លោកនាយករដ្ឋមន្ត្រីហ៊ុន សែន បញ្ជាក់ថា ស្ថានភាពសេដ្ឋកិច្ចកម្ពុជាមានភាពល្អប្រសើរនៅក្នុងពេលឆ្លងរាលដាលមេរោគកូវីដ១៩នេះ ហើយនៅមានលទ្ធភាពបង់សងបំណុលបរទេសតាមការកំណត់។
លើគេហទំព័រហ្វេសប៊ុក អ្នកនាំពាក្យរដ្ឋាភិបាល លោក ផៃ ស៊ីផាន បានសរសេរថា ក្នុងកិច្ចប្រជុំពេញអង្គគណៈរដ្ឋមន្ត្រី កាលពីថ្ងៃទី៩ខែតុលា ឆ្នាំ២០២០ លោកនាយករដ្ឋមន្ត្រី ហ៊ុន សែន បានថ្លែងថា កម្ពុជាស្ថិតនៅស្ថានភាពល្អប្រសើរ បើសិនប្រៀបធៀបទៅនិងប្រទេសដទៃមួយចំនួន លើវិស័យហិរញ្ញវត្ថុ នៅសម័យ Covid-19។
ករណីនេះ រដ្ឋាភិបាលកម្ពុជា មិនបានស្នើដល់ម្ចាស់បំណុល ក្នុងកិច្ចពន្យារការបង់ប្រាក់កម្ចី ឬកាតព្វកិច្ចហិរញ្ញវត្ថុអន្តរជាតិនោះទេ ពីព្រោះកម្ពុជាមានសកម្មភាពសកម្មបញ្ចេញសាច់ប្រាក់ គាំទ្រកម្មវិធីវិនិយោគ ដូចជា នៅក្នុង វិស័យហេដ្ឋារចនាសម្ព័ន្ធផ្លូវថ្នល់ (កំពង់សោម-សៀមរាប) ជាដើម។
ទំព័រហ្វេសប៊ុកដដែលបញ្ជាក់ថា មិនតែប៉ុណ្ណោះ នៅក្នុងវិស័យហិរញ្ញប្បទាន ក៏មានសកម្មភាពរស់រវើក ដូចជា ការសង្រ្គោះជនក្រីក្រ អ្នកងាយរងគ្រោះ និងកិច្ចបណ្ដាក់ទុនសាធារណៈ ក្នុងការកសាងផ្លូវថ្នល់ ប្រឡាយទឹក ឬគម្រោងខ្នាតតូចនៅតាមមូលដ្ឋានជាដើម ទោះបីនៅក្នុងសម្ពាធនៃជំងឺ Covid-19 ក៏ដោយ។
បន្ថែមពីនេះ រាល់ការចំណាយចរន្ត ដូចជា ប្រាក់បៀវត្សមន្រ្តីរាជការ នៅតែរក្សាបាន ប្រក្រតីភាព ក្នុងការទទួលបានបៀរវត្សពីរដងក្នុងមួយខែទៀតផង៕
