពុងព្យាយាមទប់ទំនប់ទឹកប្រវែងជាង៣០ម៉ែត្រដែលត្រូវទឹកបុកដាច់នៅព្រឹកថ្ងៃនេះ ដើម្បីរក្សាទឹកទុក។
លោក ឡុង ផល្គុន ប្រាប់ថា៖ «ស្ទឹងមោងឡើងខ្ពស់ដល់ចំណុចដែលយើងជម្រាបជូនដំណឹងឱ្យមានការប្រុងប្រយ័ត្ន។ ស្ទឹងដទៃទៀតអត់ទាន់អីទេ»។
លោក ចាន់ យុត្ថា បានបន្តទៀតថា សម្រាប់ខេត្តពោធិ៍សាត់វិញ ស្ថានភាពជំនន់ទឹកភ្លៀងមានសភាពធ្ងន់ធ្ងរជាងគេ ដោយសារនៅតំបន់ជួរភ្នំក្រវាញដែលជាតំបន់ផ្ទៃរងទឹកភ្លៀង មានភ្លៀងធ្លាក់ច្រើន ក្នុងនោះកន្លែងខ្លះទឹកភ្លៀងធ្លាក់មានកម្រិតចន្លោះពី២០០ទៅ២៣០មីលីម៉ែត្រ។
លោក ចាន់ យុត្ថា បន្តថា៖ «ស្ទឹងពោធិ៍សាត់ វាជន់ឡើងខ្លាំង ដោយសារតែតំបន់ជួរភ្នំក្រវាញ ក្នុងរយៈពេលពីរបីថ្ងៃកន្លងមកនេះ ភ្លៀងធ្លាក់ជាប់គ្នា ចូលប្រហែលជាកន្លែងខ្លះជាង២០០មីលីម៉ែត្រ»។
អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ លោក ឃុន សុខា បានឱ្យដឹងដែរថា ទឹកស្ទឹងនៅស្រុកវាលវែង បានចាប់ផ្តើមជន់លិចនៅយប់ថ្ងៃព្រហស្បតិ៍ម្សិលមិញ និងចាប់ផ្តើមឡើងគំហុកខ្លាំង ហើយហូរបុកមកទីរួមខេត្តពោធិ៍សាត់នៅព្រឹកថ្ងៃសុក្រនេះ។
លោកបន្តថា ជំនន់ទឹកភ្លៀងនេះបានបង្កផលប៉ះពាល់ដល់សង្កាត់ចំនួន៥ក្នុងទីរួមខេត្ត និងឃុំចំនួន៧នៅស្រុកកណ្តៀង និងឃុំមួយចំនួននៅស្រុកវាលវែង។
លោក ឃុន សុខា ប្រាប់ថា៖ «សម្រាប់ផលប៉ះពាល់និងចំនួនមនុស្ស យើងអត់ទាន់បានទទួលព័ត៌មានទេ គេគ្រាន់តែប្រាប់ថា នៅខេត្តពោធិ៍សាត់ គឺស្រុកកណ្តៀង និងទីរួមខេត្ត ទឹកហៀរស្ទឹង និងស្រុកវាលវែងលិច ប៉ុន្តែថ្នាក់ដឹកនាំខេត្តកំពុងចុះអន្តរាគមន៍ហើយ»។
អភិបាលរងខេត្តពោធិ៍សាត់ លោក គិត សុផា បានឱ្យដឹងថា ទឹកជំនន់បានជន់លិចលង់យ៉ាងខ្លាំងនៅក្រុងពោធិ៍សាត់និងស្រុកក្រវាញ ហើយលោកថា អាជ្ញាធរកំពុងព្យាយាមជួយសង្គ្រោះប្រជាពលរដ្ឋដែលរងគ្រោះដោយទឹកជំនន់នេះ។
លោក គិត សុផា ប្រាប់ថា៖ «កម្រិតទឹកស្ទឹងពោធិ៍សាត់ដែលត្រូវប្រកាសអាសន្ន គឺកម្ពស់៥,៧ម៉ែត្រ ប៉ុន្តែឥលូវចូលដល់៦ម៉ែត្រហើយ។ មេឃនៅតែភ្លៀង កម្ពស់ទឹកស្ទឹងនៅតែឡើងអ៊ីចឹង»។
ក្រៅពីនោះ លោកថា កម្ពស់ទឹកនៃទំនប់ប្រាំពីរមករា ក្នុងខណ្ឌដង្កោ រាជធានីភ្នំពេញ ក៏បានឡើងដល់កម្រិតប្រកាសអាសន្នផងដែរ។
កាលពីថ្ងៃទី៥ ខែតុលា ក្រសួងធនធានទឹក និងឧតុនិយម បានជូនដំណឹងពីស្ថានភាពអាកាសធាតុ ដោយបញ្ជាក់ថា ប្រព័ន្ធសម្ពាធទាប បានបន្តលាតសន្ធឹងឆ្លងកាត់លើកម្ពុជា ដោយភ្ជាប់នឹងសម្ពាធទាបមួយនៅលើសមុទ្រចិនខាងត្បូង ដែលធ្វើឱ្យបណ្តាខេត្តស្ទើរទូទាំងប្រទេសកម្ពុជា ចាប់ពីថ្ងៃទី៧ ដល់ថ្ងៃទី៩ ខែតុលា មានភ្លៀងធ្លាក់និងខ្យល់កើនឡើងច្រើន។
ក្រសួងបន្តថា បណ្តារាជធានី-ខេត្តនៅភាគខាងត្បូង និងខេត្តនៅភាគខាងកើតជាប់ប្រទេសវៀតណាម នឹងអាចមានភ្លៀងធ្លាក់ច្រើន ដែលធ្វើឱ្យទីទំនាបក្បែរផ្លូវទឹក តំបន់ភ្នំ និងតំបន់ជួរភ្នំក្រវាញ ប្រឈមខ្ពស់នឹងជំនន់ទឹកភ្លៀង ខណៈបណ្តាខេត្តតំបន់ជាប់មាត់សមុទ្រ អាចមានភ្លៀង ខ្យល់បក់បោកខ្លាំងនិងរលកសមុទ្រខ្ពស់ៗ។
ក្រសួងក៏បានអំពាវនាវដល់ប្រជាពលរដ្ឋទាំងអស់ ជាពិសេសប្រជាពលរដ្ឋរស់នៅទីប្រជុំជន ទីទំនាបក្បែរផ្លូវទឹក និងប្រជានេសាទ រួមទាំងអ្នកធ្វើដំណើរតាមសមុទ្រ បង្កើនការប្រុងប្រយ័ត្នខ្ពស់ ដើម្បីចៀសវាងនូវគ្រោះថ្នាក់ផ្សេងៗជាយថាហេតុ៕