អាជ្ញាធរមីនណែនាំដល់ស្ថាប័ន អង្គការពាក់ព័ន្ធ និងប្រជាពលរដ្ឋ ពង្រឹងវិធានការការពារនិងប្រុងប្រយ័ត្នខ្លួន ចំពោះគ្រាប់មីននិងយុទ្ធភណ្ឌមិនទាន់ផ្ទុះ ក្នុងអំឡុងពេលនិងក្រោយពេលគ្រោះទឹកជំនន់។
សេចក្ដីណែនាំរបស់អាជ្ញាធរមីនដែលបានផ្សព្វផ្សាយកាលពីថ្ងៃសៅរ៍ បានឱ្យដឹងថា ក្នុងពេលនិងក្រោយពេលទឹកជំនន់ មីននិងគ្រាប់យុទ្ធភណ្ឌមិនទាន់ផ្ទុះមួយចំនួន ត្រូវបានរកឃើញ ដោយសារការហូរច្រោះដីរសាត់មកពីតំបន់ដែលមានមីនប្រឆាំងមនុស្ស មីនប្រឆាំងរថក្រោះ និងសំណល់ជាតិផ្ទុះពីសង្គ្រាមជាច្រើនប្រភេទ ដែលអាចបង្កគ្រោះថ្នាក់ដល់អាយុជីវិតប្រជាពលរដ្ឋ ជាយថាហេតុ ជាពិសេសពលរដ្ឋដែលកំពុងរស់នៅតំបន់ដែលរងផលប៉ះពាល់ដោយសារមីននិងសំណល់ជាតិផ្ទុះពីសង្គ្រាម។
ដើម្បីទប់ស្កាត់បញ្ហានេះ អាជ្ញាធរមីនបានណែនាំដល់គ្រប់គណៈកម្មាធិការសកម្មភាពមីនខេត្ត គ្រប់ប្រតិបត្តិករនិងអង្គការពាក់ព័ន្ធ ចូលរួមសហការទប់ស្កាត់ឱ្យបាននូវគ្រោះថ្នាក់ដោយសារមីននិងសំណល់ជាតិផ្ទុះពីសង្គ្រាម ក្នុងពេលនិងក្រោយពេលគ្រោះទឹកជំនន់។
ក្នុងនោះ អាជ្ញាធរមីនបានជំរុញឱ្យមានការចុះពង្រឹងនិងអនុវត្តនូវការតាមដានព័ត៌មានពីមីន និងផ្សព្វផ្សាយ ឬផលិតវីដេអូអប់រំដល់ពលរដ្ឋឱ្យយល់ដឹងពីផលប៉ះពាល់របស់មីន ហើយអាជ្ញាធរខេត្តត្រូវការឆ្លើយតបឱ្យទាន់ពេលនូវការរាយការណ៍របស់ប្រជាពលរដ្ឋពីការប្រទះឃើញមីន និងដាក់ស្លាកសញ្ញាតាមកន្លែងដែលសង្ស័យករណីមានមីន។
បើតាមអាជ្ញាធរមីន កម្ពុជានៅសល់ផ្ទៃដីរងផលប៉ះពាល់ដោយសារគ្រាប់បែកចង្កោមប្រមាណជាង៧៤៣គីឡូម៉ែត្រក្រឡា ក្នុងខេត្តចំនួន១៩ទូទាំងប្រទេសដែលនៅមិនទាន់បានបោសសម្អាត។
អាជ្ញាធរមីនបានបញ្ជាក់ថា ផ្អែកតាមលទ្ធផលនៃការស្រាវជ្រាវទិន្នន័យមូលដ្ឋាន ចាប់ពីឆ្នាំ២០០៩ ដល់ខែសីហា ឆ្នាំ២០២០ ប្រទេសកម្ពុជារងផលប៉ះពាល់ដោយសារគ្រាប់បែកចង្កោមមានផ្ទៃដីប្រមាណជាង៨៩៤គីឡូម៉ែត្រក្រឡា ក្នុងនោះ បានបោសម្អាតរួច មានប្រមាណជាង១៨៥គីឡូម៉ែត្រការ៉េ និងផ្ទៃដីនៅសល់មានប្រមាណជាង៧៤៣គីឡូម៉ែត្រការ៉េទៀត៕
