គណៈកម្មាធិការជាតិគ្រប់គ្រងគ្រោះមហន្តរាយ ឱ្យដឹងថា យ៉ាងហោចណាស់ មានមនុស្សចំនួន១០នាក់បានស្លាប់ និងពលរដ្ឋជិត១ម៉ឺននាក់ត្រូវបានអាជ្ញាធរជម្លៀសទៅទីទួលសុវត្ថិភាព ដោយសារគ្រោះទឹកជំនន់នៅបណ្តារាជធានី-ខេត្តមួយចំនួន។
អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ លោក ឃុន សុខា ប្រាប់វីអូឌីនៅថ្ងៃចន្ទនេះថា ចាប់តាំងពីថ្ងៃទី១ ដល់ថ្ងៃទី១២ ខែតុលានេះ មានជនរងគ្រោះចំនួន១០នាក់ ក្នុងនោះមានកុមារ៣នាក់ដែលបានស្លាប់ដោយសារគ្រោះទឹកជំនន់។
លោកបន្តថា ពលរដ្ឋដែលរងផលប៉ះពាល់ដោយទឹកជំនន់មានជាង១០ម៉ឺននាក់ (១០១ ៨១២ នាក់) ក្នុងនោះ ពលរដ្ឋ៩ ៥៦០នាក់ ត្រូវអាជ្ញាធរជម្លៀសចេញទៅទីទួលសុវត្ថិភាព។
ចំណែកខេត្តដែលរងផលប៉ះពាល់ដោយជំនន់ទឹកភ្លៀងវិញ លោកថា មានចំនួន១៦រាជធានី-ខេត្ត រួមមាន រាជធានីភ្នំពេញ ខេត្តបន្ទាយមានជ័យ បាត់ដំបង ស្វាយរៀង ឧត្តរមានជ័យ សៀមរាប តាកែវ កំពង់ស្ពឺ មណ្ឌលគិរី ព្រះសីហនុ កោះកុង ព្រះវិហារ កំពង់ចាម ស្ទឹងត្រែង ប៉ៃលិន និងពោធិ៍សាត់។
លោកបានបញ្ជាក់ថា៖ «ឥលូវយើងកំពុងតែមមាញឹក ទាក់ទងនឹងអាជ្ញាធរដែនដី ខេត្តស្រុក ឃុំហ្នឹង កំពុងធ្វើការឆ្លើយតប ហើយនឹងជម្លៀសនិងរុករកជនរងគ្រោះ ក្នុងនោះ យើងត្រៀមកងកម្លាំង១ ០០០នាក់ និងមធ្យោបាយសម្រាប់ជួយសង្គ្រោះ ទូក កាណូត ជាដើម ដើម្បីទៅជម្លៀស ហើយនឹងជួយគាត់ចេញពីកន្លែងដែលគ្រោះថ្នាក់»។
លោក ឃុន សុខា បន្តថា ជំនន់ទឹកភ្លៀងនេះ ក៏បង្កផលប៉ះពាល់ដល់ផ្ទះប្រជាពលរដ្ឋចំនួន២៤ ៦៦៦ខ្នង ដំណាំស្រូវចំនួន៣៩ ៤៦២ហិកតា ដំណាំផ្សេងទៀតចំនួន៤៤ ១៨១ហិកតា សាលារៀនចំនួន៥៤សាលា និងផ្លូវជាតិនិងស្ពាន១៥កន្លែង។
អ្នកនាំពាក្យក្រសួងធនធានទឹក និងឧតុនិយម លោក ចាន់ យុត្ថា មានប្រសាសន៍ថា ស្ថានភាពជំនន់ទឹកភ្លៀងនៅតំបន់មួយចំនួន បានចាប់ផ្តើមធូរស្រាលនិងស្រកទៅវិញខ្លះហើយ ខណៈតំបន់ខ្លះទៀតត្រូវការរយៈពេលពី៣ទៅ៤ថ្ងៃ ទើបស្រកវិញ។
លោកបញ្ជាក់ថា ទឹកជំនន់ដែលកំពុងបង្កផលប៉ះពាល់ដល់ប្រជាពលរដ្ឋនៅតាមរាជធានី-ខេត្តនេះ គឺជាជំនន់ទឹកភ្លៀងបណ្ដាលមកពីព្យុះទី១៥។
លោកថា៖ «ស្ទឹកព្រែកត្នោតរបស់ខេត្តកំពង់ស្ពឺ ហើយហូរមកខេត្តកណ្តាល ត្រង់កន្លែងខណ្ឌដង្កោ ហើយបានវាធ្លាក់ទៅផ្នែកខាងក្រោមនៃខេត្តកណ្តាល ខណៈពេលស្ទឹងមង្គលបុរីហូរកាត់ខេត្ត ទីមួយគឺខេត្តបាត់ដំបង ហើយទីពីរគឺខេត្តបន្ទាយមានជ័យ»។
លោកបន្ថែមថា៖ «យើងកំពុងតែអន្តរាគមន៍នៅស្ទឹងព្រែកត្នោត ទប់ទល់នឹងទឹកជំនន់និងបញ្ចៀសទឹកជំនន់ដែលយើងអាចធ្វើទៅបាន ការបង្វែរទឹកជំនន់ចេញពីទីប្រជុំជន ហើយតាមទំហំទឹកភ្លៀង បើយើងអត់មានទំនប់ជួយទប់ការពារទេ ក្រុងបាត់ដំបងមិនដឹងថាលិចកម្ពស់ប៉ុន្មានទេពេលនេះ»។
កាលពីថ្ងៃអាទិត្យម្សិលមិញ រដ្ឋមន្ត្រីក្រសួងមហាផ្ទៃ លោក ស ខេង បានណែនាំទៅអាជ្ញាធររាជធានី-ខេត្តទាំងអស់ ត្រូវយកចិត្តទុកដាក់ត្រួតពិនិត្យនិងជួយសម្រួលការធ្វើចរាចរណ៍នៅលើកំណាត់ផ្លូវដែលរងការជន់លិច ដូចជា ការផ្អាកការធ្វើដំណើរឆ្លងកាត់និងការដាក់ស្លាកសញ្ញាសម្គាល់ ដើម្បីការពារគ្រោះថ្នាក់ជាយថាហេតុ។
លោកបានបញ្ជាក់ក្នុងទំព័រហ្វេសប៊ុករបស់លោកថា៖ «ដោយសារស្ថានភាពភ្លៀងធ្លាក់ខ្លាំងនៅតែបន្តកើតមាន ធ្វើឱ្យជន់លិចភូមិដា្ឋន ផ្ទះសម្បែង និងហេដ្ឋារចនាសម្ព័ន្ធសាធារណៈជាច្រើនកន្លែង ជាពិសេសនៅតាមបណ្ដាខេត្តភាគពាយព្យប្រទេស។ ខ្ញុំសូមណែនាំឯកឧត្តម លោកជំទាវ [អភិបាលរាជធានី-ខេត្ត] បន្តយកចិត្តទុកដាក់ជាអាទិភាពបំផុត លើកិច្ចការសង្គ្រោះអាយុជីវិតនិងដោះស្រាយបញ្ហាប្រឈមចំពោះមុខ»។
ក្រៅពីណែនាំឱ្យអាជ្ញាធរយកចិត្តទុកដាក់ លោក ស ខេង ក៏បានអំពាវនាវដល់ប្រជាពលរដ្ឋនៅតំបន់មានការជន់លិច ឱ្យតាមដានព័ត៌មាននិងអនុវត្តតាមការណែនាំរបស់អាជ្ញាធរ ដើម្បីការពារសុវត្ថិភាព ជាពិសេស រាល់ពេលធ្វើដំណើរនៅតំបន់ដែលមានការជន់លិចផងដែរ។
ពលរដ្ឋរស់នៅសង្កាត់ស្ពានថ្ម ខណ្ឌដង្កោ រាជធានីភ្នំពេញ អ្នកស្រី ទឹម សារ៉ង និយាយនៅថ្ងៃចន្ទនេះថា ទឹកជំនន់ចាប់ផ្ដើមឡើងខ្លាំងរហូតដល់លិចផ្ទះរបស់គាត់ ចាប់តាំងពីយប់ថ្ងៃទី៩ ខែតុលា ហើយបច្ចុប្បន្ន គ្រួសាររបស់គាត់បានបោះតង់ស្នាក់នៅចិញ្ចើមផ្លូវបណ្ដោះអាសន្នសិន។
អ្នកស្រីថា៖ «មុនដំបូងល្មមទេ ដល់ពេលម្សិលមិញ ម្សិលម៉្ងៃ ហើយយប់មិញនេះ យប់លឺសូរផ្ទះបាក់ស្រឹបៗ ដឹងខ្លួន ជញ្ជូនគ្រែ ជញ្ជូនអីយកមកលើ [ចិញ្ចើមផ្លូវ] នេះ សម្រាកលើនេះ»។
អាជ្ញាធរខេត្តកំពង់ស្ពឺ នៅថ្ងៃចន្ទនេះ ក៏បានចេញសេចក្តីជូនដំណឹង ដោយអំពាវនាវដល់ប្រជាពលរដ្ឋឱ្យត្រៀមបង្ការនិងប្រុងប្រយ័ត្នខ្ពស់ ដោយសារជំនន់ទឹកភ្លៀងអាចនឹងកើតមានឡើងនៅតាមតំបន់មួយចំនួនជាយថាហេតុ។
ចំណែកសាលារាជធានីភ្នំពេញ កាលពីយប់ថ្ងៃអាទិត្យ ក៏បានប្រកាសបិទចរាចរណ៍កំណាត់ផ្លូវលេខ៣៧១ ក្នុងខណ្ឌមានជ័យ ជាបណ្តោះអាសន្ន ដើម្បីបញ្ជូនរថយន្តទៅបូមទឹកចេញពីស្ថានីយបឹងទំពុនដែលទឹកកំពុងឡើងខ្លាំងផងដែរ៕