យ៉ាងហោចណាស់ មនុស្សចំនួន១៧នាក់បានស្លាប់និង១៣នាក់ទៀតកំពុងបាត់ខ្លួន ដោយសារគ្រោះទឹកជំនន់នៅក្នុងខេត្តភាគកណ្តាលរបស់ប្រទេសវៀតណាមកាលពីសប្តាហ៍មុន ខណៈប្រទេសនេះនឹងរងការវាយប្រហារដោយព្យុះត្រូពិកមួយផ្សេងទៀត។
ទូរទស្សន៍មួយរបស់វៀតណាម RNZ បានរាយការណ៍នៅថ្ងៃទី១២ ខែតុលា ឆ្នាំ២០២០ ថា នៅប៉ុន្មានថ្ងៃខាងមុខទៀតនេះ តំបន់ភាគកណ្តាល គួរតែត្រៀមខ្លួនឱ្យបានរួចជាស្រេចសម្រាប់ព្យុះទីហ្វុងមួយទៀតឈ្មោះ លីនហ្វា (Linfa) ដែលនឹងនាំមកនូវភ្លៀងនិងបង្កជាទឹកជំនន់ថែមទៀត។
ខ្សែវីដេអូដែលផ្សាយដោយទូរទស្សន៍ VTV បានបង្ហាញថា ឆ្មាំសមុទ្រនិងក្រុមអ្នកជួយសង្គ្រោះតាមឧទ្ធម្ភាគចក្រ បានជួយសង្រ្គោះក្រុមអ្នកនេសាទដែលជួបបញ្ហាខ្យល់បក់បោកខ្លាំងនៅតាមឆ្នេរសមុទ្រវៀតណាមភាគកណ្តាលនៃភាគកណ្តាលខេត្តក្វាងទ្រី (Quang Tri)។
ប្រភពព័ត៌មានដដែលបានបន្តថា ទឹកជំនន់បានកាត់បន្ថយការផ្គត់ផ្គង់ស្បៀងអាហារដល់ប្រជាជនរាប់ពាន់នាក់។ យោងតាមរបាយការណ៍របស់រដ្ឋាភិបាល បានឱ្យដឹងថា ប្រជាជនប្រមាណ៣១ ០០០នាក់បានផ្លាស់ទីលំនៅ ហើយផ្ទះប្រមាណជាង៣៣ ០០០ខ្នងត្រូវទឹកលិចនិងខូចខាតដោយសារគ្រោះទឹកជំនន់។
ប្រព័ន្ធផ្សព្វផ្សាយក្នុងស្រុករាយការណ៍ថា ផ្លូវជាតិដែលតភ្ជាប់ពីភាគខាងជើងទៅភាគខាងត្បូងប្រទេសវៀតណាម ត្រូវបានជន់លិច ខណៈក្រុមហ៊ុនអាកាសចរណ៍នានា បានលុបចោលជើងហោះហើរក្នុងស្រុកមួយចំនួន។
ប្រទេសវៀតណាមជាប្រទេសដែលងាយនឹងមានព្យុះ ដែលវាអាចបំផ្លិចបំផ្លាញនិងបង្កើតទឹកជំនន់ ដោយសារតែប្រទេសនេះមានឆ្នេរសមុទ្រវែង។ គ្រោះមហន្តរាយធម្មជាតិភាគច្រើនជាទឹកជំនន់និងការបាក់ដីដែលបង្កឡើងដោយព្យុះ បានសម្លាប់មនុស្ស១៣២នាក់ និងរងរបួស២០៧នាក់ផ្សេងទៀត នៅក្នុងប្រទេសនេះ កាលពីឆ្នាំមុន។
ចំណែកឯនៅក្នុងប្រទេសថៃឯណោះវិញ ក៏បានកំពុងរងគ្រោះដោយសារទឹកជំនន់ផងដែរ ដោយផ្លូវថ្នល់មួយចំនួននៅក្នុងខេត្តណាខុនរ៉ាឆាតស៊ីម៉ា (Nakhon Ratchasima) បានលិចលង់ ហើយអ្នកស្រុកបាននាំគ្នាដឹកជញ្ជូនអីវ៉ាន់របស់ពួកគេទៅកាន់ទីទួលសុវត្ថិភាព។ រីឯនៅប្រទេសឡាវ ទឹកជំនន់ដែលកំពុងកើនឡើង បានធ្វើឱ្យខូចខាតដល់ភូមិនិងវាលស្រែនៅតាមដងទន្លេសេផុន (Xepon) និងស៊ីបេងហៀង (Xebanghieng) ក្នុងខេត្តសាវណ្ណាខេត (Savannakhet) ដោយសារមានភ្លៀងធ្លាក់ច្រើន៕
