គណៈកម្មការការពារជាតិរបស់សភាអង់គ្លេស បាននិយាយកាលពីថ្ងៃព្រហស្បតិ៍ថា ខ្លួនបានរកឃើញភស្តុតាងច្បាស់ការថា ក្រុមហ៊ុនទូរគមនាគមន៍ចិន Huawei បានឃុបឃិតជាមួយរដ្ឋាភិបាលចិនតាមប្រព័ន្ធ 5G ហើយថា ដើម្បីសុវត្ថិភាពជាតិ ត្រូវឈប់ប្រើប្រាស់សម្ភារក្រុមហ៊ុនមួយនេះ។
នាយករដ្ឋមន្រ្តីអង់គ្លេស លោក Boris Johnson កាលពីខែកក្កដា បានអនុម័តឱ្យឧបករណ៍របស់ក្រុមហ៊ុន Huawei ដំណើរការនៅអង់គ្លេសដោយប្រើប្រព័ន្ធ 5G និងកិច្ចសន្យាដែលបានអនុម័តនេះ នឹងត្រូវបញ្ចប់នៅចុងឆ្នាំ២០២៧។
ប្រធានគណៈកម្មការការពារជាតិ លោក Tobias Ellwood បាននិយាយថា លោកខាងលិចត្រូវតែរួបរួមគ្នាជាបន្ទាន់ដើម្បីការពារលើការឈានមុខខាងផ្នែកបច្ចេកវិទ្យារបស់ប្រទេសចិន។ លោកថា មិនត្រូវធ្វើឱ្យមានការអន់ថយលើសន្តិសុខជាតិនៅអឺរ៉ុប ដោយសារតែបច្ចេកវិទ្យារបស់ចិននោះទេ។
គណៈកម្មការ មិនបានបកស្រាយលម្អិតអំពីលក្ខណៈពិតនៃបច្ចេកវិទ្យារបស់ Huawei នោះទេប៉ុន្តែបាននិយាយថា ខ្លួនបានឃើញភស្តុតាងច្បាស់នៃការឃុបឃិតរបស់ក្រុមហ៊ុន Huawei ជាមួយបក្សកុម្មុយនីស្តចិន។
ក្រុមហ៊ុន Huawei ប្រតិកម្មថា ការចោទប្រកាន់របស់គណៈកម្មការសភាអង់គ្លេសនេះ មិនឆ្លុះបញ្ចាំងពីការពិតទេ គឺវាគ្រាន់តែជាទស្សនៈមួយតែប៉ុណ្ណោះ។ ក្រុមហ៊ុនបញ្ជាក់ថា មនុស្សគ្រប់គ្នានឹងមើលឃើញថា ការចោទប្រកាន់នេះគ្មានមូលដ្ឋានច្បាស់លាស់នោះទេ ពីព្រោះថា ក្រុមហ៊ុនHuawei បានបើកដំណើរការនៅអង់គ្លេសរយៈពេល២០ឆ្នាំហើយ មិនដែលមានបញ្ហាអ្វីកើតឡើងនោះទេ។
អាមេរិកនិងសម្ព័ន្ធមិត្តបានចោទប្រកាន់ថា Huawei ត្រូវបានប្រើប្រាស់ជាឧបករណ៍សម្រាប់ជាចារកម្មឱ្យរដ្ឋចិន។ ប៉ុន្តែក្រុមហ៊ុន Huawei បានបដិសេធម្តងហើយម្តងទៀត ហើយបញ្ជាក់ថា អាមេរិកមានការច្រណែនចំពោះភាពជោគជ័យរបស់ក្រុមហ៊ុន Huawei។
រដ្ឋមន្ត្រីរបស់អង់គ្លេសជាច្រើនរូបបាននិយាយថា ពិភពលោកកំពុងតែចាប់អារម្មណ៍និងមានការប្រុងប្រយ័ត្នលើបច្ចេកវិទ្យារបស់ក្រុមហ៊ុន Huawei ដែលបង្កើតឡើងកាលពីឆ្នាំ១៩៨៧ ដោយវិស្វករជាអតីតវិស្វករយោធាចូលនិវត្តន៍នៃកងទ័ពចិន។
គណៈកម្មការការពារជាតិ បាននិយាយថា ខ្លួនបានគាំទ្រការសម្រេចចិត្តរបស់នាយករដ្ឋមន្រ្តីអង់គ្លេស លោក Boris Johnson លើការសហការជាមួយក្រុមហ៊ុន Huawei ប៉ុន្តែត្រូវរឹតបន្តឹងឱ្យបានខ្លាំងបំផុតឬលុបបំបាត់កុំឱ្យមានចំពោះប្រព័ន្ធ 5G៕
