ក្រសួងអប់រំ យុវជន និងកីឡា បានអនុញ្ញាតគ្រឹះស្ថានឧត្តមសិក្សាសាធារណៈទាំងអស់បើកដំណើរការឡើងវិញ ក្រោយពីត្រូវបានបិទជិត៧ខែដោយសារតែការផ្ទុះឡើងនៃជំងឺកូវីដ១៩។
លិខិតក្រសួងអប់រំ យុវជន និងកីឡា ផ្ញើទៅកាន់សាកលវិទ្យាធិការ និងនាយកនៃគ្រឹះស្ថានឧត្តមសិក្សាសាធារណៈកាលពីថ្ងៃសុក្រសប្តាហ៍មុន បញ្ជាក់ថា ការបើកដំណើរការឡើងវិញនូវគ្រឹះស្ថានឧត្តមសិក្សាសាធារណៈ ត្រូវគោរពតាមគោលការណ៍ប្រតិបត្តិស្ដង់ដារ (SOP) និងលិខិតបទដ្ឋានគតិយុត្តិដទៃទៀត។ តាមប្រភពដដែល គ្រឹះស្ថានឧត្តមសិក្សារដ្ឋទាំងអស់អាចបើកឡើងវិញចាប់ពីថ្ងៃទី៩ ខែតុលាតទៅ។
គោលការណ៍ប្រតិបត្តិស្តង់ដាររបស់ក្រសួងអប់រំ រួមមាន ការតម្រូវឱ្យគ្រឹះស្ថានសិក្សារក្សាសីតុណ្ហភាពថ្នាក់រៀនមិនឱ្យក្រោម២៤អង្សាសេ សិស្សនិងគ្រូត្រូវពាក់ម៉ាស់និងស្រោមដៃ បន្ទប់រៀនត្រូវសម្អាត និងបែងចែកចំនួនសិស្សដើម្បីរក្សាគម្លាតសង្គមជាដើម។
កញ្ញា ឯម ប៉ុកសុភត្រា អាយុ១៩ឆ្នាំ ជានិស្សិតឆ្នាំទី៣ ផ្នែកនីតិសាស្ត្រ នៃសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច បានលើកឡើងថា ការបើកសាលាឡើងវិញអំឡុងពេលដែលជំងឺកូវីដ១៩នៅតែមានវត្តមានបែបនេះ អាចមានទាំងផលល្អនិងផលអាក្រក់។
កញ្ញា សុភត្រា បាននិយាយថា៖ «វាមានផ្នែកល្អ ផ្នែកអាក្រក់ ដោយសារទោះជាឥលូវយើងអាចបើកសាលាបាន យើងអាចចូលរៀនវិញ វាមានប្រសិទ្ធភាពចំពោះការរៀន ព្រោះការរៀនអនឡាញ វាអត់ស្រួលទេ ហើយវាមានប្រសិទ្ធភាពជាងមុន។ តែពេលយើងបើកសាលាវិញ វានៅតែមានឱកាសក្នុងការឆ្លងជំងឺ ដោយសារជំងឺនេះមិនទាន់បាត់ទៅទាំងស្រុងនោះទេ»។
លោក ឌី ដារុណ អាយុ២០ឆ្នាំ ជានិស្សិតឆ្នាំទី២ ផ្នែកសិក្សាអន្តរជាតិ នៃសាកលវិទ្យាល័យភូមិន្ទភ្នំពេញ បាននិយាយថា លោកសាទរដែលសាលាត្រូវបានអនុញ្ញាតឱ្យបើកឡើងវិញ។
លោក ឌី ដារុណ បានលើកឡើងថា៖ «និយាយពីអារម្មណ៍តាមត្រង់ហ្មង ធម្មតា! ប៉ុន្តែក៏ត្រេកអរដែរពេលបើកសាលាឡើងវិញ ឃើញថា ពេលរៀនអនឡាញ វារៀនអត់សូវយល់ ហើយវាស្ត្រេស នៅកន្លែងមួយតែឯង។ ពេលរៀនជាមួយគ្រូ មានបញ្ហាអី យើងស្រួលសួរ ហើយការពិភាក្សាមានភាពស្និទ្ធស្នាលជាមួយមិត្តភក្តិ»។
ផ្ទុយពីកញ្ញា សុភត្រា លោក ឌី ដារុណ បាននិយាយថា ខ្លួនពុំសូវមានការព្រួយបារម្ភពីការឆ្លងជំងឺកូវីដ១៩ប៉ុន្មាននោះទេ ព្រោះលោកយល់ថា រដ្ឋាភិបាលកម្ពុជាអាចគ្រប់គ្រងស្ថានការណ៍ជំងឺនេះបានរួចទៅហើយ។ គ្រឹះស្ថានសិក្សាទាំងអស់ក្នុងប្រទេសកម្ពុជា ត្រូវបានបិទទ្វារកាលពីថ្ងៃទី១៦ ខែមីនា ចំពេលមានការរីករាលដាលនៃជំងឺកូវីដ១៩៕
