ថ្នាក់ដឹកនាំរាជរដ្ឋាភិបាល មេដឹកនាំអតីតបក្សប្រឆាំង និងឯកអគ្គរាជទូតជប៉ុន បង្ហាញការព្រួយបារម្ភពីបញ្ហាគ្រោះទឹកជំនន់ដែលកំពុងកើតមានក្នុងខេត្តមួយចំនួន ដោយបានអំពាវនាវស្រដៀងៗគ្នាដល់ប្រជាពលរដ្ឋឱ្យមានការប្រុងប្រយ័ត្នខ្ពស់ និងស្នើដល់សប្បុរសជនជួយដល់ពលរដ្ឋរងគ្រោះ។
លោកនាយករដ្ឋមន្ត្រី ហ៊ុន សែន បានលើកឡើងក្នុងទំព័រហ្វេសប៊ុកកាលពីថ្ងៃអាទិត្យថា កម្ពុជា កំពុងបន្តទទួលឥទ្ធិពលនៃប្រព័ន្ធសម្ពាធទាប ITCZ និងសម្ពាធទាបសកម្ម (Active Low) ដែលធ្វើឱ្យស្ថានភាពធាតុអាកាសមានភ្លៀងធ្លាក់ក្នុងកម្រិតមធ្យមទៅច្រើន។
លោកបន្តថា ខេត្តភាគពាយព្យនិងភាគខាងជើង ស្ថិតក្នុងភូមិសាស្ត្រជាប់ជួរភ្នំដងរែក ជួរភ្នំក្រវាញ បន្តទទួលរងនូវជំនន់ទឹកភ្លៀងជាបន្តបន្ទាប់ ខណៈតំបន់មាត់សមុទ្រនិងលើផ្ទៃសមុទ្រ អាចមានភ្លៀង ខ្យល់បក់បោក លាយឡំនឹងរលកសមុទ្រខ្ពស់។ ករណីនេះ លោកបានអំពាវនាវដល់ប្រជាពលរដ្ឋ ជាពិសេសអ្នករស់នៅតំបន់រងគ្រោះ ត្រូវមានការប្រុងប្រយ័ត្ននិងជម្លៀសរកទីទួលសុវត្ថិភាព។
លោកនាយករដ្ឋមន្ត្រី ក៏បានណែនាំដល់ក្រសួង ស្ថាប័ន និងអាជ្ញាធរពាក់ព័ន្ធគ្រប់ជាន់ថ្នាក់ ត្រូវបន្តយកចិត្តទុកដាក់ជួយសង្គ្រោះប្រជាពលរដ្ឋឱ្យបានទាន់ពេលវេលា ដើម្បីទប់ទល់នឹងគ្រោះទឹកជំនន់ ព្រមទាំងកាត់បន្ថយឱ្យបានជាអតិបរមានូវការលំបាកនិងផលប៉ះពាល់ដល់អាយុជីវិតប្រជាពលរដ្ឋនិងទ្រព្យសម្បត្តិនានា។
លោកបានគូសបញ្ជាក់៖ «សូម [ក្រសួង ស្ថាប័ន អាជ្ញាធរពាក់ព័ន្ធគ្រប់ជាន់ថ្នាក់] បន្តចាត់វិធានការចាំបាច់នានា និងដឹកនាំកម្លាំងក្នុងការចេញទៅជួយសង្គ្រោះប្រជាពលរដ្ឋតាមភូមិសាស្ត្រដែលទទួលខុសត្រូវ ឱ្យបានទាន់ពេលវេលា»។
ប្រធានរដ្ឋសភា លោក ហេង សំរិន បានលើកឡើងក្នុងទំព័រហ្វេសប៊ុកនៅថ្ងៃចន្ទនេះ ដោយលើកទឹកចិត្តដល់សមាជិក-សមាជិការដ្ឋសភា សមាជិករាជរដ្ឋាភិបាល និងស្ថាប័នជាតិ-អន្តរជាតិ បន្តសកម្មភាពមនុស្សធម៌ក្នុងការជួយឧបត្ថម្ភគាំពារដល់ប្រជាពលរដ្ឋរងគ្រោះដោយសារទឹកជំនន់ ដូចជា ជំនួយសង្រ្គោះបន្ទាន់ សម្ភារប្រើប្រាស់ ថវិកា ថ្នាំសង្កូវ ជាដើម ឱ្យបានទាន់ពេលវេលា។
ចំណែកមេដឹកនាំអតីតគណបក្សសង្គ្រោះជាតិ លោក កឹម សុខា ក៏បានលើកឡើងក្នុងទំព័រហ្វេសប៊ុករបស់លោកកាលពីថ្ងៃម្សិលមិញដែរថា ស្ថានភាពគ្រោះទឹកជំនន់នៅតាមតំបន់មួយចំនួន ក្នុងនោះមានខេត្តបាត់ដំបងនិងខេត្តពោធិ៍សាត់ជាដើម នៅមិនទាន់ធូរស្រាលនៅឡើយ។
លោកក៏បានបង្ហាញនូវការព្រួយបារម្ភផងដែរពីផលប៉ះពាល់ដោយសារគ្រោះទឹកជំនន់នេះ ដូចជា ផលប៉ះពាល់ដល់ហេដ្ឋារចនាសម្ព័ន្ធ ផ្ទះសម្បែង ផលដំណាំ ទ្រព្យសម្បត្តិ និងអាចប៉ះពាល់ដល់អាយុជីវិតមនុស្ស សត្វ និងមុខរបបរចិញ្ចឹមជីវិតរបស់ប្រជាពលរដ្ឋ។
លោក កឹម សុខា បានគូសបញ្ជាក់ថា៖ «ទោះបីខ្ញុំពុំមានលទ្ធភាពនិងសមត្ថកិច្ចក្នុងការជួយសង្គ្រោះនូវផលប៉ះពាល់នៃទឹកជំនន់នេះក៏ដោយ ក៏ខ្ញុំសូមសម្តែងនូវសមានចិត្តចូលរួមដោយស្មោះនូវកង្វល់និងការរំលែកទុក្ខលំបាករបស់បងប្អូនជនរួមជាតិនៅតាមតំបន់ដែលរងផលប៉ះពាល់ដោយសារទឹកជំនន់នេះផងដែរ និងសូមបងប្អូនមានការប្រុងប្រយ័ត្នខ្ពស់»។
លោកបានបន្ថែមថា៖ «ក្នុងគ្រាលំបាកចំពោះមុខនេះ ខ្ញុំសូមធ្វើការអំពាវនាវដល់បងប្អូនជនរួមជាតិខ្មែរទាំងអស់និងសប្បុរសជនចូលរួមជួយរំលែកទុក្ខលំបាកទាំងស្មារតីនិងសម្ភារដល់បងប្អូនជនរងគ្រោះដោយទឹកជំនន់»។
នាយករងអង្គការឃ្លាំមើលសិទ្ធិមនុស្សលីកាដូ លោក អំ សំអាត និយាយថា ការសង្គ្រោះពលរដ្ឋពីគ្រោះទឹកជំនន់ ជាប្រយោជន៍រួម ខណៈការរួមគ្នាស្តារស្ថានភាពសិទ្ធិមនុស្សឡើងវិញ ជារឿងចាំបាច់មួយទៀតដែលអ្នកនយោបាយគួរពិចារណា។
លោកថា៖ «ដើម្បីប្រជាពលរដ្ឋ ដើម្បីឧត្តមប្រយោជន៍ជាតិ បានជាយើងតែងតែអំពាវនាវឱ្យអ្នកនយោបាយគោរពសិទ្ធិមនុស្ស។»
នាយកវិទ្យាស្ថានប្រជាធិបតេយ្យកម្ពុជា លោក ប៉ា ចន្ទរឿន មានប្រសាសន៍ថា ការបង្ហាញសាររួមគ្នារបស់អ្នកនយោបាយ ក្នុងការជួយសង្គ្រោះពលរដ្ឋខ្មែរដែលរងគ្រោះដោយទឹកជំនន់ពេលនេះ បានបញ្ជាក់ថា អ្នកនយោបាយរួមគិតពីប្រយោជន៍និងបញ្ហាលំបាករបស់ពលរដ្ឋខ្មែរ។
ប៉ុន្តែលោកថា បើអ្នកនយោបាយបន្តឆន្ទៈបែបនេះដោះស្រាយបញ្ហានយោបាយដែលកំពុងជាប់គាំងដូចបញ្ហាទឹកជំនន់ នោះពួកគេនឹងទទួលបានការគាំទ្រពីមជ្ឈដ្ឋានជាតិនិងអន្តរជាតិ។
លោកថា៖ «នៅក្នុងសង្គមប្រជាធិបតេយ្យបែបទំនើបនេះ មិនមែនជាសមរភូមិដើម្បីកាប់សម្លាប់គ្នាយកជ័យទេ ប៉ុន្តែវាជាការបង្ហាញសមត្ថភាពនិងលទ្ធភាពក្នុងការដោះស្រាយបញ្ហាចម្បងៗរបស់ជាតិដើម្បីជាប្រយោជន៍រួមទាំងអស់គ្នា»។
ចំណែកឯកអគ្គរាជទូតជប៉ុនប្រចាំកម្ពុជា លោក មិកាមិ ម៉ាសាហ៊ីរ៉ូ នៅថ្ងៃចន្ទនេះ ក៏បានបង្ហាញការព្រួយបារម្ភពីគ្រោះទឹកជំនន់នៅតាមបណ្តាខេត្តជាច្រើននៃប្រទេសកម្ពុជា ដែលបានបង្កគ្រោះថ្នាក់ដល់អាយុជីវិតប្រជាជននិងបង្ខំចិត្តឱ្យប្រជាជនជាច្រើនត្រូវជម្លៀសទៅកាន់ទីទួលសុវត្ថិភាព។
លោកបានបន្តថា៖ «ខ្ញុំសូមចូលរួមរំលែកទុក្ខដ៏ក្រៀមក្រំចំពោះក្រុមគ្រួសារដែលរងគ្រោះដល់អាយុជីវិតដោយសារទឹកជំនន់។ សូមឱ្យប្រជាជនកម្ពុជាមានសុខសុវត្ថិភាព ជាពិសេសប្រជាជនដែលរស់នៅតំបន់រងគ្រោះដោយទឹកជំនន់។ ខ្ញុំក៏សូមបួងសួងសូមឱ្យស្ថានភាពនៃជីវភាពរស់នៅវិលមកដូចធម្មតាវិញឆាប់ៗនេះ។ ប្រទេសជប៉ុននឹងនៅគាំទ្រជាមួយប្រជាជនកម្ពុជា»៕